Fréttir

Mánudagur 31. janúar 2005.   Skipstjórinn á togaranum Guðmundi í Nesi kl. hringdi í stjórnstöð Landhelgisgæslunnar kl. 16:42 og óskaði eftir aðstoð vegna skipverja sem er illa slasaður á hendi.  Honum var strax gefið samband við lækni í áhöfn TF-LIF.  Þegar læknirinn hafði fengið upplýsingar um ástand slasaða skipverjans var ákveðið að sækja hann með þyrlu. Skipið var þá statt 165 sjómílur vestur af Reykjavík og var skipstjórinn beðinn að sigla á fullri ferð til móts við þyrluna.   Áhöfn TF-LIF, þyrlu Landhelgisgæslunnar, var kölluð út ásamt áhöfn TF-SYN, flugvélar Landhelgisgæslunnar.  Nauðsynlegt var að þyrlan fengi fylgd flugvélarinnar öryggisins vegna þar sem þyrlan þurfti að fara út fyrir drægi TF-SIF, minni þyrlu Landhelgisgæslunnar, og skyggni var lélegt.   TF-SYN fór í loftið kl. 17:35 og TF-LIF kl. 1748.  Laust eftir kl. 19 kom þyrlan að skipinu og var lokið við að hífa sjúklinginn um borð í þyrluna hálftíma síðar.  TF-SYN og TF-LIF eru nú á leið til Reykjavíkur og er áætlað að þyrlan og flugvélin verði þar á níunda tímanum í kvöld.   Dagmar Sigurðardóttir fjölmiðlaftr.     Lesa meira

Mánudagur 31. janúar 2005. Kristinn Helgason kortagerðarmaður hætti störfum í dag eftir 32 ára farsælt starf hjá Sjómælingum Íslands / Landhelgisgæslunni.  Af því tilefni var haldin veisla honum til heiðurs og þakkaði Georg Kr. Lárusson forstjóri honum fyrir vel unnin störf, vandvirkni og dugnað.Kristinn hóf störf hjá Sjómælingum Íslands árið 1972 en þar áður hafði hann starfað hjá Landmælingum Íslands frá 1957.  Hann nam kortagerð vetrarlangt hjá Geodætisk Institut í Kaupmannahöfn en þar áður hjá Ágústi Böðvarssyni forstjóra Landmælinga Íslands.Gunnar Bergsteinsson fyrrverandi forstjóri Landhelgisgæslunnar og þar áður Sjómælinga Íslands og eiginkona hans, Brynja Þórarinsdóttir, heilsuðu upp á Kristinn í tilefni dagsins. Kristinn fékk ýmsar góðar gjafir frá samstarfsfólkinu hjá Landhelgisgæslunni, þ.á.m. teiknaða mynd af honum sjálfum. Kristinn þakkaði stofnuninni og starfsfélögum sínum fyrir samstarfið og góðar gjafir og óskaði þeim gæfu og gengis í framtíðinni.Dagmar Sigurðardóttirfjölmiðlaftr. Mynd DS: Gunnar Bergsteinsson fyrrverandi forstjóri Landhelgisgæslunnar og þar áður Sjómælinga Íslands, Kristinn Helgason kortagerðarmaður og Georg Kr. Lárusson forstjóri Landhelgisgæslunnar.  Mynd DS: Georg Kr. Lárusson forstjóri þakkaði Kristni Helgasyni fyrir vel unnin störf í þágu Landhelgisgæslunnar/Sjómælinga Íslands.Mynd: Jón Páll Ásgeirsson yfirstýrimaður: Kristinn ásamt vinum sínum og samstarfsfélögum Snjólaugu Guðjohnsen og Sjöfn Axelsdóttur á vorfagnaði Landhelgisgæslunnar í Austurbugt vorið 2004. Lesa meira

