Fréttir

Fimmtudagur 31. mars 2005.  Fjölþjóðleg æfing sprengjueyðingarsveita, Northern Challenge, verður haldin hér á landi í ágúst og er þetta er í fjórða sinn sem Landhelgisgæslan heldur slíka æfingu.  Þáttakendafjöldi hefur aukist ár frá ári.  Landhelgisgæslan skipuleggur og stjórnar æfingunni í samstarfi við Varnarliðið og lögregluna á Keflavíkurflugvelli.  A.m.k. 70 sprengjusérfræðingar frá 7 löndum hafa tilkynnt þátttöku en þar af er hópur frá Svíþjóð sem nú tekur í fyrsta sinn þátt í æfingunni.  Hún verður haldin á Keflavíkursvæðinu.Æfingarnar fara bæði fram á landi og sjó og snúast um varnir gegn hryðjuverkum.  Hóparnir starfa í fjóra daga undir sameiginlegri stjórn sem skipuð er fulltrúum frá nokkrum þátttökuþjóðum og er starfað samkvæmt reglum Atlantshafsbandalagsins (NATO). Meðal annars verða helstu tækninýjunar á sviði sprengjueyðingar notaðar, þ.m.t. vélmenni.   Dagmar Sigurðardóttirfjölmiðlaftr.   Frá Northern Challenge 2004. Lesa meira

Mánudagur 28. mars 2005.   Þyrla Landhelgisgæslunnar, TF-SIF, sótti mann til Rifs í dag og flutti til Reykjavíkur.   Læknir á Ólafsvík hafði samband og óskaði eftir aðstoð vegna manns sem hafði fengið höfuðverka.  Áhöfn TF-SIF var kölluð út kl. 15:34 og fór þyrlan í loftið kl. 15:56.  TF-SIF lenti aftur á Reykjavíkurflugvelli með hinn slasaða innanborðs kl. 17:15.  Þar beið sjúkrabifreið sem flutti hann á Landspítala Háskólasjúkrahús.   Dagmar Sigurðardóttir fjölmiðlaftr.   Lesa meira

Laugardagur 26. mars 2005.   Neyðarlínan hafði samband við stjórnstöð Landhelgisgæslunnar kl. 17:15 og tilkynnti að maður hefði orðið undir beltabíl við Gufuskála á Snæfellsnesi. Talið var að maðurinn væri hryggbrotinn.   Áhöfn þyrlu Landhelgisgæslunnar, TF-LIF, var þegar kölluð með bráðaútkalli og fór hún frá Reykjavíkurflugvelli kl. 17:38.  Stjórnstöð Landhelgisgæslunnar var í sambandi við lögregluna á Ólafsvík.  Á staðnum var hægviðri, alskýjað og lágskýjað og kom TF-LIF á vettvang kl. 18:10.  Þyrlan lenti með hinn slasaða við Landspítala Háskólasjúkrahús kl. 19.Dagmar Sigurðardóttir fjölmiðlaftr. Lesa meira

Miðvikudagur 23. mars 2005. TF-SYN, flugvél Landhelgisgæslunnar, fór í eftirlitsflug yfir karfamiðin á Reykjaneshrygg í dag.  Tvö erlend skip voru þar að veiðum.  Að sögn Páls Geirdal yfirstýrimanns í áhöfn TF-SYN er annað skipið frá Litháen og hitt frá Portúgal.Erlendu karfaskipin eru eins og vorboðinn og koma ávallt á svipuðum tíma á miðin.  Búast má við að þeim fjölgi talsvert á næstunni. Dagmar Sigurðardóttirfjölmiðlaftr.Mynd LHG: Skipið Radvila frá Litháen.   Lesa meira

Miðvikudagur  23. mars 2005.   Áhöfn TF-SIF fór í eftirlitsferð um Hornstrandir um helgina til að kanna ástand björgunar- og neyðarskýla á svæðinu.  Með í för voru tveir björgunarsveitarmenn frá Slysavarnarfélaginu Landsbjörg og forstjóri Landhelgisgæslunnar sem er að kynna sér fjölbreytta starfsemi stofnunarinnar.  Venjulega sjá áhafnir varðskipanna um þetta eftirlit en nú var ekki hægt að komast að björgunarskýlunum frá sjó vegna íss.  Eftirlitið felst í að yfirfara ástand skýlanna og kanna hvort talstöðvarnar í þeim eru í lagi.   TF-SIF fór frá Reykjavíkurflugvelli kl. 10 á sunnudaginn. Næsti áfangastaður var Ísafjörður þar sem tekið var eldsneyti.  Þaðan var flogið til Aðalvíkur og lent á varðskipinu Ægi sem lá þar fyrir akkeri.  Áhöfnin snæddi hádegismat um borð í varðskipinu og síðan var haldið í Hrafnsfjörð, Furufjörð og Barðsvík.  Ástand björgunarskýla þar var kannað og talstöðvar prófaðar.  Eftir millilendingu um borð í Ægi var haldið til Hornvíkur, Hlöðuvíkur og Fljótavíkur til að athuga með neyðarskýlin þar.   Enn var komið við í varðskipinu Ægi og gengið frá búnaði þyrlunnar.  Þaðan var haldið um fimmleytið og eftir millilendingu á Ísafirði til eldsneytistöku var þyrlunni flogið til Reykjavíkur þar sem hún lenti kl. 19.   Dagmar Sigurðardóttirfjölmiðlaftr.   Mynd / Björn Brekkan flugrekstrarstjóri:  Georg Kr. Lárusson forstjóri og Benóný Ásgrímsson yfirflugstjóri fóru í smá siglingu á litlum ísjökum í Barðsvík.    Mynd / Björn Brekkan flugrekstrarstjóri: TF-SIF við neyðarskýlið í Furufirði. Mynd / Björn Brekkan Björnsson flugrekstrarstjóri: Furufjörður fullur af ís.   Mynd / Jón Páll Ásgeirsson stýrimaður: Óskar Ármann Skúlason bátsmaður, Ásmundur Pétursson háseti, Jóhannes F. Ægisson háseti og Jóhann Örn Sigurjónsson háseti bíða á dekkinu á Ægi eftir komu TF-SIF.   Mynd / Jón Páll Ásgeirsson stýrimaður:  TF-SIF að lenda á dekkinu á Ægi í Aðalvík.   Mynd / Jón Páll Ásgeirsson stýrimaður.   Mynd / Jón Páll Ásgeirsson stýrimaður:  Benóný Ásgrímsson yfirflugstjóri með fínu húfuna sína. Leyndarmál sem venjulega er geymt undir þyrluhjálminum.Mynd / Jón Páll Ásgeirsson stýrimaður: Halldór Gunnlaugsson skipherra á Ægi og Georg Kr. Lárusson forstjóri meta stöðuna um borð í Ægi í Aðalvík.             Lesa meira

