Kynning á gegnumlýsingarbifreið tollstjórans
Þriðjudagur 17. janúar 2012
Starfsmenn tollstjórans kynntu nýverið fyrir starfsmönnum Landhelgisgæslunnar bifreið sem útbúin er gegnumlýsingarbúnaði. Var bifreiðin tekin til notkunar í byrjun árs 2009 og er hún notuð til að gegnumlýsa stærri hluti, allt upp í flutningagáma, á hafnarsvæðum og flugvöllum landsins. Hefur bifreiðin haft mikla hagræðingu í för með sér og gerir tollskoðun markvissari.
Var kynningin mjög áhugaverð og gagnlegt var fyrir starfsmenn Landhelgisgæslunnar að fræðast um tækjabúnað og notkunarmöguleika bifreiðarinnar. Miðlun upplýsinga og samnýting tækjabúnaðar milli stofnana er á meðal þess sem fjallað er um í samstarfssamningi sem Georg Kr. Lárusson forstjóri Landhelgisgæslunnar og Snorri Olsen tollstjóri undirrituðu í desember 2009. Einnig tekur samstarfssamningurinn til samstarfs á vettvangi, sameiginlegra eftirlitsverkefna, námskeiða, þjálfunar starfsmanna og starfsmannaskipta.
Í tollalögum númer 88/2005 kemur fram að Landhelgisgæslan skuli veita Tollstjóra upplýsingar um komu og brottför skipa í utanlandsferðum svo fljótt sem við verður komið. Þá getur Tollstjóri falið starfsmönnum Landhelgisgæslu að annast tollgæslu. Í lögum um Landhelgisgæslu Íslands númer 52/2006 kemur fram að Landhelgisgæslu sé heimilt að gera þjónustusamninga meðal annars um tolleftirlit.
Myndir Gunnar Örn Arnarsson