Sunnudagur 30. janúar 2005.Landhelgisgæslumenn biðu átekta til kl. 15 í dag en þá hafði veður gengið talsvert niður og unnt að koma taug á milli Dettifoss og varðskipsins Týs. Einnig var sett taug milli varðskipsins Ægis og Týs. Síðan þá hafa skipin verið á leið til Eskifjarðar en þau voru stödd í mynni Reyðarfjarðar um kl. 19.  Áætlað er að skipin verði undan Hólmanesi um tíuleytið í kvöld.  Þá ætla varðskipsmenn að kafa við Dettifoss og kanna hvort dráttartóg hefur flækst í hliðarskrúfum skipsins. Að því loknu verður skipið dregið til hafnar á Eskifirði.  Ekki er vitað klukkan hvað skipin koma þangað en búist er við að þau nái þangað í nótt.Dagmar Sigurðardóttirfjölmiðlaftr. Mynd/Jón Páll Ásgeirsson stýrimaður. Myndin er tekin frá varðskipinu Ægi.   Lesa meira

Laugardagur 29. janúar 2005. Eins og fram hefur komið er flutningaskipið Dettifoss stýrisvana út af Austurlandi.  Varðskipið Týr kom að Dettifossi um kl. 22 í gærkvöldi.  Taug var komið í Dettifoss en hún slitnaði kl. 23:37.  Um tvöleytið var aftur búið að koma taug í Dettifoss og hafist handa við að draga hann í átt til Eskifjarðar. Illa gekk að snúa Dettifossi vegna þyngdar skipsins.  Um kl. 1:51 slitnaði línan á milli skipanna.Klukkan 4:30 óskaði Týr eftir aðstoð varðskipsins Ægis en þá hafði tekist að koma taug í Dettifoss að nýju en ekkert gekk að snúa skipinu.Varðskipið Ægir var komið á svæðið kl. 10 í morgun.  Tý tókst að draga Dettifoss af stað og kl. 14 voru skipin á leið til Reyðarfjarðar á 2,5 sjómílna hraða.Varðskipinu Tý gekk erfiðlega að stjórna Dettifossi og þess vegna var taug sett á milli varðskipsins Ægis og varðskipsins Týs.  Það tókst kl. 15:40.Tuttugu mínútum síðar hafði taugin milli Dettifoss og Týs slitnað.  Skipin voru þá stödd 28 sjómílur austur af Breiðdalsvík.Vegna veðurs var ákveðið að láta Dettifoss reka um sinn og hefjast handa við að koma taug á milli skipanna að nýju er veður lægir og birta tekur af degi. Klukkan 16 í dag var suðvestanátt og vindhraði 26 metrar á sekúndu. Dagmar Sigurðardóttir fjölmiðlaftr. Mynd/Jón Páll Ásgeirsson stýrimaður á v/s Ægi:  Skutur m/s Dettifoss. Myndin er tekin kl. 13 í dag.  Eins og sjá má er meginhluti stýrisblaðs skipsins brotinn af. Mynd/ Guðmundur Rúnar Jónsson stýrimaður á vs Tý - Myndin er tekin frá Tý og sést glitta í flutningaskipið í myrkrinu. Kort af svæðinu sem Friðrik H. Friðriksson varðstjóri í stjórnstöð Landhelgisgæslunnar útbjó fyrir fjölmiðla í dag. Lesa meira

Föstudagur 28. janúar 2005. Fulltrúi Eimskips hafði samband við stjórnstöð Landhelgisgæslunnar kl. 20:25 og óskaði eftir aðstoð vegna flutningaskipsins Dettifoss en skipið var þá stýrisvana 8 sjómílur austur af Eystrahorni.  Óskað var eftir að varðskip kæmi til hjálpar.  Varðskip Landhelgisgæslunnar verður hjá Dettifossi um kl. 22 og þá er fyrirhugað að byrja á að kanna hvort stýrisblað er dottið af skipinu eða hvort eitthvað annað veldur því að skipið lætur ekki að stjórn.  Ef ekki verður hægt að lagfæra bilunina mun varðskipið draga Dettifoss til hafnar á Eskifirði. Ekki er talið að Dettifoss sé í bráðri hættu enda rekur skipið í átt frá landi.  Dettifoss var á leið frá Reykjavík til Eskifjarðar en skipið er notað til gámaflutninga milli Íslands, Færeyja og annarra Evrópulanda. Reiknað er með að varðskipið Týr þurfi að draga Dettifoss um 50 sjómílur til Eskifjarðar en ekki er vitað hvenær skipin koma þangað.  Nú sem stendur er suðvestan rok á svæðinu og mikill sjór. Dagmar Sigurðardóttir fjölmiðlaftr. Lesa meira

