Fjarskipti frá Noregi og Englandi
Veðurskilyrði valda því að varðstjórar í stjórnstöð hafa hlustað á fjarskipti sem ættu undir venjulegum kringumstæðum ekki að berast hingað til lands.
Stjórnstöð Landhelgisgæslunnar hefur glímt við afar óvenjuleg talstöðvarskilyrði í dag vegna háþrýstisvæðis sem liggur frá Noregi til Íslands. Skilyrðin valda því að stjórnstöðin nemur fjarskipti frá Englandi, Noregi og Norðursjó sem alla jafna ættu ekki að drífa nema 30-40 sjómílur.
Þessi heita tunga, sem liggur frá Noregi, gerir það að verkum að fjarskipti og staðsetningarmerki skipa berast mun lengra að en gengur og gerist á venjulegum degi.
Varðstjórar í stjórnstöð Landhelgisgæslunnar hafa stöku sinnum orðið varir við fyrirbærið en oftast í maí og því er þetta ákaflega óvenjulegt á þessum árstíma.
Loftmassinn berst frá Noregi.
Stjórnstöð Landhelgisgæslunnar.