Fréttayfirlit: febrúar 2006
Sprengjusveit Landhelgisgæslunnar aðstoðaði við að losa jarðborinn Geysi
Þriðjudagur 28. febrúar 2006.Starfsmenn sprengjusveitar Landhelgisgæslunnar unnu nýlega með sérfræðingum frá Íslenskum orkurannsóknum (ISOR) og starfsmönnum Jarðborana hf. við að losa jarðborinn Geysi sem sat fastur á 1.2 km dýpi nálægt Reykjanesvita. Jarðborinn hafði verið notaður við að hreinsa borholu númer 17 þegar jarðvegur hrundi að bornum og hann festist. Þegar sprengjusveitin var kölluð til var búið að reyna allar hefðbundnar aðferðir til að losa borinn en allt kom fyrir ekki. Það var því ekki um annað að ræða en að losa hann með sprengiefni.
Vinnan, sem stóð samfellt í nærri 3 daga, bar að lokum árangur með því að látin var síga sérstaklega hönnuð álags- og hitaþolin, kraftmikil sprengjuhleðsla niður í borstangirnar og hún sprengd til að að brjóta í sundur borstöng.Landhelgisgæslan gerði samning við Íslenskar orkurannsóknir árið 2004 um þjónustu og tæknivinnu við notkun sprengiefna við borholur. Það var á grundvelli þess samnings sem sprengjusveit Landhelgisgæslunnar var kölluð til.Meðfylgjandi myndir tók Ómar Sigurðsson starfsmaður ÍSOR.Dagmar Sigurðardóttir / Adrian King
Jarðborinn Geysir.
Starfsmenn Jarðborana hf. við borstöngina sem var föst á 1.2 km. dýpi.
Æfingaflug nemenda í varðskipadeild Fjöltækniskólans með Syn
Þriðjudagur 28. febrúar 2006.Í lok síðustu viku fóru nemendur varðskipadeildar Fjöltækniskólans í æfingaflug með Syn, Fokker flugvél Landhelgisgæslunnar, þar sem farið var yfir verklag við töku á skipum og leitaraðferðir í flugvélum. Fyrr um daginn höfðu nemendurnir setið kynningu á löggæslu, leit og björgun með flugvélum.Mikilvægur þáttur í námi skipstjórnarmanna í varðskipadeild er útreikningur reks, uppsetning leitar og vettvangsstjórnun á leitarsvæðum. Á meðfylgjandi mynd eru nemendurnir ásamt áhöfn TF-SYN.
Auðunn F. KristinssonyfirstýrimaðurFrá Vinstri: Vilhjálmur Ó. Valson, Pétur Steinþórsson, Tómas Helgason, Andri Leifsson, Pálmi Jónsson, Guðmundur Jónsson, Pétur Pétursson, Arnar Páll, Sigurður Sigurðsson, Auðunn Kristinsson og Magnús Einarsson.
Flutningi í Skógarhlíð fagnað
Mánudagur 27. febrúar 2006.Mikið var um dýrðir í Skógarhlíðinni sl. föstudag er Landhelgisgæslan var með móttöku í tilefni af flutningi höfuðstöðva Landhelgisgæslunnar, sjómælingasviðs og stjórnstöðvar Landhelgisgæslunnar frá Seljavegi 32 í Reykjavík í Björgunarmiðstöðina í Skógarhlíð 14.
Flutningunum lauk að mestu 23. janúar sl. en þá voru skrifstofan og sjómælingasvið komin í Skógarhlíð. Flutningur stjórnstöðvar hafði þegar farið fram en hún er sem kunnugt er í vaktstöð siglinga í Björgunarmiðstöðinni.
Jón Páll Ásgeirsson skipstjórnarmaður var með myndavélina á lofti og náði þessum skemmtilegu myndum.