Fimmtudagur  27. janúar 2005. Eiríkur Kristófersson skipherra sigldi varðskipinu Óðni inn í Reykjavíkurhöfn 27. janúar 1960.  Fjöldi manns fagnaði komu þessa nýja og fullkomna skips Landhelgisgæslunnar, fánar blöktu við hún og helstu ráðamenn þjóðarinnar voru viðstaddir komu Óðins.  Síðan eru liðin 45 ár og hefur Óðni verið vel við haldið síðan. Óðinn var smíðaður í Álaborg í Danmörku og þegar skipið kom til Íslands var það talið eitt fullkomnasta björgunarskip á norðurslóðum með 2 aðalvélar og 18 sjómílna ganghraða. Halldór Nellett skipherra á varðskipinu Ægi hefur farið í gegnum skýrslur um borð í Óðni og tekið saman björgunarsögu hans frá janúar 1960 – janúar 2005.  Eftirfarandi staðreyndir koma fram í samantekt hans: Óðinn hefur 197 sinnum dregið skip til lands eða í landvar vegna bilana, veiðarfæra í skrúfu eða eldsvoða um borð og 14 sinnum hefur Óðinn dregið flutninga- og fiskiskip úr strandi.  Þá hefur áhöfn Óðins 3 sinnum bjargað áhöfnum strandaðra skipa og 2 sinnum bjargað áhöfnum sökkvandi skipa.Alloft hefur læknir verið í áhöfn Óðins en þá hefur skipið verið sent á fjölsótt mið m.a. í þeim tilgangi að veita áhöfnum fiskiskipa læknishjálp.  Árið 1968 sigldi Óðinn með flotanum á síldarmiðin norður við Svalbarða og árin 1994, 1995 og 1996 sigldi Óðinn  til aðstoðar íslenskum togurum í Barentshafi, svokallaðri Smugu.  Skipslæknirinn hafði í nógu að snúast í þessum ferðum. Ýmsar leiðir voru farnar til að koma sjúkum og slösuðum til hjálpar. Sem dæmi má nefna þegar Óðinn var sendur til Grænlands árið 1962 til að sækja sjúkling.  Um borð í skipinu var þyrla sem notuð var til að fljúga frá ísröndinni til lands að sækja sjúklinginn. Síðan sigldi Óðinn með sjúklinginn og þyrluna til Reykjavíkur. Varðandi almenn löggæslustörf má geta þess að Óðinn tók þátt í öllum þorskastríðunum.  Fyrsta stríðið hófst vegna útfærslu lögsögunnar úr 4 sjómílum í 12 sjómílur  árið 1958.  Því lauk ekki fyrr en árið 1961 en þá hafði Óðinn verið í rekstri í rúmt ár.  Næsta stríð upphófst vegna úrfærslu fiskveiðilögsögunnar í 50 sjómílur árið 1972 og lauk því í lok ársins 1973.  Síðasta þorskastríðið hófst 1975 er fiskveiðilögsagan var færð úr 50 sjómílum í 200 sjómílur og lauk í júní 1976.Hafísveturinn 1967-1968  gerðist  “landsins forni fjandi” nærgöngull og teppti siglingar til Norður- og Austurlands.  Það er til marks um ástandið á þeim tíma að á Alþingi lögðu 18 þingmenn úr öllum stjórnmálaflokkum fram þingsályktunartilllögu um að kjósa skyldi 5 manna nefnd sem gera átti ráðstafanir til að koma í veg fyrir að á verslunarstöðum í þeim landshlutum þar sem hafíshætta yrði mest, yrði skortur á brýnustu nauðsynjavörum og var þá einkum átt við kjarnfóður og olíu.  Óðinn tók mikinn þátt í að sinna þessu svo sem að brjóta flutninga- og fiskiskipum leið gegnum ísinn, aðstoðaði alls 17 skip, flutti um 55 tonn af vörum og dældi 151 tonni af olíu í land á Austfjarðahöfnum. Í febrúar 1968 geysaði fárviðri um mest allt land. Verst var veðrið á Vestfjörðum.  Þar var ofsaveður með mikilli ísingu en áhöfn Óðins var þá við gæslustörf á Ísafjarðardjúpi. Í þessu fárviðri fórust 3 skip í Djúpinu með miklum mannssköðum. Fiskiskipið Heiðrún frá Bolungarvík fórst með allri áhöfn.   Breski togarinn Ross Cleveland sökk þar einnig.  Bæði skipin fórust vegna  yfirísingar en Óðni tókst að bjarga áhöfn breska togarans Notts County sem strandaði við Snæfjallaströnd. Einn maður var látinn um borð í Notts County þegar varðskipsmönnum tókst að komast um borð.  Á Ross Cleveland fórust allir utan 1 sem komst í land á gúmbát við illan leik.  Eins og áður sagði var mikil ísing á þessum slóðum og voru mörg skip í hættu sem höfðu leitað vars í Djúpinu, aðallega breskir togarar. Áhöfninni á Óðni tókst með þrautseigju og nær stanslausum ísbarningi að halda skipinu á réttum kili.  Ein Útkallsbóka Óttars Sveinssonar segir nánar frá þessum atburðum.Óðinn hefur lítið verið gerður út undanfarið.  Skipið er þó enn í nokkuð góðu ásigkomulagi miðað við “aldur og fyrri störf” og með gilt haffærisskírteini. Hlutverk skipsins hefur verið að fylla skarð varðskipanna Týs og Ægis þegar þau fara í slipp eða endurbætur eru gerðar á þeim.  Ráðgert er að Óðinn verði gerður út a.m.k. næstu 2 sumur, í 4-5 mánuði, en þá er fyrirhugað að gera miklar endurbætur á  Tý og Ægi. Ægir verður 37 ára á árinu og Týr 30 ára.  Brýr skipanna og allar íbúðir verða endurnýjaðar, ný dráttarspil sett um borð og miklar endurbætur gerðar í vélarrúmum. Þess má geta að öll varðskipin, þ.m.t. Óðinn, eru með upprunalegar aðalvélar.Dagmar Sigurðardóttir fjölmiðlaftr. / Halldór Nellett skipherra Óðinn við komuna til landsins 27. janúar 1960. Lesa meira

