Varðskipið Ægir siglir af stað í landamæraeftirlit fyrir Evrópusambandið
Miðvikudagur 21. Apríl 2010
Varðskipið Ægir lagði úr Reykjavíkurhöfn kl. 22:00 í gærkvöldi áleiðis til Senegal en þar og á vestanverðu Miðjarðarhafi mun varðskipið næstu 6 mánuði sinna landamæraeftirliti fyrir Frontex, landamærastofnun Evrópusambandsins.
Skipið siglir til Dakar í Senegal með viðkomu í Las Palmas á Kanaríeyjum þar sem stjórnstöð Frontex er staðsett. Skipið verður við gæslu undan ströndum Senegal til 3. júlí og heldur þá í Miðjarðarhaf til Almería á Spáni en þaðan verður skipið gert út við eftirlit í vestanverðu Miðjarðarhafi fram í október.
Verkefnið er mikil og góð reynsla fyrir starfsmenn auk sem það skapar Landhelgisgæslunni tækifæri til að ráða fleiri starfsmenn tímabundið til starfa. Einar H. Valsson skipherra Ægis var í vikunni formlega fastráðinn sem skipherra hjá Landhelgisgæslunni. Þrátt fyrir ungan aldur hefur Einar starfað hjá Landhelgisgæslunni frá árinu 1981 en Einar var fyrst lögskráður á varðskip Landhelgisgæslunnar sem messagutti. Fyrstu ferð sína sem stýrimaður fór Einar þann 17. júlí 1985, daginn eftir að hann fékk stýrimannsskírteinið í hendurnar. Hann lauk svo fjórða stiginu 1988. Einar hefur á starfsferlinum siglt sem afleysingaskipherra allnokkur ár og leyst af á Óðni, Tý og Ægi. Fyrsti túrinn sem afleysingaskipherra var í september 1995 og var það í Smugunni.
Landhelgisgæslan óskar áhöfninni góðrar ferðar og gengis á nýjum, spennandi og án efa lærdómsríkum vettvangi.
Áhöfnin stillir sér upp fyrir brottför
Gylfi Geirsson, framkvæmdastjóri, Snorre Greil yfirstýrimaður, Svanhildur
Sverrisdóttir, starfsmannastjóri og Georg Kr. Lárusson forstjóri
Landhelgisgæslunnar skoða sjóleið skipsins
Einar Valsson skipherra.
Halldór Nellet, framkvæmdastjóri aðgerðasviðs skoðar sjókorn með
Guðmundi Ragnari Magnússyni stýrimanni.
Létt var yfir áhöfninni þegar lagt var frá bryggju