Þriðjudagur 22. mars 2005.   Dagana 7.-16. mars síðastliðinn fór Georg Kr. Lárusson forstjóri Landhelgisgæslunnar ásamt Ásgrími L. Ásgrímssyni deildarstjóra í kynningarheimsókn til bandarísku Strandgæslunnar (USCG).  Það var bandaríska sendiráðið á Íslandi sem bauðst upphaflega til að hafa milligöngu um þessa heimsókn sem síðar var skipulögð með aðstoð bandaríska utanríkisráðuneytisins og starfsfólki í höfuðstöðvum Strandgæslunnar.   Til að byrja með voru höfuðstöðvar fyrsta umdæmis bandarísku Strandgæslunnar heimsóttar en þær eru í Boston.  Margt er líkt með verkefnum Strandgæslunnar í þessu umdæmi og verkefnum Landhelgisgæslunnar og var það megin ástæða þess að þangað var haldið til að byrja með.  Ein helstu fiskimið Bandaríkjanna eru úti fyrir ströndum Nýja Englands og því er Strandgæslan í þessu umdæmi ábyrg fyrir fiskveiðieftirliti og þjónustu við fiskiskipaflotann rétt eins og Landhelgisgæslan.   Landhelgisgæslumönnum var boðið að sitja á aðgerðarfundi hjá Strandgæslunni þar sem deildarstjórar skýrðu yfirmanni umdæmisins, David Pekoske aðmíráli, frá verkefnum gærdagsins og fyrirhuguðum verkefnum næsta sólarhrings.  Ýmsar deildir strandgæslunnar voru heimsóttar og þær kynntar, þ.á.m. deildir sem fara með leitar- og björgunarmálefni, löggæsluverkefni og  öryggismál.  Einnig var stjórnstöð umdæmisins skoðuð.  Seinna þennan dag var flotastöð Strandgæslunnar í Boston skoðuð en þaðan eru gerð út nokkur stór varðskip,varðbátar, vitaþjónustuskip og hafnareftirlitsbátar.  Deginum lauk síðan með eftirlitsferð um höfnina í Boston með einum af eftirlitsbátum Strandgæslunnar.    Á öðrum degi heimsóknarinnar var ferðast niður til Cape Cod þar sem ein af björgunarstöðvum Strandgæslunnar var skoðuð.  Þessi stöð þjónar sunnanverðum Cape Cod flóa og státar af nokkrum smærri björgunar- og eftirlitsbátum sem voru skoðaðir við þetta tækifæri.  Seinna þennan dag var flotastöð Strandgæslunnar í Wood Hole skoðuð, þ.á.m. stjórnstöð og skipaviðgerðarþjónusta.  Frá stöðinni eru gerð út nokkur minni varskip, vitaþjónustuskip og eftirlitsbátar.  Stöðin er einnig stjórnstöð aðgerða Strandgæslunnar frá Cape Cod og að Long Island í New York fylki en á þessum slóðum eru margar björgunarstöðvar og varðskip gerð út.    Frá Woods Hole var haldið að flugbjörgunarstöð Strandgæslunnar á Cape Cod og áður en ferðalangarnir vissu voru þeir komnir um borð í H-60 Jayhawk björgunarþyrlu sem flutti þá um borð í varðskipið Campell sem var við eftirlitstörf undan Nýja Englandi.  Um borð í Campell var dvalið í sólarhring og fylgst með fiskveiðieftirliti skipsins og fl.  Þyrla sótti Landhelgisgæslumennina aftur um borð og næsta verkefni var að fræðast um starfsemi flugbjörgunarstöðvarinnar en þaðan eru gerðar út 4 þyrlur og 4 Falcon eftirlitsflugvélar.  Í stöðinni er einnig fiskveiðieftirlitsskóli sem var skoðaður.  Að kvöldi var flogið með Falcon eftirlitsvél til New London í Connecticut þar sem liðsforingjaskóli Strandgæslunnar er en þaðan útskrifaðist Ásgrímur árið 1987 eftir 4 ára nám.    Á föstudegi var liðsforingjaskólinn skoðaður en þar eru að jafnaði um 800-900 nemendur.   Auk þess var björgunarstöðin í New London skoðuð en þaðan er einn af 47 feta björgunarbátum Strandgæslunnar gerður út en þessir bátar eru meðal nýjustu og fullkomnustu tækjum stofnunarinnar.  Ferðast var til Washington DC að því búnu og helgin notuð til að hvílast.    Á mánudegi heimsóttu Landhelgisgæslumenn höfuðstöðvar bandarísku Strandgæslunnar og við það tækifæri var heilsað upp á Tomas Collsins aðmírál, yfirmann Strandgæslunnar.  Eftir gott spjall við aðmírálinn fékk hann skjöld Landhelgisgæslunnar að gjöf.  Deildarstjórar kynntu starfsemi sinna deilda og framtíðarsýn Strandgæslunnar, þar á meðal varðandi endurnýjun flugflota Strandgæslunnar.  Rætt var um fyrirhuguð kaup Strandgæslunnar á 30-35 CASA eftirlitsvélum og útskýrt hvers vegna þessi flugvél var valin fremur en aðrar flugvélategundir.   Sendiherra Íslands í Bandaríkjunum sýndi ferðalöngunum þann heiður að bjóða þeim til kvöldverðar á mánudagskvöldi en síðan var farið í fylgd fulltrúa í sendiráðinu í heimsókn í varnarmálaráðuneytið í Pentagon-byggingunni á þriðjudag.  Rætt var við fulltrúa í ráðuneytinu um flugvéla- og skipakost Landhelgisgæslunar og fyrirsjánlega þátttöku stofnunarinnar í eftirliti á hafsvæðinu umhverfis Ísland.  Að því búnu var ferðast samfellt frá Washington DC til Baltimore, þaðan til Boston og að lokum til Íslands.  Það voru því þreyttir en reynslunni ríkari Landhelgisgæslumenn sem lentu í Keflavík að morgni miðvikudagsins 16. mars.   Við eitt af varðskipunum sem gerð eru út frá flotastöðinni í Woods Hole.   Yfirmaður stöðvarinnar, Capt. Judith Keene, Georg og Ásgrímur.   Ásgrímur og Georg klárir í þyrluflug út í varðskipið Campbell.   Varðskipið Campbell á siglingu. Skipið er 270 fet.   Georg skoðar Falcon eftirlitsflugvél ásamt yfirmanni flugstöðvarinnar á Cape Cod, Captain David Brimblecom. Georg og Tomas Collins aðmíráll, yfirmaður bandarísku Strandgæslunnar í höfuðstöðvum hennar í Washington DC.  Aðmírállinn heldur á áletruðum skildi með merki Landhelgisgæslunnar.   Lesa meira