Björn Bjarnason dóms- og kirkjumálaráðherra og Georg Kr. Lárusson forstjóri í nýju andyri skrifstofuhúsnæðis Landhelgisgæslunnar í Björgunarmiðstöðinni Skógarhlíð.Georg Kr. Lárusson forstjóri Landhelgisgæslunnar flutti tölu og sagði:Saga Gæslunnar nær allt frá árinu 1926 og verður rakin til Vestmannaeyja þar sem hornsteinninn var upphaflega lagður. Síðan þá hefur Gæslan verið á ýmsum stöðum svo sem hjá Ríkisskipum og hjá Vita- og hafnamálastofnun og síðast sjálfstæð stofnun á Seljaveginum. Á þessu 80 ára afmælisári er óhætt að segja að það fari vel á því að Landhelgisgæslan flytji í sérhannað húsnæði hér í Björgunarmiðstöðinni í Skógarhlíð. Á þessari stundu er okkur sem vinnum hjá Landhelgisgæslunni efst í huga þakklæti til dómsmálaráðherra og allra þeirra sem hafa gert Gæslunni kleift að komast hingað í Skógarhlíð. Ég veit að það var ekki létt verk og við upphaf þess voru uppi margar úrtölu- og efasemdarraddir. Nú í dag heyrast þær ekki. Það er ekki einasta að við höfum fengið hér bjart og gott húsnæði heldur er starfsemi Landhelgisgæslunnar mun meiri eining en áður var. Hér í húsinu er einnig Vaktstöð siglinga sem er rekin í góðu samstarfi við Neyðarlínuna og Slysavarnarfélagið Landsbjörgu og þar inni er einnig stjórnstöð Gæslunnar. Sjómælingar Íslands eru hér fyrir neðan okkur og hér á hæðinni sem við erum nú á eru höfuðstöðvarnar með viðbót frá flugvellinum, en hér hafa starfstöð nokkrir af okkar lykilmönnum sem tengjast fluginu. Nálægðin við flugvöllinn breytir miklu frá því sem var. Öll tengsl eru meiri og betri svo miklu munar. Ein mesta breytingin fyrir okkur starfsmenn Landhelgisgæslunnar er sambýlið við okkar ágætu nágranna. Með komu Gæslunnar í Björgunarmiðstöðina má segja að hringnum sé í vissum skilningi lokað. Það gefur auga leið að nálægðin við aðra viðbragðsaðila og þá aðra er vinna í sama geira og við, hlýtur að skapa meira hagræði, og ekki síst öryggi fyrir íbúa þessa lands. Við eigum fjölmarga snertifleti og samstarfsmöguleika sem eru þegar margir nýttir og eiga eftir að verða virkjaðir í mun ríkara mæli eftir því sem frá líður. Það má því með nokkru sanni segja að við höfum á vissan hátt sloppið úr hálfgerðri einangrun við flutninginn hingað í Björgunarmiðstöðina. Hér eru okkar helstu samstarfsaðilar með aðsetur en þeir hafa allir tekið einstaklega vel á móti okkur og fyrir það erum við þakklát. Hjá Landhelgisgæslu Íslands starfar gott og samhuga fólk sem ber mikinn metnað til sinna starfa. Sá metnaður nær langt út fyrir starfslok eins og sjá má hér með myndarlegri þátttöku fyrrverandi starfsmanna sem láta sér annt um alla starfsemi Gæslunnar. Landhelgisgæslan gengur nú í gegnum mikla breytingar og kannski á vissan hátt endurnýjun lífdaga. Það er óþarft að rekja fyrir ykkur sem hér eru allt það sem er að gerast þessa dagana og stjórnvöld eru að vinna að undir öruggri forystu dómsmálaráðherra, en með vissum sanni má segja flest okkar tæki og öll okkar vinna sé í gagngerri endurnýjun. Þessar umbreytingar geta á stundum verið erfiðar og jafnvel einhverjum sársaukafullar en allt þetta mikla framtak blæs okkur sem hér vinnum eldmóð í brjóst. Við erum staðráðin í að halda áfram af kappi og bjartsýni, með það að leiðarljósi að