Fréttir

Þriðjudagur 30. maí 2006.Hafréttarstofnun Íslands stendur fyrir málstofu um þorskastríðin þrjú 1. júní næstkomandi.  Sjá dagskrá og frekari upplýsingar á heimasíðu Háskóla Íslands á slóðinni:http://hi.is/Apps/WebObjects/HI.woa/wa/dp?detail=1006855&name=frettasida Starfsmannafélag Landhelgisgæslunnar hefur ákveðið að hóa saman Landhelgisgæslumönnum og gömlum þorskastríðshetjum í beinu framhaldi af málstofunni og birtist eftirfarandi auglýsing í Morgunblaðinu og Fréttablaðinu:Landhelgisgæslumenn / þorskastríðshetjur   Nú eru liðin 30 ár frá lokum þorskastríðsins síðasta. Af því tilefni ætla gamlar þorskastríðshetjur og núverandi starfsmenn Landhelgisgæslunnar að hittast á Kaffi Reykjavík fimmtudaginn 1. júní milli kl. 15:30 - 17:30 í beinu framhaldi af málstofu Hafréttarstofnunar Íslands um þorskastríðin þrjú. Allir aðrir áhugasamir eru velkomnir.   Starfsmannafélag Landhelgisgæslunnar. Úr myndasafni: Guðmundur H. Kjærnested þorskastríðshetja í brúnni á Tý.   Lesa meira

Þriðjudagur 30. maí 2006.   Björgunarþyrla Landhelgisgæslunnar, Líf, sótti í dag þrjá slasaða menn í suðurhlíðar Hvannadalshnjúks eftir að þeir höfðu lent í snjóflóði milli Dyrhamars og hnjúksins.    Mennirnir voru alls fimm á ferð en þrír þeirra slösuðust.  Talið er að einn þeirra hafi fótbrotnað og hinir slasast minna. Mennirnir voru líka þrekaðir eftir að hafa lent í snjóflóðinu og var talið nauðsynlegt að sækja þá hið fyrsta.  Áhöfn Lífar var kölluð út kl. 12:44 og fór þyrlan í loftið kl. 13:15.  Eftirlitsflugvél Landhelgisgæslunnar, Syn, var einnig send af stað en um borð voru auk áhafnarinnar, fallhlífarsveitarmenn frá Slysavarnarfélaginu Landsbjörg.  Syn þjónaði einnig þeim tilgangi að vera endurvarpsstöð fyrir fjarskipti milli björgunareininga. Líf var komin á svæðið um kl. 14:30 og gekk ekki vel í fyrstu að komast að slysstaðnum vegna slæms skyggnis.  Það fór svo að lokum að það rofaði til og Líf tókst að komast að mönnunum.  Sigmaður í áhöfn Lífar seig niður til þeirra og voru þrír þeirra, þeir slösuðu, fluttir um borð í þyrluna.  Hún flaug með mennina til Hafnar í Hornafirði en þar var tekin ákvörðun um að flytja þá með Syn, flugvél Landhelgisgæslunnar, til Reykjavíkur.  Flugvélin lendir á Reykjavíkurflugvelli um kl. 18:30.Dagmar Sigurðardóttirlögfræðingur/upplýsingaftr.Úr samhæfingarstöðinni í Björgunarmiðstöðinni Skógarhlíð í dag. Fremstir á myndinni eru Benóný Ásgrímsson yfirflugstjóri Landhelgisgæslunnar (LHG), Halldór Benóný Nellett framkvæmdastjóri aðgerðasviðs LHG og Ásgrímur L. Ásgrímsson yfirmaður stjórnstöðvar LHG/vaktstöðvar siglinga að bera saman bækur sínar. Myndina tók Guðmundur Fylkisson aðalvarðstjóri í fjarskiptamiðstöð lögreglunnar. Lesa meira