Þriðjudagur 22. mars 2005.Tilkynning barst frá lögreglunni á Þórshöfn í gær um að tundurdufl hefði fundist á Langanesi.  Sprengjusérfræðingar Landhelgisgæslunnar fóru norður í morgun og voru rétt fyrir kvöldmatarleytið að sprengja tundurduflið til að eyða því.  Er sprengjusérfræðingarnir höfðu verið á staðnum um tíma fundu þeir tvö tundurdufl til viðbótar og eru að eyða þeim nú kl.19. Meðfylgjandi mynd tók lögreglan á Þórshöfn.Dagmar Sigurðardóttir fjölmiðlaftr. Lesa meira

Mánudagur 21. mars Gylfi Geirsson forstöðumaður fjarskipta- og upplýsingatæknisviðs Landhelgisgæslunnar, hélt nýlega fyrirlestra um notkun íslenskra stjórnvalda á fjareftirlitskerfi til fiskveiðieftirlits á fundi fiskimálanefndar Matvæla- og landbúnaðarstofnunar Sameinuðu þjóðanna (FAO) í Róm. Gylfi tók þátt í ráðstefnunni á vegum sjávarútvegsráðuneytisins. Meðan á fundi FAO stóð var sýnd kynning um íslenska fjareftirlitskerfið á tölvuskjám þar sem fundirnir fóru fram.  Gylfi fór sérstaklega yfir skjávarpakynningu á kerfinu með mörgum ráðstefnugestum og svaraði spurningum þeirra. Þáttaka Gylfa á ráðstefnunni var skipulögð af sjávarútvegsráðuneytinu.Sá misskilningur hefur víða heyrst að fjareftirlitskerfi komi í stað hefðbundins eftirlits með varðskipum.  Því fer fjarri en fjareftirlitskerfið styður annað eftirlit Landhelgisgæslunnar og gerir það markvissara. Fjareftirlitskerfið kemur ekki í stað hefðbundinna skoðana löggæslumanna á varðskipunum á afla, veiðarfærum, búnaði og atvinnuréttindum skipsáhafna.  Fjareftirlitið veitir eingöngu upplýsingar um staðsetningu skipa og er lítils virði ef ekkert varðskip er á svæðinu til að færa brotlegt skip til hafnar eða hefja aðrar aðgerðir til að koma í veg fyrir lögbrot.  Að auki eru varðskipin björgunarskip og mengunareftirlitsskip og gegna fjölmörgum öðrum hlutverkum sem fjareftirlitskerfi kemur ekki í staðinn fyrir. Dagmar Sigurðardóttirfjölmiðlaftr. Gylfi kynnir kerfið fyrir sænskum fulltrúa á ráðstefnu FAO.     Lesa meira

Mánudagur 21. mars 2005.Áhöfn TF-LIF fann um kvöldmatarleytið þrjá ferðalanga á hálendinu sem leitað hafði verið að síðan um hádegið.  Þeirra hafði verið saknað síðan í gærkvöldi.   Björgunarmiðstöðin í Skógarhlíð hafði samband um hádegið og tilkynnti að björgunarsveitir væru að hefja leit að tveimur jeppum sem fóru frá Dalvík á hádegi í gær.  Fyrirliggjandi upplýsingar um ferðalanga voru að um væri að ræða fólk undir tvítugu sem hefði farið á gömlum bílum um Kaldadal og Kjöl og hefðu ætlað að vera komin til Keflavíkur í gærkvöldi.  Þau væru með farsíma og talstöðvar en ekki hefði náðst samband við þau.  Fyrirhugað var fara um Kjöl, Langjökul og Kaldadal til leitar.  Óskað var eftir að þyrla Landhelgisgæslunnar tæki þátt í leitinni.   TF-LIF fór í loftið kl. 12:33 og flaug yfir leitarsvæðið en ekki sást til jeppanna.  Þyrlan lenti síðan á Akureyri um fimmleytið til að taka eldsneyti.  Þaðan fór hún aftur kl. 17:45 og var komin á leitarsvæðið kl. 18:15.   Áhöfn TF-LIF kom auga annan bílinn um kl. 18:50 en hann var mannlaus.  Þyrlan fylgdi slóð sem lá frá bílnum og fann hinn bílinn suðaustur af Bláfelli kl. 19:35 og þar voru ferðalangarnir heilir á húfi, tveir strákar og ein stelpa.   TF-LIF lenti með ungmennin þrjú innanborðs á Reykjavíkurflugvelli kl. 21:10 um kvöldið.   Dagmar Sigurðardóttir fjölmiðlaftr. Mynd: Áhöfn TF-LIF. Annar jeppinn sem ungmennin voru á. Lesa meira