Fimmtudagur 27. janúar 2005.   Löggæslumenn frá varðskipi Landhelgisgæslunnar hafa farið um borð í 13 loðnuveiðiskip til eftirlits á undanförnum dögum á loðnumiðunum austur af Reyðarfirði.Varðskip Landhelgisgæslunnar hefur verið á loðnumiðunum við eftirlit og aðstoð við norsk og íslensk loðnuveiðiskip.  Í morgun voru 24 norsk loðnuveiðiskip í íslensku efnahagslögsögunni, 12 voru á veiðisvæði, 4 á leið þangað, 6 á förum og 2 í höfn á Austurlandi. Alls hafa Norðmenn 78 þúsund tonna loðnukvóta í íslensku efnahagslögsögunni og hafa norsku skipin þegar tilkynnt um veiðar á 53 þúsund tonnum af loðnu.    Við eftirlit Landhelgisgæslunnar um borð í norsku skipunum hefur aflamagn yfirleitt verið í samræmi við tilkynningar til Landhelgisgæslunnar. Að sögn Sigurðar Steinars Ketilssonar skipherra hefur þó í sumum tilfellum þurft að gera ákveðnar leiðréttingar. Hann segir að veiði hafi verið fremur dræm undanfarið, sjór nokkuð þungur en veður ágætt.  Á næturnar er tunglbjart og það hefur slæm áhrif á veiðarnar.Norsku skipin eru á svipuðum slóðum og íslensku nótaskipin, þ.e. 50-60 sjómílur austur af Reyðarfirði.  Íslensku flottrollsskipin eru 45 sjómílum austar, þ.e. 100 sjómílur austur af Reyðarfirði. Alls eru 20 íslensk loðnuveiðiskip á miðunum samkvæmt upplýsingum úr fjareftirlitskerfi Landhelgisgæslunnar. Dagmar Sigurðardóttir fjölmiðlaftr.   Mynd/áhöfn vs Týs: Norsk og íslensk loðnuveiðiskip á miðunum austur af Reyðarfirði.   Mynd/áhöfn vs Týs: Norska loðnuveiðiskipið Torbas.     Mynd/áhöfn vs Týs: Norska loðnuveiðiskipið Haugagut. Lesa meira

