Þyrla Landhelgisgæslunnar send til aðstoðar franskri eins hreyfils flugvél
Mánudagur 7. júlí 2003.
Flugmálastjórn hafði samband við stjórnstöð Landhelgisgæslunnar kl. 8:44 í morgun vegna franskrar eins hreyfils flugvélar sem lent hafði í vanda vestur af Reykjanesi þegar mótorar hennar misstu afl. Tveir menn voru í vélinni en hún er af gerðinni PA-46. Vélin var á leið frá Frakklandi til Bandaríkjanna en fyrirhugað var að taka eldsneyti á Íslandi. Óskaði Flugmálastjórn eftir að þyrla færi til móts við flugvélina eins fljótt og hægt væri.
Áhöfn TF-LIF var strax kölluð út og einnig óskað eftir þyrlum varnarliðsins. Í framhaldinu hafði stjórnstöð Landhelgisgæslunnar samband við Tilkynningarskylduna til að afla upplýsinga um skip á svæðinu.
Flugmálastjórn upplýsti kl. 9:00 að TF-FMS, flugvél flugmálastjórnar, væri farin til móts við frönsku flugvélina og að hún héldi nokkurn veginn hæð og hraða.
TF-LIF fór í loftið kl. 9:19. Ákveðið var að TF-LIF héldi sig 20 sjómílur vestur af Garðskaga og fylgdi vélinni til Reykjavíkur. Um kl. 10:06 tilkynnti TF-LIF að franska flugvélin væri lent heilu og höldnu á Reykjavíkurflugvelli. TF-LIF lenti þar kl. 10:13.
Dagmar Sigurðardóttir upplýsingafulltrúi
Landhelgisgæslu Íslands