sinna okkar skyldum, sem eru: Að vera til taks, vinna þessari þjóð gagn og veita henni öryggi. Björn Bjarnason dóms- og kirkjumálaráðherra afhenti Georgi Kr. Lárussyni forstjóra að gjöf til Landhelgisgæslunnar tvær innrammaðar ljósmyndir eftir Valdimar Jónsson sem var loftskeytamaður hjá Landhelgisgæslunni í áratugi og allt myndasafn hans úr starfi Landhelgisgæslunnar á tölvutæku formi en þær myndir skipta þúsundum. Ráðherra óskaði Landhelgisgæslunni til hamingju með nýja húsnæðið og sagði að unnið væri að því að efla Landhelgisgæsluna með margvíslegum hætti, með kaupum á nýju varðskipi, nýrri eftirlitsflugvél, nýju lagafrumvarpi sem verið væri að vinna í og síðast en ekki síst með þessu nýja húsnæði. Hann sagði jafnframt frá því að stefnt væri að því að styrkja för varðskipsins Óðins til Hull næsta sumar en þar verður minningarathöfn og afhjúpun minnisvarða um breska sjómenn sem farist hafa við Íslands strendur og jafnframt minnisvarði um sjómenn sem bjargað var og björgunarmenn þeirra. Þá verða einnig liðin 30 ár frá lokum síðasta þorskastríðs. Að síðustu sagði ráðherrann að verið væri að undirbúa að Óðinn verði afhentur Sjóminjasafni Íslands.
Jón Viðar Matthíasson slökkviliðsstjóri Slökkviliðs höfuðborgarsvæðisins flutti ávarp og hann ásamt Birni Gíslasyni, framkvæmdastjóra SHS fasteigna, sem á og rekur húseignina í Skógarhlíð 14, buðu Landhelgisgæsluna velkomna í húsið og afhentu Georgi Kr. Lárussyni forstjóra lykil á platta eins og aðrir aðilar í húsinu hafa fengið að gjöf frá SHS.Jón Magnússon fyrrverandi lögmaður og blaðafulltrúi Landhelgisgæslunnar flutti ávarp og rifjaði meðal annars upp skemmtilegar uppákomur sem hann lenti í í starfi sínu sem blaðafulltrúi í einu af þorskastríðunum. Hann afhenti Georgi Kr. Lárussyni mynd eftir Sigmund sem teiknarinn hafði gefið honum en það er skopmynd af varðskipinu Tý og bresku freigátunni Falmouth.
Ungir og gamlir gæslumenn voru mættir til að fagna nýja húsnæðinu. Hér má sjá Gunnar Pétursson sem var starfsmaður Sjómælinga Íslands, Sverri Erlingsson og Tómas Vilhjálmsson flugvirkja hjá LHG og Garðar Pálsson fyrrverandi skipherra LHG.Við kortaborðið hjá sjómælingasviði LHG/Sjómælingum Íslands. Níels Bjarki Finsen verkefnisstjóri ENC (rafrænna sjókorta) og umsjónarmaður heimasíðu LHG, Páll Geirdal yfirstýrimaður í flugdeild LHG og Vilbergur Magni Óskarsson fyrrverandi yfirstýrimaður hjá LHG en starfar nú sem sviðsstjóri skipstjórnarsviðs í Fjöltækniskólanum. Vinstra megin við borðið standa m.a. Ólafur Valur Sigurðsson fyrrverandi skipherra LHG, Guðjón Petersen sem var áður skipstjórnarmaður hjá LHG og framkvæmdastjóri Almannavarna, Sigurður Þ. Árnason fyrrverandi skipherra LHG, Jóhann Sigurjónsson forstjóri Hafrannsóknastofnunar, Bragi Ólafsson fyrrverandi launafulltrúi LHG, Eggert Ólafsson fyrrverandi yfirvélstjóri LHG, Leif Bryde varðstjóri í stjórnstöð LHG/vaktstöð siglinga og hinu megin við borðið má sjá Stefán Eiríksson skrifstofustjóra dómsmála- og löggæslusviðs dómsmálaráðuneytis og Harald Johannesen ríkislögreglustjóra. Í forgrunni er Valdimar Jónsson loftskeytamaður sem starfaði hjá LHG.Snjólaug Guðjohnsen sjókortagerðarmaður og Arnbjörg Gunnlaugsdóttir bókari en báðar eru starfsmenn LHG.