Miðvikudagur 26. janúar 2004. Þyrla Landhelgisgæslunnar sótti slasaðan sjómann um borð í togarann Gideon síðdegis í dag.Skipstjórinn á Gideon, sem er íslenskur, hringdi í stjórnstöð Landhelgisgæslunnar kl. 14:29 og tilkynnti að einn skipverjanna, litháenskur maður, hefði slasast og óskaði eftir að hann yrði sóttur með þyrlu og fluttur á sjúkrahús. Gideon var staddur 135 sjómílur austsuðaustur af Vestmannaeyjum er beiðni um aðstoð barst og var skipstjórinn beðinn að sigla til móts við þyrluna.  Áhöfn þyrlu Landhelgisgæslunnar, TF-LIF, var þegar kölluð út og fór hún í loftið kl. 14:57.  Komið var að skipinu kl. 16:45 og fóru læknir og stýrimaður úr áhöfn þyrlunnar um borð í Gideon og undirbjuggu skipverjann undir flutning.  Hífing gekk vel og var henni lokið kl. 17. Þyrlan kom til Vestmannaeyja um kl. 18 og tók eldsneyti og lenti síðan við Landspítala Háskólasjúkrahús í Fossvogi kl. 19:05.Dagmar Sigurðardóttir fjölmiðlaftr. Lesa meira

Mánudagur 24. janúar 2005.Tveir starfsmenn sprengjudeildar Landhelgisgæslunnar sóttu námskeið í sprengjueyðingu hjá danska landhernum seint á síðasta ári. Námskeiðin voru haldin í Skive á Jótlandi. Þar voru þeir þjálfaðir í sprengjueyðingu samkvæmt stöðlum sem notaðir eru hjá Atlantshafsbandalaginu.  Nýlega bárust prófskírteinin frá danska landhernum og sá Georg Kr. Lárusson forstjóri um að afhenda þau sprengjusérfræðingunum Jónasi Þorvaldssyni og Ágústi Magnússyni.Dagmar Sigurðardóttirfjölmiðlaftr. Mynd DS: Georg forstjóri afhendir Jónasi Þorvaldssyni prófskírteinin frá danska landhernum. Mynd DS: Georg forstjóri afhendir Ágústi prófskírteinin frá danska landhernum. Mynd: Jónas og Ágúst að vinna við 250 kg. flugvélasprengjur á námskeiðinu í Skive. Lesa meira

Þriðjudagur 18. janúar 2005. Komið hefur í ljós að útreikningar á sjávarfallatöflum fyrir Djúpavog eru rangir í Sjáfarfallatöflum 2005. Réttar töflur er hægt að nálgast hér.Í tilkynningu frá Sjómælingum Íslands er beðist velvirðingar á þessum mistökum. Lesa meira

Mánudagur 17. janúar 2005. Þyrla Landhelgisgæslunnar, TF-LIF, sótti hjartveikan mann til Stykkishólms í dag og flutti hann til Reykjavíkur. Neyðarlínan hringdi í stjórnstöð Landhelgisgæslunnar kl. 12:48 og gaf samband við lækni í Stykkishólmi en hann var með hjartveikan sjúkling sem þurfti nauðsynlega að komast á sjúkrahús í Reykjavík. Í framhaldi af því, kl. 12:54, var áhöfn TF-LIF kölluð út og í samráði við lækni í áhöfn þyrlunnar var ákveðið að sækja sjúklinginn. TF-LIF fór í loftið kl. 13:26.  Bjart veður var í Stykkishólmi og gekk flugið vel.  Þyrlan lenti á flugvellinum þar kl. 13:57.  Læknir og stýrimaður úr áhöfninni fóru á sjúkrahúsið á staðnum til að aðstoða við að undirbúa sjúkling fyrir flutning og fór þyrlan aftur í loftið frá Stykkishólmi kl. 14:37.  TF-LIF lenti við flugskýli Landhelgisgæslunnar á Reykjavíkurflugvelli kl. 15:17 en þar beið sjúkrabíll og neyðarbíll Slökkviliðs höfuðborgarsvæðisins eftir sjúklingnum.  Hann var fluttur á Landspítala Háskólasjúkrahús við Hringbraut. Dagmar Sigurðardóttirfjölmiðlaftr.     Lesa meira