Föstudagur 18. mars 2005. Flaggskip Landhelgisgæslunnar, varðskipið Týr, er 30 ára um þessar mundir og halda starfsmenn Landhelgisgæslunnar upp á afmæli skipsins í dag. Sigurður Steinar Ketilsson skipherra segir skipið vera happaskip og það hafi reynst vel allan þennan tíma. Hann segir það hafa fylgt skipinu frá því það var tekið í notkun að þar er valinn maður í hverju rúmi og mannskapurinn alveg til fyrirmyndar. Margir í áhöfn skipsins hafa verið lengi við störf hjá Landhelgisgæslunni. Pétur Sigurðsson forstjóri skrifaði undir smíðasamning skipsins í desember 1973 og var því hleypt af stokkunum í október 1974.  Dóra Guðbjartsdóttir eiginkona Ólafs Jóhannessonar dómsmálaráðherra gaf skipinu nafnið Týr við það tækifæri. Skipið fór í reynslusiglingu 8. mars 1975 undir dönskum fána en var formlega afhent Landhelgisgæslunni 14. mars 1975.  Pétur Sigurðsson forstjóri Landhelgisgæslunnar tók á móti skipinu og var þá íslenski fáninn dreginn að húni.  Skipið kom síðan til Reykjavíkur í fyrsta sinn 24. mars 1974 og lagðist þar að bryggju við Ingólfsgarð kl. 16:37 eins og fram kemur í bókum skipsins.  Týr fór í sína fyrstu ferð til björgunar- og landhelgisgæslustarfa frá Reykjavík 29. mars 1975 undir stjórn Guðmundar Kærnested skipherra. Dagmar Sigurðardóttir fjölmiðlaftr. Mynd: Jón Kr. Friðgeirsson bryti.

Lesa meira

Miðvikudagur 16. mars 2005. Í ískönnunarflugi Landhelgisgæslunnar í dag kom í ljós að siglingaleiðin fyrir Horn er lokuð.  Sjá meðfylgjandi myndir sem Auðunn F. Kristinsson yfirstýrimaður í flugdeild Landhelgisgæslunnar tók úr TF-SYN við norðanverðar Hornstrandir (Drangaskörð, Geirólfsnúp og Hornbjarg). Skýrsla áhafnar TF-SYN um ískönnunarflugið er birt á heimasíðu Veðurstofu Íslands á slóðinni:http://www.vedur.is/hafis/gaeslan/lhg/skyrsl_nyjast.htmlSjá einnig ískort Landhelgisgæslunnar sem er birt á heimasíðu Veðurstofu Íslands á slóðinni:http://www.vedur.is/hafis/gaeslan/lhg/lhg_nyjast.gifDagmar Sigurðardóttir fjölmiðlaftr.   Lesa meira

Þriðjudagur 15. mars 2005.Ríkiskaup sáu eins og kunnugt er um útboð á endurbótum og breytingum á varðskipunum Ægi og Tý.  Fulltrúar Landhelgisgæslunnar, Gylfi Geirsson forstöðumaður upplýsingatækni- og fjarskiptasviðs og Ingvar Kristjánsson forstöðumaður varðskipatæknisviðs, tóku þátt í vinnu við gerð tæknilýsingarhluta útboðsgagna sem fyrirtækið Útgerðartækni bar ábyrgð á.  Aðkoma fulltrúa Landhelgisgæslunnar að útboðsferlinu var því eingöngu tæknilegs eðlis.  Útboðsgögnin voru að öðru leyti unnin af Ríkiskaupum.   Við gerð útboðsgagnanna var talið nauðsynlegt að horfa til þess hvort bjóðendur uppfylltu lágmarks gæðakröfur bæði vegna umfangs verksins og hversu flókið það er.  Var tekið mið af því hvort bjóðendur uppfylla alþjóðlegan gæðastaðal, ISO 9001, sem er reyndar eini staðallinn sem hægt er að notast við.   Að auki var horft til þess hvort bjóðendur hafa reynslu af sambærilegum verkefnum.  Til að útiloka ekki íslensku skipasmíðastöðvarnar var ISO vottun og reynsla metin til stiga í svokölluðu valmódeli en ekki gerð að skilyrði, en ósk um vottun er eðlileg varúðarráðstöfun í alþjóðlegum útboðum af þessu tagi.   Valmódelið, sem ræður stigagjöf fyrirtækjanna sem buðu í verkið, var byggt upp þannig að verð gaf 70% stiga, ISO vottun 20% og reynsla 10%.  Fulltrúar Ríkiskaupa tjáðu fulltrúum Landhelgisgæslunnar að þeir hefðu borið valmódelið undir framkvæmdaráð útboðsmála sem hefði ekki gert athugasemdir við það.  Valmódelið var einnig kynnt rækilega í útboðsgögnum og er Landhelgisgæslunni ekki kunnugt um að bjóðendur hafi gert athugasemdir við það.   Áðurnefndir fulltrúar Landhelgisgæslunnar voru viðstaddir opnun tilboða hjá Ríkiskaupum og yfirfóru þau í samvinnu við Ríkiskaup.  Samkvæmt valmódelinu varð pólska fyrirtækið Morska hlutskarpast með 70 stig fyrir verð, 20 stig fyrir ISO vottun og 7 stig fyrir reynslu eða samtals 97 stig.  Næst kom pólska skipasmíðastöðin Nauta með 60 stig fyrir verð, 20 stig fyrir ISO vottun og 5 stig fyrir reynslu eða samtals 85 stig.  Þriðja í röðinni var tilboð Slippstöðvarinnar á Akureyri með 68 stig fyrir verð, 0 stig fyrir ISO vottun og 7 stig fyrir reynslu, samtals 75 stig.    Fulltrúar Landhelgisgæslunnar tóku þátt í skýringarviðræðum við skipasmíðastöðina Morska sem var með hagstæðasta tilboðið samkvæmt valmódelinu en Ríkiskaup stýrðu þeim viðræðum.  Eftir skýringaviðræður við Morska sem fram fóru þann 9. febrúar s.l. ákváðu Ríkiskaup að hafna öllum tilboðum vegna þess hve miklu munaði á þeim og kostnaðaráætlun Landhelgisgæslunnar.  Í framhaldi af því ákváðu Ríkiskaup að hefja svonefnt samningskaupaferli þar sem öllum bjóðendum sem áður höfðu sent inn gild tilboð var gefinn kostur á að senda inn endurskoðuð verðtilboð.  Einungis þrír bjóðendur sendu inn tilboð og voru þau opnuð 7. mars sl.  Pólska skipasmíðastöðin Morska og hollenska skipasmíðastöðin Reimerswaal höfðu lækkað sín tilboð en tilboðið frá Slippstöðinni var óbreytt.  Hagstæðasta tilboðið var eftir sem áður var frá Morska.  Þar næst kom tilboð Slippstöðvarinnar og Reimerswaal var í þriðja sæti.   Landhelgisgæslan er ekki í aðstöðu til að taka sjálfstæðar ákvarðanir um við hvern er rætt eða samið.  Einungis er fylgt lögum, reglum og ráðleggingum Ríkiskaupa sem snerust um að fylgja útboðsreglum og að taka hagkvæmasta tilboði samkvæmt valmódeli.   Landhelgisgæslan er jákvæð gagnvart íslenskum skipasmíðastöðvum og telur augljóst hagræði af því að vinna svo stór verkefni innanlands.  Stofnunin er hins vegar skyldug, lögum samkvæmt, að skipta við Ríkiskaup og bjóða svo stór verk út á evrópska efnahagssvæðinu.  Þetta fyrirkomulag setur Landhelgisgæslunni skorður við val á samningsaðila.  Að öðru leyti vísast til skýringa Ríkiskaupa varðandi útboðs- og samningsferlið.Georg Kr. Lárussonforstjóri. Lesa meira