Laugardagur 27. maí 2006.Tveir menn létust í eldsvoða um borð í Akureyrinni EA-110 í dag.   Stjórnstöð Landhelgisgæslunnar/vaktstöð siglinga barst neyðarkall frá Akureyrinni EA-110 kl. 14:20 en skipið var þá 75 sjómílur vestur af Látrabjargi.  Áhöfn björgunarþyrlu Landhelgisgæslunnar, Lífar, var þegar kölluð út.  Einnig voru kallaðir út reykkafarar frá Slökkviliði höfuðborgarsvæðisins til að fara með þyrlunni. Um borð í Akureyrinni var 18 manna áhöfn.Líf fór í loftið kl. 14:57 og var komin að Akureyrinni um kl. 16:20.  Sigmaður úr áhöfn Lífar og reykkafarar frá Slökkviliði höfuðborgarsvæðisins um borð.  Fokker flugvél Landhelgisgæslunnar, Syn, fylgdi Líf til öryggis en hún fór í loftið kl. 16.  Líf flutti sex menn úr áhöfn Akureyrinnar til Reykjavíkur og voru þeir fluttir á sjúkrahús. Líf lenti í Reykjavík um kl. 19.  Eftirlitsskip danska sjóhersins, Triton, var einnig beðið um aðstoð og var þyrla þess var send af stað með fleiri slökkviliðsmenn frá Reykjavík.  Þyrla varnarliðsins á Keflavíkurflugvelli var einnig kölluð út og beið hún á Reykjavíkurflugvelli ef flytja þyrfti fleiri reykkafara. Ekki kom til þess að hún héldi í átt að skipinu. Aðstoð þyrlna varnarliðsins og danska sjóhersins var afturkölluð um kl. 18.Varðskipið Óðinn lagði strax af stað í átt að skipinu og var komið að Akureyrinni laust eftir  miðnætti. Varðskipið fylgir Akureyrinni til hafnar og er reiknað með að skipin komi til Hafnafjarðar í fyrramálið.Þrír togarar voru nærri Akureyrinni þegar eldur kom upp og héldu þegar í átt að skipinu. Það eru togararnir Júlíus Geirmundsson sem var næstur, Guðmundur í Nesi og Örvar.  Björgunarbátar á Vestfjörðum og Snæfellsnesi voru settir í viðbragðsstöðu. Akureyrin EA-110 er 900 brúttólesta skuttogari gerður út af Samherja á Akureyri.   Dagmar Sigurðardóttirlögfræðingur/upplýsingaftr.     Lesa meira

Föstudagur 26. maí 2006.Ýmsar breytingar eiga sér stað í starfsmannahaldi Landhelgisgæslunnar þessa dagana. Nýlega var tilkynnt ráðningu Höskuldar Ólafsson tæknistjóra í stað Odds Garðarssonar.  Ráðið hefur verið í fleiri stöður.  Á næstu vikum tekur Geirþrúður Alfreðsdóttir við starfi flugrekstrarstjóra Landhelgisgæslunnar. Geirþrúður hefur m.a. starfað sem flugstjóri hjá Icelandair, deildarstjóri flugöryggisdeildar Flugmálastjórnar Íslands og formaður rannsóknarnefndar flugslysa. Hún er m.a. með MBA gráðu frá Háskólanum í Reykjavík, C.S. próf í vélaverkfræði frá Háskóla Íslands og atvinnuflugmannspróf. Auk þess hefur hún sótt fjölda námskeiða í flugöryggismálum og flugslysarannsóknum.  Halldór Benóný Nellett hefur nú tekið við stöðu framkvæmdastjóra aðgerðasviðs af Kristjáni Þ. Jónssyni en skipherrar Landhelgisgæslunnar skiptast á að gegna þeirri stöðu í tvö ár í senn.  Halldór hefur verið skipherra á varðskipinu Ægi og nú tekur Kristján við stjórntaumunum þar um borð.  Báðir hafa þeir félagar starfað hjá Landhelgisgæslunni frá unglingsaldri.Arnbjörg Gunnlaugsdóttir hættir sem bókari Landhelgisgæslunnar og tekur við fulltrúastarfi í flugtæknideild Landhelgisgæslunnar. Í flugdeild er einnig nýráðinn fulltrúi Bergþóra Kristín Grétarsdóttir. Við bókarastarfinu tekur Rannveig Friðriksdóttir.Auk framangreindra breytinga er verið að ráða flugvirkja, flugmenn og skipstjórnarmenn til Landhelgisgæslunnar vegna aukinna verkefna.Dagmar Sigurðardóttirlögfræðingur/upplýsingaftr.   Lesa meira