Mánudagur 17. janúar 2005. Í dag var lokið við að setja upp nýjan ratsjárbúnað og sjálfvirkan auðkenningarbúnað (AIS) um borð í varðskipinu Tý.  Um er að ræða tvær ratsjár af gerðinni Sperry (S og X – band ).  Auk þess að nýtast sem siglingatæki fyrir varðskipið eru ratsjárnar búnar sérstökum eiginleikum sem hannaðir hafa verið fyrir sjóheri m.a. til að fylgjast með flugvélum og  til að leiðbeina þyrlum til lendingar.  Búnaður þessi hefur það fram yfir eldri ratsjárbúnað varðskipsins að hann getur tengst svokölluðu IBS-kerfi sem tengir öll stjórn- og siglingatæki skipsins þannig að þau mynda eina heild.  IBS-kerfi verður sett í varðskipin á næstu tveimur árum.  Ratsjárbúnaðurinn var keyptur af fyrirtækinu Radiomiðun í kjölfar útboðs á vegum Ríkiskaupa og verður samskonar búnaður settur í varðskipið Ægi á næstu dögum.Sjálfvirki auðkenningarbúnaðurinn (AIS-system) tekur við upplýsingum um staðsetningu skipa, sem sendar eru sjálfvirkt frá þeim, og öðrum upplýsingum um skipin og birtir á ratsjárskjá og í siglingatölvu.  Búnaðurinn gerir kleyft að þekkja skip sem eru með samskonar búnað úr mikilli fjarlægð.  Meðal annars koma fram upplýsingar um stærð skips, hraða þess, hættulegan farm, ef um slíkt er að ræða, og ákvörðunarstað.  Upphaflega var slíkur búnaður hannaður fyrir skip sem öryggistæki, t.d. til að koma í veg fyrir árekstur þegar skip voru að mætast á þröngum siglingaleiðum, en nú er hann notaður í fjölþættari tilgangi.  M.a. hafa verið settar upp landstöðvar til að fylgjast með skipunum.  Vegna eftirlits- og björgunarstarfa Landhelgisgæslunnar eru kostir slíks tækis ótvíræðir.Dagmar Sigurðardóttirfjölmiðlaftr. Mynd LHG/DS:  Sigurður Steinar Ketilsson skipherra á varðskipinu Tý að prófa nýja ratsjárbúnaðinn en hjá honum standa Gylfi Geirsson forstöðumaður fjarskipta- og upplýsingatæknisviðs Landhelgisgæslunnar og Jóhann Bjarnason framkvæmdastjóri Radíómiðunar. Mynd LHG/DS: Sigurður Steinar Ketilsson skipherra við stjórntæki skipsins í brúnni ásamt stýrimönnunum Guðmundi R. Jónssyni og Pálma Jónssyni. Lesa meira

Laugardagur 15. janúar 2005. Neyðarlínan hafði samband við Landhelgisgæsluna kl. 15:31 og óskaði eftir þyrlu í viðbragðsstöðu vegna manns sem hafði slasast við fall í Esjunni.  Áhöfn TF-LIF var þegar kölluð út. Talið var að maðurinn hefði fallið um 30 metra niður hlíðina.  Að sögn starfsmanna Slökkviliðs höfuðborgarsvæðisins sem voru á staðnum var talið að maðurinn væri með höfuð- og hnémeiðsli og eymsli í baki.  Kl. 15:50 var óskað eftir þyrlu á staðinn og fór TF-LIF í loftið kl. 16:06.  Hún var komin á slysstað kl. 16:12 og fór sigmaður niður að koma sjúklingi fyrir á börum fyrir flutninginn ásamt starfsmönnum Slökkviliðs höfuðborgarsvæðisins.  Búið var að hífa sjúklinginn og sigmanninn upp í þyrluna kl. 16:41 og var þá haldið til Landspítala Háskólasjúkrahúss í Fossvogi þar sem þyrlan lenti um kl. 16:50. Dagmar Sigurðardóttirfjölmiðlaftr.     Lesa meira