Mánudagur 14. mars 2005. Skipstjórinn á togskipinu Björgvin EA-311 hafði samband við stjórnstöð Landhelgisgæslunnar kl. 12:48 og óskaði eftir leiðbeiningum læknis þar sem einn skipverjanna hafði slasast á hendi. Skipið var þá statt á Meðallandsbug, 33 sjómílur suðsuðvestur af Ingólfshöfða. Læknir í þyrluáhöfn Landhelgisgæslunnar hafði samband við skipstjórann til að fá upplýsingar um ástand mannsins og gefa ráðleggingar um umönnun hans. Var áhöfn TF-SIF kölluð út í framhaldi af því.  Þyrlan fór í loftið kl. 13:34 og var óskað eftir að skipið sigldi til móts við þyrluna í átt að Vestmannaeyjum. TF-SIF kom að Björgvin kl. 14:41 og fór sigmaður niður í skipið og sótti hinn slasaða.  Því var lokið kl. 14:46 og var þá haldið til Reykjavíkur.  Þyrlan lenti við Landspítala Háskólasjúkrahús kl. 15:43 þar sem slasaði skipverjinn fór á bráðamóttöku. Dagmar Sigurðardóttirfjölmiðlaftr. Lesa meira

Mánudagur 14. mars 2005. Neyðarlínan tilkynnti kl. 18:23 að maður hafi slasast er hann féll af hestbaki í Vík í Mýrdal. Óskað var eftir þyrlu í viðbragðsstöðu.  Skömmu síðar hringdi læknir frá Vík og óskaði eftir að maðurinn yrði sóttur þar sem hann var mikið slasaður. Áhöfn, TF-SIF, þyrlu Landhelgisgæslunnar var kölluð út kl. 18:29 og fór hún í loftið kl. 18:47.  Var maðurinn fluttur í sjúkrabíl á móti þyrlunni og lenti TF-SIF á Hvolsvelli kl. 19:13.  Þar var maðurinn fluttur úr sjúkrabílnum yfir í þyrluna og lenti hún við Landspítala Háskólasjúkrahús í Fossvogi kl. 19:45. Dagmar Sigurðardóttirfjölmiðlaftr. Lesa meira

Laugardagur 12. mars 2005.   Annríki hefur verið hjá Landhelgisgæslunni í dag.  Þyrluáhöfn var tvisvar kölluð út vegna slysa úti á landi, áhöfn flugvélar Landhelgisgæslunnar, TF-SYN, fór í ískönnunarflug og nú er varðskip á leiðinni í átt að nótaskipinu Oddeyri EA-210 sem varð vélarvana 8 sjómílur suðaustur af Papey um þrjúleytið í dag.   Fyrirhugað var að áhöfn þyrlunnar TF-SIF tæki þátt í æfingu í Reykholti með björgunarsveitinni í Biskupstungum.  Áhöfnin var úti á flugvelli að undirbúa sig þegar tilkynning barst frá stjórnstöð Landhelgisgæslunnar kl. 14:54 um snjóbrettaslys í Bláfjöllum.  Eftir að áhöfnin fékk tilkynninguna liðu 10 mínútur þar til þyrlan fór í loftið og hélt í átt að Bláfjöllum. Samkvæmt upplýsingum frá Neyðarlínunni höfðu tveir 15 ára drengir slasast á snjóbrettum. Er þyrlan var að nálgast Bláfjöll var tilkynnt að vélsleðamaður hefði slasast við Strút norðan við Mýrdalsjökul.  Hann hafði keyrt fram af hengju og lenti á ísvegg.  Læknir og björgunarsveitarmenn voru þá hjá drengjunum í Bláfjöllum og töldu meiðsl þeirra ekki það alvarleg að þyrlan þyrfti að sækja þá. Neyðarlínan afturkallaði því beiðni um aðstoð þyrlu þangað. Hélt TF-SIF þá til baka til Reykjavíkur þar sem eldsneyti var sett á vélina og fór hún aftur í loftið kl. 15:27 og hélt ferðinni áfram að Strúti.  Björgunarsveitarmenn úr Hafnarfirði voru hjá vélsleðamanninum og hlúðu að honum þar til þyrlan kom á vettvang.  Hann var fluttur á Landspítala Háskólasjúkrahús í Fossvogi en þar lenti þyrlan um kl. 17 í dag.Í millitíðinni, um kl. 15:30, hafði Vaktstöð siglinga samband við stjórnstöð Landhelgisgæslunnar og tilkynnti að nótaskipið Oddeyri EA-210 væri vélarvana 8 sjómílur suðaustur af Papey og ræki frá landi. Ekki var búið að lýsa yfir neyðarástandi en varðskipi var beint á svæðið til vonar og vara.  Frystitogarinn M/S Brettingur var í nánd við Oddeyrina og er fyrirhugað að hann dragi hana til Fáskrúðsfjarðar.  Á svæðinu er bjart og 15 metrar á sekúndu.   Upplýsingar úr ískönnunarflugi Landhelgisgæslunnar verða birtar á heimasíðu Veðurstofu Íslands en þar er hægt að nálgast bæði hafískort og skýrslu áhafnar TF-SYN um ískönnunarflugið.  Sjá nánar á slóðinni:  http://www.vedur.is/hafis/gaeslan/index.html?   Dagmar Sigurðardóttir fjölmiðlaftr.   Mynd: Jón Páll Ásgeirsson stýrimaður.  TF-SIF á flugi.   Lesa meira