Fimmtudagur 25. maí 2006.Áhöfn björgunarþyrlunnar Lífar sótti í dag pilt á 18 ári í hlíðar Esjunnar og flutti hann á Landspítala Háskólasjúkrahús í Fossvogi.Pilturinn hafði slasast er hann rann niður langan snjóskafl og gat ekki stöðvað sig áður en hann þeyttist niður í grjótskriðu og lenti þar harkalega í urðinni. Þetta gerðist fyrir neðan Þverfell í Esjunni um 100 metra fyrir neðan hamrana. Pilturinn var á skólaferðalagi með samnemendum sínum og kennurum. Pilturinn kvartaði undan eymslum í mjöðm og mjóbaki. Áhöfn björgunarþyrlunnar Lífar var kölluð út kl. 16:05 og var þyrlan komin á slysstað kl. 16:35.  Læknir og sigmaður sigu niður á slysstaðinn þar sem pilturinn beið ásamt ferðafélögum sínum.  Aðrar björgunarsveitir höfðu verið kallaðar út en voru ókomnar.Læknir og sigmaður gengu frá piltinum á bakbretti og í börur með aðstoð annarra ferðafélaga hans og var hann hífður beint af slysstað upp í þyrluna. Slysstaðurinn var í erfiðri skriðu og því ekki hægt með öruggu móti að færa hann þaðan fyrir flutning. Thorben Lund yfirstýrimaður og sigmaður í þessari ferð sagði allt hafa gengið vel þrátt fyrir erfiðar aðstæður.Þyrlan lenti við Landspítala Háskólasjúkrahús í Fossvogi um kl. 17:15: Dagmar Sigurðardóttirlögfræðingur/upplýsingaftr. Úr myndasafni. Björgunaræfing á Líf. Lesa meira

Miðvikudagur 24. maí 2006.Á fréttavefnum http://www.skip.is er vitnað í frétt á vefnum http://fishupdate.com í dag þar sem meðal annars er fjallað um sjóræningjaveiðar á Reykjaneshrygg og fleira. Eins og fréttin hefur verið þýdd á skip.is lítur út fyrir að fulltrúar Greenpeace hafi verið um borð í varðskipi Landhelgisgæslunnar en það er ekki rétt. Landhelgisgæslan hefur í dag fengið fjölmargar fyrirspurnir vegna fréttarinnar eins og hún birtist á skip.is.   Í fréttinni á fishupdate.com segir að Greenpeace hafi fyrir fyrir viku síðan ásamt íslensku Landhelgisgæslunni orðið vitni að veiðum 64 skipa sem voru að veiðum á alþjóðlega hafsvæðinu á Reykjaneshrygg í Norður-Atlantshafi.  Svæði sem sé þekkt fyrir viðkvæma kaldsjávarkórala.  Átta skipanna hafi verið á lista yfir sjóræningjaskip og þar á meðal hafi verið fimm skip sem Greenpeace hefur verið að fylgjast með.  Sum skipin hafi haft bæði flottroll og botntroll um borð.  Botntroll séu afskaplega skaðleg veiðarfæri sem sérfræðingar séu sammála um að eyðileggi hafsbotninn og hið viðkvæma og brothætta vistkerfi sjávarlífdýra sem þar þrífst.   Rétt er að talsmaður Greenpeace í Noregi, Martin Norman, hefur verið í sambandi við Landhelgisgæsluna undanfarnar vikur vegna frétta frá stofnuninni um sjóræningjaveiðar. Hann hefur fengið allar sömu upplýsingar og aðrir fréttamiðlar.  Myndir hafa mikið sönnunargildi varðandi framferði sjóræningjaskipa á Reykjaneshrygg og hafa ljósvakamiðlar og aðrir fjölmiðlar sýnt þessu ástandi á Reykjaneshrygg verðskuldaða athygli. Fulltrúi Greenpeace fékk að fljóta með í eftirlitsflug út á Reykjaneshrygg ásamt fulltrúum RUV og NFS sem tóku kvikmyndir af sjóræningjaskipum og öðrum skipum sem voru að veiðum á hryggnum fyrir viku síðan.   Greenpeace hefur beitt umdeildum aðferðum í aðgerðum sínum  gagnvart stjórnvöldum og útgerðum og dregur sínar ályktanir af staðreyndum sem Landhelgisgæslunni eru óviðkomandi.  Þar á meðal eru ályktanir Greenpeace varðandi kórala og veiðarfæri.  Í þessu tilfelli var ekki talið að það gæti skaðað að leyfa fulltrúa Greenpeace að sjá með eigin augum það sem fram fer á Reykjaneshrygg þar sem þess var sérstaklega óskað og enda vill svo til að það eru sameiginlegir hagsmunir Greenpeace og Íslands að komið verði í veg fyrir sjóræningjaveiðar á svæðinu.  Þess ber að geta að Landhelgisgæslan hefur ekki séð ástæðu til að hafa áhyggjur af kaldsjávarkórölum á Reykjaneshrygg og áhöfn eftirlitsflugvélarinnar Synjar varð ekki vör við að botntroll væru notuð á svæðinu enda er augljóst að botntroll eru ekki notuð á 2000 metra dýpi til veiða á úthafskarfa sem heldur sig á 6-800 metra dýpi.   Dagmar Sigurðardóttirlögfræðingur/upplýsingaftr. Lesa meira