Níels Bjarki Finsen og Ragnhildur Magnúsdóttir gjaldkeri LHG.
Garðar Pálsson fyrrverandi skipherra hjá LHG, Inga Hanna Guðmundsdóttir starfsmannastjóri LHG, Jón Gunnarsson framkvæmdastjóri Slysavarnarfélagsins Landsbjargar og Kristján Þ. Jónsson framkvæmdastjóri aðgerðasviðs LHG.
Jón Ebbi Björnsson varðstjóri í stjórnstöð LHG/vaktstöð siglinga, Berent Th. Sveinsson fyrrverandi yfirloftskeytamaður og varðstjóri í stjórnstöð LHG, Sigurður Steinar Ketilsson skipherra á varðskipinu Tý og Sigurður Þ. Árnason fyrrverandi skipherra hjá LHG.
Inga Hanna Guðmundsdóttir, Sigríður Ragna Sverrisdóttir sjókortagerðarmaður og Eygló Ólöf Birgisdóttir launafulltrúi, starfsmenn Landhelgisgæslunnar.
Dagmar Sigurðardóttirlögfræðingur/upplýsingaftr.
Einn maður lést og annar slasaðist er þeir féllu í jeppa niður um sprungu á Hofsjökli
Sunnudagur 26. febrúar 2006.
Einn maður lést og annar slasaðist er þeir féllu í jeppa niður um sprungu á Hofsjökli. Þeir komu með þyrlu Varnarliðsins á Landspítala Háskólasjúkrahús í Fossvogi um kl. 1 í nótt.
Stjórnstöð Landhelgisgæslunnar/vaktstöð siglinga bárust upplýsingar um slysið á Hofsjökli um kl. 15:17 og höfðu varðstjórar í stöðinni þegar samband við danska varðskipið Triton sem statt er í Reykjavíkurhöfn og óskuðu eftir aðstoð þyrlu skipsins. Einnig var haft samband við Varnarliðið og óskað eftir þyrluaðstoð þaðan. Þyrla danska varðskipsins Triton var reiðubúin til flugtaks upp úr kl. 16 og tók með sér tvo slökkviliðsmenn frá Slökkviliði höfuðborgarsvæðisins og einn björgunarsveitarmann frá Slysavarnarfélaginu Landsbjörgu. Tvær þyrlur fóru frá Varnarliðinu og flutti önnur þeirra íslenskan lækni á slysstað.Þyrla Tritons fann slysstaðinn um kl. 17:50 og lentu þyrlurnar þar um kl. 18. Björgunaraðgerðir hófust þegar en afar erfitt reyndist að ná mönnunum út úr bílnum. Annar þeirra var látinn en hinn slasaður.Um kl. 19:39 fór flugvél Landhelgisgæslunnar, Syn, í loftið en hún var notuð sem endurvarpi fyrir fjarskipti milli björgunaraðila á slysstað. Hún var á flugi í um 5 tíma og 40 mínútur.Þyrla varnarliðsins flutti báða mennina til Reykjavíkur og var hinn slasaði fluttur á Landspítala Háskólasjúkrahús í Fossvogi.
Þyrlur Landhelgisgæslunnar voru báðar óvirkar. Líf, stóra björgunarþyrla Gæslunnar, var í 3000 tíma skoðun en það er mjög viðamikil skoðun sem tekur nokkrar vikur. Búist er við að hún komist í gagnið upp úr miðjum mars. Sif, minni björgunarþyrla Landhelgisgæslunnar, var einnig óvirk vegna ófyrirséðs viðhalds en beðið er eftir varahlutum í hana og er reiknað með að hún komist í gagnið í vikulok.Landhelgisgæslan er með samstarfssamning við Varnarliðið um gagnkvæma aðstoð við leit og björgun og felur samningurinn það í sér að Varnarliðið er látið vita ef þyrlur Landhelgisgæslunnar eru óvirkar og þá er leitast við að hafa þyrlur Varnarliðsins í viðbragðsstöðu. Landhelgisgæslan er einnig með samstarfssamning við danska sjóherinn, Coop Saga, sem kveður á um gagnkvæma aðstoð við leit og björgun. Svo heppilega vildi til að danska varðskipið Triton var við bryggju í Reykjavíkurhöfn í gær og brást áhöfnin á Triton og Varnarliðsmenn fljótt og vel við aðstoðarbeiðni frá Landhelgisgæslunni.Dagmar Sigurðardóttirlögfræðingur/upplýsingaftr.