Föstudagur 11. mars 2005. Landhelgisgæslan samdi í vikunni við pólsku skipasmíðastöðina, Morska Stocznia Remontova, um breytingar og endurbætur á varðskipunum Ægi og Tý í kjölfar útboðs sem Ríkiskaup hafði umsjón með. Samningstímabilið er 2 ár og verður Ægi breytt í sumar en Tý sumarið 2006. Tilboð voru opnuð 27. janúar sl. og voru sex þeirra metin gild.  Þar af voru tvö frá íslenskum skipasmíðastöðvum, Þorgeiri og Ellerti á Akranesi og Slippstöðinni á Akureyri.  Morska bauð sem nemur tæplega 274 milljónum íslenskra króna  í breytingar á báðum varðskipunum en önnur tilboð voru mun hærri og það hæsta  228% hærra en lægsta boð. Kostnaðaráætlun Landhelgisgæslunnar hljóðaði upp á um 191 milljón íslenskra króna en helstu ástæður þess hversu miklu munar á henni og lægsta boði er m.a. að á s.l. ári hækkaði verð á stáli mikið. Þá er og gert ráð fyrir að verkið verði unnið á háannatíma hjá skipasmíðastöðvum.  Þegar tilboð í verkin voru metin var ekki eingöngu tekið mið af fjárhæðum. Litið var til þess hvort fyrirtækin höfðu ISO vottun og reynslu af sambærilegum verkum.  Morska var ekki eingöngu með lægsta tilboðið í krónum talið heldur hafði það einnig ISO vottun og mikla reynslu.  Gefin voru stig fyrir fyrirfram gefna þætti og fékk Morska 97 stig af 100 mögulegum en önnur fyrirtæki voru með talsvert lægri einkunn. Í verkinu felst að brú skipanna verður endurnýjuð og hún stækkuð.  Stjórnbúnaður og rafmagnslagnir í brúnni verða endurnýjaðar ásamt stjórnpúltum. Mjög fullkominn samhæfður tölvustjórnbúnaður verður  í  nýjum stjórnpúltum. Íbúðir áhafnarinnar og dráttarvindur skipanna verða endurnýjaðar. Einnig verður sett niður stærri og fullkomnari vinda með átaksstjórnun. Þessar breytingar eru samhliða hefðbundinni slipptöku skipanna. Sameiginleg fréttatilkynning Landhelgisgæslunnar og Ríkiskaupa Lesa meira

Fimmtudagur 10. mars 2005.Neyðarlínan hafði samband við stjórnstöð Landhelgisgæslunnar kl. 13:13 og tilkynnti að skipverji um borð í mótorbátnum Hauki EA-76 hefði slasast á fæti.  Óskað var eftir þyrlu til að sækja hann.  Báturinn var þá staddur um 12 sjómílur vestur af Stafnesi á Reykjanesi. Hvorug þyrla Landhelgisgæslunnar er flughæf í dag.  TF-SIF er í 500 tíma skoðun en TF-LIF bilaði í gær.  Þess vegna hafði stjórnstöð Landhelgisgæslunnar samband við Varnarliðið og óskaði eftir aðstoð.  Þyrla Varnarliðsins var búin að hífa hinn slasaða upp úr bátnum kl. 14:30 og lenti við Landspítala Háskólasjúkrahús í Fossvogi kl. 14:50.Dagmar Sigurðardóttirfjölmiðlaftr. Lesa meira

Fimmtudagur 10. mars 2005.Meðfylgjandi myndir voru teknar úr flugvél Landhelgisgæslunnar TF-SYN í eftirlits- og ískönnunarflugi úti fyrir Norðurlandi í dag.  Ísbrúnin lá næst landi 10 sjómílur norður af Kögri, 20 sjómílur norðaustur af Geirólfsnúpi, 20 sjómílur norðvestur af Grímsey og 42 sjómílur norðnorðaustur af Fonti.  Veðurstofa Íslands birtir hafískort Landhelgisgæslunnar eftir könnunarflugið í dag á meðfylgjandi slóð:http://www.vedur.is/hafis/gaeslan/lhg/lhg_nyjast.gif Ísinn er komin nokkuð nærri landi og fer siglingarleiðin fyrir Horn að verða varasöm ef veðurspá næstu daga gengur eftir auk þess sem ís fer að nálgast Grímsey.Dagmar Sigurðardóttir fjölmiðlaftr.   Lesa meira

Sunnudagur 6. mars 2005.Þyrla Landhelgisgæslunnar flutti í morgun fjóra slasaða á Landspítalann í Fossvogi eftir árekstur tveggja bíla á Þrengslavegamótum. Einn maður lést í slysinu. Neyðarlínan hafði samband við stjórnstöð Landhelgisgæslunnar kl. 6:57 og tilkynnti um alvarlegt umferðarslys á Þrengslavegamótum.  Tveir bílar, báðir með fimm manns innanborðs, höfðu rekist saman og var áreksturinn mjög harður. Óskað var eftir þyrlu strax. Áhöfn TF-LIF var þegar kölluð út með bráðaútkalli og fór þyrlan í loftið kl. 7:18.  Hún lenti við slysstaðinn kl. 7:25.  Einn maður var úrskurðaður látinn á slysstaðnum en fjórir voru fluttir með þyrlunni til Reykjavíkur. Hún lenti þar kl. átta í morgun.  Auk áhafnar TF-LIF var sjúkraflutningamaður frá Slökkviliði höfuðborgarsvæðisins með í þyrlunni til aðstoðar.Dagmar Sigurðardóttir fjölmiðlaftr. Lesa meira

