Ákveðið að hætta leit á sjó - björgunarsveitarmenn ganga fjörur

Þriðjudagur 17. desember 2013           

Ákveðið hefur verið að leit verði hætt á sjó að skipverjanum sem féll útbyrðis af flutningaskipinu Alexia síðdegis á sunnudag. Þessi ákvörðun var tekin í morgun í samráði við Slysavarnarfélagið Landsbjörgu og lögreglu eftir að farið var yfir leitarferla og önnur gögn sem snúa að leitinni. Áfram verður leitað á landi og munu björgunarsveitarmenn Slysavarnarfélagsins Landsbjargar ganga fjörur á svæðinu.

Björgunarsveitir Slysavarnarfélagsins Landsbjargar á Austurlandi voru í gær og á sunnudag við leit á svæðinu, þ.a.m. níu bátar, björgunarskipin Hafbjörg frá Norðfirði og Sveinbjörn frá Vopnafirði, auk harðbotna björgunarbáta frá sveitum á svæðinu.

Landhelgisgæslunni barst í gær kl. 18:25 aðstoðarbeiðni frá flutningaskipinu Alexia, sem var að koma inn til hafnar á Reyðarfirði. Skipverja var saknað og talið líklegt að hann hefði fallið útbyrðis.  Björgunarskip Slysavarnarfélagsins Landsbjargar á svæðinu voru samstundis kölluð út til leitar sem hefur ekki borið árangur.

Mynd úr stjórnstöð Landhelgisgæslunnar - Árni Sæberg.