Starfsmönnum Gæslunnar boðið til grillveislu
Þriðjudagur 5. maí 2009
Síðastliðinn mánudag var starfsmönnum Landhelgisgæslunnar boðið til hádegisgrillveislu í flugskýli Gæslunnar á Reykjavíkurflugvelli. Tilefni veislunnar var meðal annars góð frammistaða og árangur starfsmanna að undanförnu í erfiðum og krefjandi verkefnum þar sem samstarf og útsjónarsemi, hvort sem er í áhöfnum varðskipa, loftfara, í stjórnstöð eða annars staðar, hefur sýnt sig með skýrum hætti. Þá var ekki síður tilefnið að gleðjast yfir sjósetningu okkar glæsilega varðskips og væntanlegri komu nýrrar flugvélar eftir örfáar vikur. Boðið var upp á grillaða hamborgara og var matseld í höndum valinkunnra grillmeistara flugtæknideildar.
„Við erum í stakk búin til að takast á við krefjandi verkefni á hvaða vettvangi sem er.“
Georg Kr. Lárusson, forstjóri Landhelgisgæslunnar flutti ávarp við tilefnið en hann er nýkominn frá sjósetningu Þórs - hins nýja fjölnota varðskips í Chile. Hann lýsti einstakri upplifun sinni við sjósetninguna og talaði um þá byltingu sem hið nýja varðskip og flugvél munu hafa í för með sér fyrir björgunar- og eftirlitsgetu Landhelgisgæslunnar. Ný gæsluflugvél verður senn tekin í notkun en flugmenn hennar fóru nýverið til þjálfunar í Kanada. Verður koma hennar bylting í leitar-, björgunar-, gæslu- og eftirlitsflugi á hinu víðfeðma hafsvæði sem Landhelgisgæslan ber ábyrgð á. Þessi nýju tæki hafa gríðarlega þýðingu fyrir Ísland í samstarfi þjóða á Norður-Atlantshafi þar sem Landhelgisgæslan spilar sífellt stærra hlutverk og er orðinn einn mikilvægasti hlekkurinn í samstarfi strandgæslna og sjóherja á Norður-Atlantshafi.
Georg hrósaði starfsfólki Landhelgisgæslunnar fyrir einstakan dugnað og elju. Þegar kæmi að krefjandi verkefnum sýndi sig hversu samstilltir og einhuga starfsmenn eru um að leysa verkefni af fagmennsku og öryggi. Með jafn vel þjálfuðum og samhentum mannskap og Landhelgisgæslan býr yfir sem og nýjum og öflugum tækjum er engin spurning að við erum í stakk búin til að takast á við krefjandi verkefni á hvaða vettvangi sem er sagði Georg.
Löng biðröð myndaðist við grillið
Grillað var að miklu öryggi
...menn tóku hraustlega til matar síns.
Mettir eftir góða máltíð.
Mjög góð mæting var í grillveisluna
050509/HBS