Möguleikar á auknu samstarfi við Bresku sjómælingastofnunina kannaðir
Miðvikudagur 22. febrúar 2006.
Forstjóri Bresku sjómælingastofnunarinnar (UKHO), Dr. Wyn Williams, heimsótti Landhelgisgæsluna nýverið og átti fundi með Georgi Kr. Lárussyni forstjóra Landhelgisgæslunnar, Hilmari Helgasyni framkvæmdastjóra sjómælingasviðs/Sjómælinga Íslands og Sólmundi Má Jónssyni framkvæmdastjóra rekstrarsviðs þar sem meðal annars voru ræddir möguleikar á auknu samstarfi stofnananna. Að sögn Hilmars Helgasonar komu upp athygli verðar hugmyndir sem nú er verið að koma í framkvæmd.
Fundurinn var ákveðinn í framhaldi af því að forstjórarnir hittust sl. sumar og endurnýjuðu samstarfssamning stofnana sinna.
Dr. Williams og aðstoðarmaður hans kynntu sér starfsemi Landhelgisgæslunnar, einkum sjómælingasviðs, og lauk heimsókninni með því að gestirnir fengu ásamt fylgdarliði far með Syn, eftirlitsflugvél Landhelgisgæslunnar, til Vestmannaeyja sem var við gæslustörf út af suðausturlandinu. Í Vestmannaeyjum voru afleiðingar eldgossins skoðaðar og í bakaleiðinni var Surtsey skoðuð úr lofti. Dagmar Sigurðardóttir
lögfræðingur/upplýsingaftr.
Dr. Wyn Williams, forstjóri Bresku sjómælingastofnunarinnar og Georg Kr. Lárusson forstjóri Landhelgisgæslunnar.
Árni Vésteinsson deildarstjóri kortadeildar Landhelgisgæslunnar / Sjómælinga, sýnir Dr. Wyn Williams og aðstoðarmanni hans, Chris Smith, sjókort af hafsvæðinu kringum Ísland og rit sem Sjómælingar gefa út.
Niðurstöður í forvali vegna smíði nýs varðskips birtar
Þriðjudagur 21. febrúar 2003.
Niðurstaða er fengin í forvali um hönnun og smíði á nýju varðskipi fyrir Landhelgisgæslu Íslands eins og fram kemur á heimasíðu Ríkiskaupa. Eingöngu bárust þátttökutilkynningar frá erlendum skipasmíðastöðum og voru þær frá eftirfarandi aðilum:
Aker Brattvaag Skibsverft A/S., Noregi.
Asmar, Chile.
Astilleros Armon S,A. Spáni.
Bergen Yards AS, Noregi.
Gdansk Stocznia Remontowa im, Póllandi.
Chantiers De' Atlantique (Alstom Naval), Frakklandi.
China Ship Building Trading Company, Kína.
Damen Shipyards Goringchem, Hollandi.
Devenport Royal Dockyard Limited, Englandi.
Fincantieri Cantieri Navali, Ítalíu.
Navantia S.A, Spáni.
Karstensens Skibsværft A/S, Danmörku.
Peene-Werft GmbH, Þýskalandi.
Simek A/S, Noregi.
Thyssen Krupp Marine Systems (TKMS), Þýskalandi.
