Beiðni um aðstoð vegna mannlauss báts í Hvammsvík
Rétt um tuttugu mínútur fyrir níu í gærkvöldi, föstudag hafði eigandinn að Kára/1761 samband við stjórnstöð Landhelgisgæslunnar en báturinn var mannlaus við legufæri í Hvammsvík. Hafði báturinn dregið legufærin verulega en var þó ekki enn kominn upp í fjöru. Taldi eigandinn nauðsynlegt að huga frekar að bátnum en vegna veðurs var ómögulegt að komast um borð í bátinn. Var því afráðið að fá aðstoð björgunarsveita og voru þær komnar á staðinn um kl. 22:30. Eftir skoðun þeirra var ljóst að vegna veðurofsans væri ekkert hægt að gera og mjög óráðlegt að reyna að komast um borð í bátinn og færa hann að landi. Var báturinn því fastur þar sem hann var.
Um klukkan 11:40 í morgun hafði svo eigandinn að Kára samband við stjórnstöð Landhelgisgæslunnar og sagði bátinn kominn upp í fjöru. Liðlega hálfþrjú nú í dag var svo báturinn farinn að leka olíu og hafði stjórnstöð Landhelgisgæslunnar þá samstundis samband við Umhverfisstofnun og tilkynnti um yfirvofandi mengun.