Þriðjudagur 12. janúar 2005.   Björgunarstjórnstöðin í Grönnedal á Grænlandi hafði samband við stjórnstöð Landhelgisgæslunnar um hádegisbilið og tilkynnti að skipverji á færeyska rækjutogaranum Sólborgu TN-245 hefði slasast er hann fékk stóran spilkrók í höfuðið og missti við það meðvitund.  Skipið var þá statt um 250 sjómílur vestnorðvestur af Íslandi inni í grænlenskri lögsögu. Svæðið kallast Dohrn-banki og er innan björgunarsvæðis Landhelgisgæslunnar.   Danska eftirlitsskipið Triton var þá statt vestur af landinu.  Skömmu eftir að tilkynning um slysið barst hafði björgunarstjórnstöðin í Grönnedal aftur samband og lét vita að þyrlan frá Triton myndi sækja sjómanninn.  Þyrlan hélt af stað um kl. 16 og er áætlað að hún lendi í Reykjavík um kl. 19.  Talið er að sjómaðurinn sé höfuðkúpubrotinn. Upphaflega bárust upplýsingar um slysið frá björgunarstjórnstöðinni í Þórshöfn í Færeyjum til björgunarstjórnstöðvarinnar í Grönnedal á Grænlandi sem hafði samband við björgunarstjórnstöð Landhelgisgæslunnar. Mjög gott samstarf er á milli þessara björgunarstjórnstöðva.  Í gildi er samstarfssamningur milli Landhelgisgæslunnar og danska sjóhersins, m.a. á sviði björgunarmála, og skýrir það hvers vegna þyrlan frá Triton sá um sjúkraflugið í dag.   Dagmar Sigurðardóttir fjölmiðlaftr. Lesa meira

Þriðjudagur 11. janúar 2005.   Meðfylgjandi mynd var tekin er Georg Kr. Lárusson forstjóri Landhelgisgæslunnar fór í sína fyrstu heimsókn um borð í varðskip eftir að hann tók við embættinu á nýársdag. Á myndinni er Georg að heilsa upp á áhöfn varðskipsins Týs í fylgd skipherrans, Sigurðar Steinars Ketilssonar.Mynd LHG/Ragnar M. Georgsson fulltrúi í tæknideild. Georg var áður forstjóri Útlendingastofnunar og hefur m.a. verið varalögreglustjóri og settur lögreglustjóri í Reykjavík, sýslumaður í Vestmannaeyjum, skrifstofustjóri Héraðsdóms Reykjavíkur og borgardómari í Borgardómi Reykjavíkur.  Hann hefur setið í fjölmörgum starfshópum og nefndum á vegum dómsmálaráðuneytis, fjármálaráðuneytis og ríkislögreglustjóra um lögreglumálefni, réttarfar, innheimtumál ríkisins ásamt samningu lagafrumvarpa og reglugerða um þau mál.  Mynd: Jón Páll Ásgeirsson yfirstýrimaður á varðskipinu Ægi. Georg fór einnig í heimsókn um borð í varðskipið Ægi milli jóla og nýárs ásamt Hafsteini Hafsteinssyni þáverandi forstjóra Landhelgisgæslunnar. Með þeim á myndinni er Halldór Nellett skipherra á varðskipinu Ægi.   Dagmar Sigurðardóttir fjölmiðlaftr.     Lesa meira

Mánudagur 10. janúar 2005.   Flugstjórn hafði samband við stjórnstöð Landhelgisgæslunnar kl. 20:50 og tilkynnti að eins hreyfils flugvél með einum manni um borð hafi sent út neyðarkall.  Flugvélin var þá stödd 105 sjómilur vestur af Keflavík.  Þyrluáhöfn Landhelgisgæslunnar var þegar kölluð út.  Einnig var óskað eftir aðstoð Varnarliðsins en þaðan voru sendar tvær þyrlur og þyrla danska eftirlitsskipsins Tritons, sem nú er statt í Reykjavíkurhöfn, var einnig sett í viðbragðsstöðu.  Þá sendi Flugmálastjórn flugvél sína, TF-FMS, strax af stað og Loftskeytastöðin í Reykjavík var einnig beðin um að kalla út til skipa á svæðinu að fylgjast með og vera í viðbragðsstöðu.  Þegar flugvélin var komin niður í 6000 fet um kl. 21:20 virtust töluverðar líkur á að hún gæti haldið þeirri hæð áfram. Náði hún að fljúga til Keflavíkurflugvallar í fylgd flugvélar Flugmálastjórnar og þyrlanna þar sem hún lenti heilu og höldnu kl. 21:50.  Vitað er að flugvélin lenti í erfiðleikum vegna ísingar.Dagmar Sigurðardóttir fjölmiðlaftr. Lesa meira