Nýlega var varðskipið Týr í viðhaldsvinnu við ljósdufl í Faxaflóa, í Hvalfirði, undan Hafnarfirði, í Skerjafirði og í Breiðafirði. Ljósduflin voru hreinsuð, sum voru einnig máluð og legufæri yfirfarin. Alls var unnið við þrettán ljósdufl, þar af var skipt um sjö stór járndufl sem hafa verið í notkun hér við land síðan í seinni heimsstyrjöldinni.

Þyrla Landhelgisgæslunnar lenti í Reykjavík kl. 16:30 eftir að hafa verið við leit að ísbirni sem erlendir ferðamenn töldu sig sjá á sundi í Húnaflóa í fyrradag. Hvorki sást tangur né tetur af ísbirni á svæðinu.

Landhelgisgæslan hefur í samráði við lögregluna á Blönduósi tekið ákvörðun um að þyrla Landhelgisgæslunnar fari að nýju til leitar að hvítabirni sem erlendir ferðamenn töldu sig sjá á sundi í Húnaflóa í fyrradag. Ákveðið var að fara þetta flug í stað æfingaflugs sem áætlað var í dag.

Landhelgisgæslunni barst kl. 16:55 í gær beiðni frá fjarskiptamiðstöð lögreglunnar um aðstoð þyrlu eftir að óstaðfestar fregnir bárust af hvítabirni á sundi við Vatnsnes.  Þegar þyrlan TF-LIF kom á svæðið var fljótlega lent við Geitafell þar sem för sáust í sandinum sem talin voru vera eftir bjarndýrið.

Landhelgisgæslunni barst kl. 15:54 beiðni frá fjarskiptamiðstöð lögreglu um þyrluáhöfn í viðbragðsstöðu vegna alvarlegs slyss á sveitabæ skammt frá Sauðárkróki. Beiðni um aðstoð þyrlunnar var staðfest kl. 16:01 og  fór TF-GNA í loftið kl. 16:18.

Landhelgisgæslunni barst í kvöld aðstoðarbeiðni frá fiskibát sem var vélarvana um 15 sjómílur frá Neskaupstað. Björgunarskipið Hafbjörg frá Neskaupstað var kallað út til aðstoðar og er reiknað  með að siglingin að bátnum taki um klukkustund.  

Samkvæmt upplýsingum frá flugrekstrardeild voru þyrlur Landhelgisgæslunnar kallaðar út 26 sinnum í júní vegna sjúkraflutnings, leitar, björgunar auk aðstoðar við lögreglu og slökkvilið. Til samanburðar má nefna að á sama tímabili árið 2011 voru þyrlurnar kallaðar út 17 sinnum.

Sprengjudeild Landhelgisgæslunnar barst nýverið tilkynning um torkennilegan hlut í fjöru skammt austan við Þorlákshöfn. Var hann merktur „Kriegsmarine“ en undir því nafni gekk sjóher Þjóðverja á árunum 1935 – 1945. Miðað við lag hlutarins og merkingar var ekki hægt að útiloka að um djúpsprengju væri að ræða.

Baldur, eftirlitsskip Landhelgisgæslunnar stóð um hádegisbilið strandveiðibát að meintum ólöglegum veiðum innan reglugerðarhólfs suður af Skor í Breiðafirði þar sem í gildi er bann við handfæra- og línuveiðum. Var bátnum vísað til hafnar þar sem málið verður tekið fyrir af viðeigandi lögregluyfirvöldum.

Varðskipið Týr kom til hafnar í Reykjavík þann 22. júní síðastliðinn eftir 6000 sjómílna siglingu á 43 dögum frá Íslandi til Kanada, þar sem varðskipið sótti skipið Hebron Sea og dró það síðan yfir Atlantshafið til Grenå i Danmörku þar sem skipið var tekið til niðurrifs.

Landhelgisgæslan og lögreglan hafa m.a. samstarf um umferðareftirlit úr þyrlu og var um helgina farið í eftirlit um Suðurland.  Í eftirlitinu fer lögreglumaður með þyrlunni í eftirlit og annast hraðamælingar í samstarfi við þyrluáhöfn.  Stuðst er við sérstakar verklagsreglur við mælingarnar.

Landhelgisgæslunni barst í morgun tilkynning frá flugstjórn um reyk í flugstjórnarklefa einkaþotu með fjóra menn um borð sem hafði snúið við og var á leið inn til lendingar á Keflavíkurflugvelli. Var viðbragðsáætlun samstundis virkjuð, samhæfingarstöð kölluð saman kl. 08:15 en lending var áætluð kl. 08:30.