Eftir skoðun tilkynninganna var ákveðið að velja sex stöðvar til áframhaldandi þátttöku. Þær kröfur sem gerðar voru til þeirra vegna þessa eru m.a.: að þær væru viðurkenndar af Lloyds eða sambærilegum aðila, ISO vottun eða sambærilegt, að jákvætt eigið fé næmi a.m.k. 5 milljónum evra og að eiginfjárhlutfall sé að lágmarki 13%. Þá er gerð krafa um að viðkomandi hafi borgað öll opinber gjöld, sé með aðstöðu til að byggja skipin og geti byggt/afhent skipin á innan við 30 mánuðum frá undirritun samnings. Viðkomandi aðilar þurfa að hafa smíðað að lágmarki 2 sambærileg skip frá árinu 2000 sem eru starfrækt í Norðursjó eða á Norður-Atlantshafi.
Fyrirtæki sem uppfylltu kröfurnar eru:
Aker frá Noregi.
Asmar frá Chile
Bergen frá Noregi
Damen frá Hollandi.
Peene – Werft frá Þýskalandi.
SIMEK frá Noregi.
Björgunarþyrla Landhelgisgæslunnar sótti slasaðan vélsleðamann í Reykholt
Laugardagur 18. febrúar 2006.
Læknir í Borgarnesi hafði samband við stjórnstöð Landhelgisgæslunnar/vaktstöð siglinga gegnum Neyðarlínuna kl. 16:16 og óskaði eftir þyrlu í viðbragðsstöðu vegna manns sem hafði slasast á vélsleða á Langjökli.
Sif, björgunarþyrla Landhelgisgæslunnar, fór í loftið kl. 16:40 og var komin í Reykholt stundarfjórðungi síðar en þangaði hafði slasaði vélsleðamaðurinn verið fluttur með sjúkrabíl.
Þyrlan lenti við Landspítala Háskólasjúkrahús í Fossvogi kl. 17:30.Dagmar Sigurðardóttir
lögfræðingur/upplýsingaftr<
Úr myndasafni: Sif, björgunarþyrla Landhelgisgæslunnar.
Landhelgisgæslan og 112 dagurinn
Sunnudagur 12. febrúar 2006
Eins og fram kom í fréttatilkynningu í síðustu viku tók Landhelgisgæslan þátt í 112 deginum með ýmsum hætti. Jón Páll Ásgeirsson stýrimaður hjá Landhelgisgæslunni var með myndavélina á lofti nú sem endranær og náði skemmtilegum myndum á Faxagarði. Einnig hafa borist myndir frá Ingu Hönnu Guðmundsdóttur starfsmannastjóra Landhelgisgæslunnar og Hilmari Snorrasyni skólastjóra Slysavarnaskóla sjómanna
Sigurður Steinar Ketilsson skipherra og afastrákurinn hans, Daníel Freyr, á brúarvængnum á varðskipinu Tý.Þarna sjást m.a. varðskipin tvö við bryggju, Óðinn og Týr á bak við hann, og björgunarþyrlan Sif.´Fólki gafst kostur á að skoða björgunartæki þjóðarinnar.
Sigurður Steinar Ketilsson skipherra á Tý, Björn Brekkan Björnsson flugrekstrarstjóri og þyrluflugmaður, Hörður Ólafsson læknir í þyrluáhöfn og Magnús Örn Einarsson yfirstýrimaður í flugdeild.
Jón Páll Ásgeirsson stýrimaður hjá Landhelgisgæslunni mætti á svæðið og tók mikið af myndum sem sjá má hér að ofan.
Gestir á öllum aldri höfðu mikinn áhuga á að skoða TF-SIF.
Leit að báti út af Ánanaustum
Sunnudagur 12. febrúar 2006.
Stjórnstöð Landhelgisgæslunnar/vaktstöð siglinga barst tilkynning gegnum Neyðarlínuna um að vegfarendur á norðanverðu Seltjarnarnesi hefðu séð eitthvað sem líktist báti í neyð um kl. 17:40. Var talið að báturinn hafi verið staddur í voginum undan Ánanaustum.
Björgunarsveitir á höfuðborgarsvæðinu voru þegar kallaðar út og fóru björgunarskip Slysavarnarfélagsins Landsbjargar strax til leitar. Er þau höfðu leitað í um 40 mínútur var ákveðið að kalla út Líf, björgunarþyrlu Landhelgisgæslunnar, til að aðstoða við leitina.