Miðvikudagur 24. maí 2006.Eins og kunnugt er hafa svokallaðir sjóræningjar verið að veiðum á úthafskarfaslóð við lögsögumörkin á Reykjaneshrygg.  Þar veiða þeir án kvóta og leyfis Norðaustur-Atlantshafsfiskveiðiráðsins (NEAFC) sem fer með fiskveiðistjórn á svæðinu. Landhelgisgæslan framfylgir skuldbindingum íslenska ríkisins samkvæmt aðildarsamningi Íslands að ráðinu til að fara með eftirlit á svæðinu.Í fyrra vakti mikla athygli er Landhelgisgæslan náði myndum af flutningaskipinu Sunny Jane er það tók við afla úr einu sjóræningjaskipinu.  Það varð til þess að Sunny Jane fór á svarta listann hjá NEAFC og lenti m.a. í vandræðum við að koma aflanum frá sér og fá aðra þjónustu enda er bannað að veita skipum á svarta listanum þjónustu í aðildarríkjum NEAFC. Nýlega kom varðskipið Ægir að olíuskipi sem gerði sig líklegt til að selja einu af sjóræningjaskipunum á Reykjaneshrygg olíu.  Skipherra varðskipsins kallaði upp skipstjóra olíuskipsins og var honum gerð grein fyrir því að á svæðinu væru nokkur skip að veiðum án kvóta og þau væru á svarta listanum hjá NEAFC.  Skipstjóranum var jafnframt tilkynnt að ef hann seldi sjóræningjaskipi olíu myndi skip hans einnig lenda á svarta listanum því að bannað væri að veita þessum skipum þjónustu. Það gæti haft alvarlegar afleiðingar fyrir skipið og útgerð þess.  Hann virtist ekki vita að skipin hefðu verið að veiðum á svæðinu án kvóta.  Nöfn allra sjóræningjaskipanna voru síðan lesin fyrir skipstjóra olíuskipsins. Sagðist skipstjórinn ætla að ráðfæra sig við útgerðina.   Þegar hér var komið sögu átti sjóræningjaskipið skammt ófarið að olíuskipinu til olíutöku en olíuskipið hætti við að selja því olíu.  Næstu daga fylgdist varðskipið grannt með ferðum olíuskipsins og kom í ljós að það átti eingöngu viðskipti við lögleg skip á svæðinu.  Þremur dögum seinna sást olíuskipið stefna til suðausturs á fullri ferð. Skipherra varðskipsins hafði samband við skipstjóra olíuskipsins og sagði hann að eigendur olíuskipsins hefðu tekið ákvörðun um að afgreiða ekki sjóræningjaskipin.  Aðgerðir varðskipsins báru tilætlaðan árangur í þetta skiptið hvað sem síðar verður. Eflaust munu sjóræningjaskipin gera frekari tilraunir til að afla sér eldsneytis.   Varðskip Landhelgisgæslunnar og flugvélin Syn hafa aflað mikilvægra upplýsinga fyrir Norðaustur-Atlantshafsráðið í eftirlitsferðum um svæðið, m.a. náð ljósmyndum af brotum og gert skýrslur um athafnir sjóræningjaskipa.  Þessi gögn eru síðan lögð til grundvallar þegar skip eru sett á svarta lista NEAFC.   Landhelgisgæslan reynir eftir fremsta megni að hafa skip á svæðinu á meðan á karfaveiðum stendur og hefur einnig eftirlit úr lofti.  Fleiri þjóðir senda þangað eftirlitsskip og hafa þau góða samvinnu.  Dolphin á leið til olíuskipsins. Mynd: Halldór Benóný Nellett.Dolphin siglir í burtu frá olíuskipinu án þess að hafa fengið þjónustu. Mynd: Halldór Benóný Nellett.Dagmar Sigurðardóttir lögfræðingur/upplýsingaftr.Halldór Benóný Nellett framkvæmdastjóri aðgerðasviðs.   Lesa meira