Föstudagur 4. mars 2005.Dómsmálaráðuneytið gaf út eftirfarandi fréttatilkynningu í morgun:Á fundi ríkisstjórnarinnar í morgun var skýrt frá því að dóms- og kirkjumálaráðherra og sjávarútvegsráðherra hafa ákveðið að efla samstarf og samvinnu Landhelgisgæslunnar, Fiskistofu og Hafrannsóknarstofnunar. Verkefni þessara stofnana hafa margvíslega snertifleti og mikilvægt að þær hafi með sér náið samstarf um atriði sem að þeim snúa svo og sameiginlega rekstrarlega þætti eins og útgerð skipa. Ákveðið hefur verið að ráðuneytisstjórar ráðuneytanna tveggja leiði samstarf þessara þriggja aðila og niðurstaða úr því starfi verði ljós innan sex mánaða. Í dóms- og kirkjumálaráðuneyti 4. mars 2005 Lesa meira

Föstudagur 4. mars 2005.Dómsmálaráðuneytið gaf í dag út eftirfarandi fréttatilkynningu: Ríkisstjórn Íslands samþykkti á fundi sínum í dag tillögu Björns Bjarnasonar dóms- og kirkjumálaráðherra um endurnýjun skipa og flugvéla Landhelgisgæslu Íslands. Í tillögunni felst að fulltrúum dóms- og kirkjumálaráðherra og fjármálaráðherra verður falið að gera tillögur um kaup eða leigu á fjölnota varðskipi og eftirlitsflugvél, samningu útboðsgagna og undirbúning málsins að öðru leyti fyrir lokaákvörðun ríkisstjórnar. Í stefnuræðu Davíðs Oddssonar forsætisráðherra við upphaf þessa kjörtímabils sagði, að nauðsynlegt væri að laga starf Landhelgisgæslu Íslands að nýjum kröfum, ráðast í smíði nýs varðskips og gera áætlun um endurnýjun á flugflota hennar. Landhelgisgæslan hefur að undanförnu farið yfir þarfir vegna skipa og flugvéla og komist að þeirri niðurstöðu, að ekki sé skynsamlegt að ráðast í sérsmíði á stóru varðskipi. Þá telur landhelgisgæslan brýnt að ný flugvél komi í stað nærri 30 ára Fokkervélar, en hún missir flughæfi við lok næsta árs. Kröfur til varðskips eru þær helstar, að mati landhelgisgæslunnar, að það geti sinnt eftirliti í efnahagslögsögu Íslendinga, mengunarvörnum, afgreitt eldsneyti til björgunarþyrlna á flugi og brugðist við í þágu almannavarna hvar sem er á landinu. Skipið verður einnig að geta stutt við viðbrögð og varnir gegn hryðjuverkaógn, nýst til samvinnu við sérsveit lögreglunnar og tollgæslu til varnar smygli á fólki og fíkniefnum og sinnt björgunarstörfum hverskonar. Í björgunarhlutverkinu felst að draga skip og báta og við framkvæmd þess þarf að miða við, að umferð stórra flutningaskipa stóraukist um efnahagslögsöguna og við strendur landsins á næstu árum. Flugvél landhelgisgæslunnar þarf að búa yfir nútíma greiningar- og samskiptatækni og hafa nægjanlegt flugþol til að sinna ofangreindu eftirliti í stórri efnahagslögsögu, þar sem m.a. þarf að fylgjast með ferðum skipa, mengun og hafís. Þá þarf hún þol til að taka þátt í björgunar- og leitaraðgerðum og geta sinnt vettvangsstjórn og sjúkraflugi. Flugvélin þarf einnig að geta flogið utan vegna alþjóðlegra björgunarstarfa, friðargæslu og mannúðarmála. Flugvélin kann einnig að verða nýtt til flutnings á farþegum í boði hins opinbera. Landhelgisgæslan telur nauðsynlegt að leita tilboða í kaup eða leigu á varðskipi og flugvél. Könnun gæslunnar hefur leitt í ljós, að nú er unnt að kaupa eða leigja varðskip, til tíu ára, sem fullnægir ofangreindum kröfum, fyrir u.þ.b. 1,7 – 2,0 milljarða íslenskra króna. Þá er núna unnt að kaupa eða leigja flugvél með búnaði sem uppfyllir ofangreind skilyrði fyrir u.þ.b. 1,8 milljarða króna. Séu tilboð nýtt núna telur landhelgisgæslan, að afhending á skipi og flugvél verði ekki fyrr en eftir 18 til 30 mánuði. Undanfarin ár hefur verið unnið að því að undirbúa sérsmíði stórs varðskips fyrir landhelgisgæsluna og hefur málið verið rætt oft í ríkisstjórn. Síðasta kostnaðarmat vegna slíks sérsmíðað skips gerir ráð fyrir því, að það kynni að kosta allt að fjórum milljörðum króna. Dóms- og kirkjumálaráðuneytið hefur lagt mat á þær tillögur, sem nú liggja fyrir frá Landhelgisgæslu Íslands um kaup eða leigu á nýju varðskipi og nýrri flugvél fyrir allt að fjórum milljörðum króna. Niðurstaða ráðuneytisins er sú, að velja beri þann kost, sem er í senn hagkvæmari og ódýrari auk þess að uppfylla allar kröfur landhelgisgæslunnar. Dóms- og kirkjumálaráðuneytið telur brýnt, að ákvörðun um endurnýjun skipa og flugvéla landhelgisgæslunnar sé tekin og síðan ráðist í framkvæmd hennar á þann hátt, sem tryggir besta notagildi tækjanna á hagkvæmustu kjörum. Í dóms- og kirkjumálaráðuneytinu, 4. mars 2005     Lesa meira