Líf fór í loftið kl. 19 og leitaði í tæpar tvær klukkustundir. Taldi áhöfn þyrlunnar að hún væri þá búin að kemba allt svæðið sem kom til greina en við leitina notaði áhöfnin hitamyndavél og var einnig búin nætursjónaukum. Leitarskilyrði voru góð þrátt fyrir talsverðan vind, lítill sjógangur var á svæðinu og bjart af tungli.
Er þyrlan hætti leit höfðu borist vísbendingar frá öðrum vegfarendum sem töldu að einungis hefði verið um rusl eða jafnvel hval að ræða. Leit var formlega hætt kl. 22.
Dagmar Sigurðardóttirlögfræðingur/upplýsingaftr.
112 dagurinn um helgina
Miðvikudagur 8. febrúar 2006.
Landhelgisgæslan mun taka þátt í 112 deginum um helgina og er dagskráin svohljóðandi samkvæmt fréttatilkynningu frá skipuleggjendum:
Mikið verður um dýrðir hjá viðbragðsaðilum um allt land laugardaginn 11. febrúar, á 112 (einn, einn, tveir) daginn sem haldinn var í fyrsta sinn hér á landi fyrir ári. Slökkvilið, lögregla, björgunarsveitir, Rauði krossinn, Landhelgisgæslan og fleiri munu þá fylkja liði og fara í bíla- og tækjalestum um borg og bæi undir merkjum samvinnu og samhæfingar. Að því búnu bjóða þeir almenningi að kynnast starfseminni í opnu húsi sem efnt verður til um allt land.
Neyðarlínan, 112, fagnar einnig tíu ára afmæli sínu um þessar mundir og efnir af því tilefni til ráðstefnu um neyðarnúmerið og þróun neyðarþjónustu föstudaginn 10. febrúar. Neyðarlínan hóf starfsemi 1. janúar 1996 og leysti 112 þá af hólmi fjöldann allan af neyðarnúmerum sem fólk þurfti að nota eftir því hvað hafði gerst og hvar viðkomandi var staddur á landinu. Nú er með einu símtali í 112 unnt að virkja á augabragði lögreglu, slökkvilið, almannavarnir, Landhelgisgæsluna, sjúkraflutningamenn, lækna, hjálparlið sjálfboðaliða og barnaverndarnefndir. Um 300 þúsund símtöl berast Neyðarlínunni á hverju ári.
Dagskrá vegna afmælis 112 og 112 dagsins verður sem hér segir:
10. febrúar – ljósmyndasýning og ráðstefna
Kl. 11.00
Ljósmyndasýningin Útkall 2005 verður opnuð í Kringlunni og stendur til 17. febrúar. Á sýningunni verður að finna úrval ljósmynda af starfi viðbragðsaðila 2005.
Kl. 13.00-17.00
Ráðstefnan 112 í tíu ár – hvað hefur breyst, hvað er framundan? haldin á Hótel Loftleiðum. Að loknu setningarávarpi Björns Bjarnasonar dómsmálaráðherra verður tilkynnt um val á skyndihjálparmanni Rauða krossins 2005.
Fyrirlesarar:
Jónína Sigurðardóttir, aðstoðaryfirlögregluþjónn hjá ríkislögreglustjóranum.
Anna Björg Aradóttir, yfirhjúkrunarfræðingur hjá landlæknisembættinu.
Jón Viðar Matthíasson, slökkviliðsstjóri SHS.
Sigurgeir Guðmundsson og Kristján Maack, Slysavarnafélaginu Landsbjörg.
Jyrki Landstedt, framkvæmdastjóri 112 í Finnlandi.
11. febrúar – 112 dagurinn
Slökkvilið, lögregla, björgunarsveitir, heilbrigðisstofnanir, Rauða kross deildir, Landhelgisgæslan og fleiri standa sameiginlega að því að kynna starf sitt með ýmsum hætti um allt land, meðal annars með því að fara með lest björgunartækja um borg og bæi og bjóða almenningi í opið hús.