Miðvikudagur 24. maí 2006 Áhöfn björgunarþyrlunnar Lífar var kölluð út með bráðaútkalli kl. 18:20 eftir að tilkynnt hafði verið um slys í Úthlíð.  Veggur hafði fallið á tvo menn og var óttast að annar þeirra væri mjaðmagrindarbrotinn.  Flugvirki og flugmaður voru staddir úti á flugvelli þegar kallið kom og voru búnir að setja þyrluna í gang þegar stýrimaður og læknir komu á staðinn þannig að þyrlan gat farið í loftið kl. 18:30 eða 10 mínútum eftir útkall. Þyrlan lenti svo í Úthlíð um kl. 18:54 þar sem slasaði maðurinn beið í sjúkrabíl. Búið var að setja hinn slasaða á bakbretti og í börur og undirbúa hann undir flugið þegar þyrlan kom og gat hún því haldið aftur til baka til Reykjavíkur kl. 19:02.  Líf lenti við Landspítala Háskólasjúkrahús í Fossvogi um kl. 19:20.Dagmar Sigurðardóttir lögfræðingur/upplýsingaftr. Lesa meira

Þriðjudagur 23. maí 2006.Dóms- og kirkjumálaráðuneytið gaf í dag út eftirfarandi fréttatilkynningu: Ríkisstjórn Íslands samþykkti á fundi sínum í morgun tillögu dóms- og kirkjumálaráðherra um að gengið verði til samninga um leigu á tveimur þyrlum af sambærilegri gerð og nú eru í rekstri hjá Landhelgisgæslunni, til viðbótar við þær tvær þyrlur sem nú þegar eru í rekstri hjá stofnuninni. Miðað er við að þyrlurnar verði komnar til landsins eigi síðar en í september nk. Samhliða er unnið að því að ráða til Landhelgisgæslunnar fleira starfsfólk þannig að unnt verði að halda úti tveimur þyrluvöktum allan sólarhringinn allan ársins hring og tryggja eftir því sem unnt er óskerta þyrlubjörgunargetu hér á landi við brotthvarf varnarliðsins frá landinu. Á fundi ríkisstjórnarinnar 18. apríl sl. voru samþykktar tillögur dóms- og kirkjumálaráðherra um eflingu þyrlusveitar Landhelgisgæslu Íslands. Í tillögunum felst að leigðar verði til landsins tvær þyrlur af sambærilegri gerð og nú eru í rekstri hjá landhelgisgæslunni, starfsfólki hjá Landhelgisgæslunni verði fjölgað þannig að unnt verði að reka fleiri þyrlur og halda úti tveimur þyrluvöktum allan sólarhringinn allan ársins hring o.fl. Á undanförnum vikum hefur á vegum dómsmálaráðuneytisins og Landhelgisgæslunnar og með aðild utanríkisráðuneytisins og sendiráða Íslands verið kannað ítarlega hjá opinberum aðilum og einkaaðilum um heim allan, hvort þyrlur af sambærilegri gerð og nú eru í rekstri hjá Landhelgisgæslunni séu til reiðu frá og með september 2006. Einkum hefur framboð á Super Puma þyrlum verið kannað, þar sem flugdrægi þeirra og björgunargeta er mun meiri en Dauphin þyrla, en Landhelgisgæslan rekur nú þyrlur af þessum gerðum. Í ljós hefur komið að afar erfitt er að fá leigðar þyrlur með svo skömmum fyrirvara. Þó liggja fyrir tilboð um leigu á tveimur vélum, af Super Puma og Dauphin gerð, og samþykkti ríkisstjórnin á fundi sínum í morgun að gengið yrði til samningaviðræðna við umrædda tilboðsgjafa. Enn er þó beðið svara frá opinberum erlendum aðila og er samþykki ríkisstjórnarinnar því með fyrirvara um aðra kosti verði þeir í boði. Gert er ráð fyrir að samið verði um leigu á umræddum þyrlum til eins árs með mögulegri framlengingu um hálft til eitt ár. Hér er um bráðabirgðalausn að ræða en að því stefnt að tillögur um framtíðarskipulag liggi fyrir í næsta mánuði.Líf og Sif á flugi. Úr myndasafni. Mynd: Áhöfn Triton, eftirlitsskips danska sjóhersins.   Lesa meira