Föstudagur 4. mars 2005.Þyrla Landhelgisgæslunnar hélt af stað norður í land kl. þrjú til að sækja slasaðan vélsleðamann en hefur nú verið snúið við.  Menn úr Björgunarsveitinni Stefáni úr Mývatnssveit sem komu á slysstað í nágrenni Dettifoss töldu ekki nauðsynlegt að fá þyrlu á staðinn eftir að þeir höfðu metið ástand mannsins og ætluðu sjálfir að koma honum undir læknishendur.  Talið er að maðurinn sé slasaður á olnboga.  Þyrla Landhelgisgæslunnar var afturkölluð kl. 15:34.Neyðarlínan hringdi í stjórnstöð Landhelgisgæslunnar kl. 14:23 og gaf samband við lögregluna á Húsavík.  Lögreglan tilkynnti um vélsleðaslys nálægt Dettifoss en ekki var vitað nákvæmlega hvar á svæðinu það hafði átt sér stað.  Einn úr hópi vélsleðamannanna hafði keyrt í símasamband og lét vita.  Áhöfn TF-LIF var þegar kölluð út en þá var þyrlan á æfingu með Slysvarnarskóla sjómanna.  Þyrlan hélt þegar til Reykjavíkurflugvallar til að taka eldsneyti.Lögreglan á Húsavík hafði samband kl. 14:37 og tilkynnti að Björgunarsveitin Stefán úr Mývatnssveit væri lögð af stað.  Björgunarsveitin á Húsavík væri einnig að gera sig klára.  Vitað var að vélsleðamennirnir voru alls fjórir og einn þeirra slasaður.  Reiknað var með að Björgunarsveitin Stefán kæmi á staðinn eftir u.þ.b. 20 mínútur. Þyrla Landhelgisgæslunnar, TF-LIF, hélt norður í land kl. 15.  Hálftíma síðar var tilkynnt að Björgunarsveitin Stefán væri búin að leita á svæðinu norðan Dettifoss.  Kvikmyndatökulið var þá við Hólasand með flugvél og þyrlu og var þyrlan að leita á svæðinu.Lögreglan á Húsavík hafði samband kl. 15:30 og lét vita að ekki væri þörf á þyrlunni eins og áður segir og var henni þá snúið til Reykjavíkur.Dagmar Sigurðardóttirfjölmiðlaftr. Lesa meira

Fimmtudagur 3. mars 2005.Meðfylgjandi myndir voru teknar nýlega úr danska varðskipinu Triton er áhöfn þess hélt sameiginlega æfingu með flugdeild Landhelgisgæslunnar.  Báðar þyrlur Landhelgisgæslunnar tóku þátt í æfingunni.  Áhöfn TF-LIF æfði eldsneytistöku frá varðskipinu en það er nokkuð vandasöm aðgerð sem þarfnast mikillar nákvæmni.  Það getur gert gæfumuninn ef slys á sér stað í mikilli fjarlægð frá landi að þyrlan geti tekið eldsneyti frá skipi.  Ekki er aðstaða til þess í varðskipunum Ægi og Tý.Áhöfn TF-SIF æfði aðflug og lendingu á þyrlupalli Triton.  Lending tókst vel þrátt fyrir talsverðan velting á skipinu. Forstjóri ásamt þremur starfsmönnum Landhelgisgæslunnar var í boði skipherra Triton um borð í skipinu og sá áhöfn TF-SIF um að flytja þá til Reykjavíkur að æfingu lokinni.  Um borð í skipinu fengu Landhelgisgæslumenn fræðslu um hlutverk varðskipsins Triton og verkefni.  Eins og endranær eru Tritonmenn reiðubúnir til samvinnu við Landhelgisgæsluna á sem flestum sviðum.  Sérstakur samningur er einnig til staðar um samstarf Landhelgisgæslunnar og danska sjóhersins á sviði leitar- og björgunarmála. Á annarri myndinni eru báðar þyrlur Landhelgisgæslunnar á flugi yfir skipinu en það er nokkuð sérstakt að ná mynd af þeim báðum í einu á flugi.  Hin myndin sýnir TF-LIF í hangflugi yfir Triton á meðan verið var að dæla í hana eldsneyti frá varðskipinu.Dagmar Sigurðardóttirfjölmiðlaftr. Lesa meira

Miðvikudagur 2. mars 2005.Áhöfn TF-SYN, flugvélar Landhelgisgæslunnar, fór í ískönnunarflug í gær úti fyrir Norðurlandi og Vestfjörðum.  Ísröndin var næst landi 34 sjómílur norðvestur af Straumnesi og 56 sjómílur vestnorðvestur af Bjargtöngum.  Ískönnunarskýrslur áhafnar TF-SYN eru birtar jafnóðum og þær berast á heimasíðu Veðurstofunnar á slóðinni:   http://www.vedur.is/hafis/ Skýrsla Landhelgisgæslunnar frá í gær er á slóðinni: http://www.vedur.is/hafis/gaeslan/lhg/skyrsl_nyjast.html Ískort frá Landhelgisgæslunni er á slóðinni: http://www.vedur.is/hafis/gaeslan/lhg/lhg_nyjast.html Meðfylgjandi myndir tóku flugstjórarnir á TF-SYN, Pétur Steinþórsson og Tómas Helgason.Dagmar Sigurðardóttir fjölmiðlaftr. Lesa meira

Þriðjudagur 1. mars 2005.Forstjóri Landhelgisgæslunnar og starfsmenn flug- og skipatæknideildar hafa undanfarið kannað möguleika á kaupum eða leigu á skipi og flugvél fyrir Landhelgisgæsluna.  Ýmsir spennandi möguleikar eru fyrir hendi.Ekki skortir áhuga þeirra sem geta boðið skip og flugvélar til kaups eða leigu. Meðfylgjandi myndir voru teknar í kaffihléi á kynningarfundi um Casa-flugvélar.Dagmar Sigurðardóttir fjölmiðlaftr. Mynd DS: Georg Kr. Lárusson forstjóri Landhelgisgæslunnar ásamt fulltrúa Casa, Birni Brekkan flugrekstrarstjóra og Pétri Steinþórssyni flugstjóra.  Lesa meira