Dagskrá á höfuðborgarsvæðinu
Kl. 12.00: Tilkomumikil lest á þriðja tug björgunartækja ekur frá Björgunarmiðstöðinni Skógarhlíð með blikkandi ljósum um Reykjavík, Kópavog, Garðabæ og Hafnarfjörð. Þyrla Landhelgisgæslunnar fylgir lestinni eftir úr lofti.
Kl. 13.00-16.00: Opið hús, tækjasýning og kynning á starfsemi viðbragðsaðila í Björgunarmiðstöðinni Skógarhlíð. Verðlaun í Eldvarnagetrauninni 2005 verða afhent kl. 13.30.
Kl. 13.00-16.00: Varðskip, björgunarskip, þyrla og fleiri björgunartæki til sýnis við Reykjavíkurhöfn.
Sambærilegir viðburðir hafa verið skipulagðir um allt land, svo sem á Akranesi, í Borgarnesi, í Snæfellsbæ, á Ísafirði, Blönduósi, í Skagafirði, á Akureyri, Þórshöfn, Vopnafirði, Fáskrúðsfirði, Stöðvarfirði, Djúpavogi, Höfn í Hornafirði, Selfossi og í Reykjanesbæ.
Verkefnisstjóri 112 dagsins er Garðar H. Guðjónsson.
Úr myndasafni: Þyrla Landhelgisgæslunnar lent við Smáralind og áhorfendur sópast að. Myndin er tekin á 112 deginum í fyrra.
Sjúkraflug björgunarþyrlunnar Lífar með slasaðan sjómann
Miðvikudagur 8. febrúar 2006.Líf, þyrla Landhelgisgæslunnar, flutti slasaðan sjómann á sjúkrahús í Reykjavík seinnipartinn í dag.
Skipstjórinn á frystitogaranum Frera hringdi í Vaktstöð siglinga/stjórnstöð Landhelgisgæslunnar kl. 13:47 og óskaði eftir aðstoð vegna skipverja sem hafði slasast um borð er gilskrókur lenti á honum. Skipverjinn hafði hlotið slæm beinbrot. Skipið var þá statt út af Víkurál um 60 sjómílur norðvestur af Bjargtöngum eða 160 sjómílur frá Reykjavík.
Áhöfn Lífar, þyrlu Landhelgisgæslunnar, var þegar kölluð út og fór þyrlan í loftið kl. 14:20. Hægviðri og ágætis skyggni var á leiðinni. Læknir og sigmaður sigu um borð í skipið, bjuggu um áverka hins slasaða og gáfu honum lyf áður en hann var hífður um borð í þyrluna en því var lokið um kl. 16.
Þyrlan lenti við Landspítala Háskólasjúkrahús í Fossvogi um kl. 17.Dagmar Sigurðardóttir
lögfræðingur/upplýsingaftr.
Viðræður um framhald varnarsamstarfs
Mánudagur 6. febrúar 2006.Í síðustu viku fóru fram viðræður í Washington í Bandaríkjunum um framhald varnarsamstarfs Íslands og Bandaríkjanna. Georg Kr. Lárusson, forstjóri Landhelgisgæslunnar, var einn af fulltrúum í sendinefnd íslenskra stjórnvalda.Eins og fram hefur komið í fréttum hafa íslensk stjórnvöld m.a. viðrað hugmyndir um að þyrlusveit Landhelgisgæslunnar taki að sér hluta af verkefnum varnarliðsins er lúta að leit og björgun. Mál þessi eru til skoðunar og mun Landhelgisgæslan ekki tjá sig frekar um þau að svo komnu máli og vísar á ráðuneyti dómsmála og utanríkismála þar sem þessi mál eru til umfjöllunar.Dagmar Sigurðardóttirlögfræðingur/upplýsingaftr.
Úr myndasafni LHG. Það er sjaldan sem mynd næst af báðum þyrlum Landhelgisgæslunnar á flugi í einu. Þessa mynd tók áhöfn danska varðskipsins Triton á sameiginlegri æfingu Landhelgisgæslunnar og varðskipsins.