Þriðjudagur 23. maí 2006. Sjómælingasvið Landhelgisgæslunnar sér bæði um sjómælingar og sjókortagerð af hafinu umhverfis Ísland.  Þetta er afar mikilvægur þáttur í öryggismálum sjófarenda því að nákvæm sjókort eru grundvöllur öruggra siglinga. Nauðsyn á nákvæmum sjókortum verður meiri ár frá ári því að sífellt stærri og djúpristari skip sigla við strendur landsins. Landhelgisgæslan hefur haft fjölgeislamæli (multibeam) til umráða undanfarin ár og hefur það flýtt talsvert fyrir mælingum á grunnsævi.  Er áhöfn Baldurs var við mælingar í fyrstu mælingaferð sumarsins með fjölgeislamæli út af Stórhöfða sl. laugardag fannst áður óþekkt grunn með 9.8 metra dýpi. Eldri dýptarmælingar sem eru frá árinu 1961 sýndu 22 og 23 metra dýpi á svæðinu. Tveir kunnir Vestmannaeyingar þeir Friðrik Ásmundsson fyrrverandi skólastjóri Stýrimannaskólans í Vestmannaeyjum og Guðjón Ármann Eyjólfsson fyrrverandi skólastjóri Stýrimannaskólans í Reykjavík hafa ekki haft spurnir af þessum neðansjávardrangi. Áætlað er að áhöfn Baldurs verði við mælingar fram yfir mánaðarmót við Vestmannaeyjar en veður hefur hamlað mælingum síðustu daga.Dagmar Sigurðardóttir lögfræðingur/upplýsingaftr.Hilmar Helgason framkvæmdastjóri sjómælingasviðs.Kort: sjómælingasvið LHG. Lesa meira

Þriðjudagur 23. maí 2006.Í gær hóf Höskuldur Ólafsson störf sem tæknistjóri flugdeildar Landhelgisgæslu Íslands og er hann boðinn velkominn til starfa. Höskuldur hefur síðustu árin starfað hjá Flugmálastjórn en áður starfaði hann hjá Íslandsflugi.  Hann hefur víðtæka reynslu af flugvirkjun og stjórnun og þekkir mjög vel til þeirra krafna sem gerðar eru varðandi viðhald loftfara.Meðal fyrstu verkefna Höskuldar er að ráða fleiri flugvirkja til starfa í deildinni í samráði við framkvæmdastjóra rekstrarsviðs en verkefni flugtæknideildar Landhelgisgæslunnar munu aukast verulega í kjölfar leigu á tveimur þyrlum sem dómsmálaráðuneytið tilkynnti um í dag.Dagmar Sigurðardóttirlögfræðingur/upplýsingaftr.Höskuldur Ólafsson tæknistjóri Landhelgisgæslu Íslands. Lesa meira

Mánudagur 22. maí 2006.   Fimm skipstjórnarmenn frá Landhelgisgæslunni útskrifuðust af 4. stigi (varðskipadeild) skipstjórnarsviðs Fjöltækniskólans síðastliðinn laugardag.  Einn þeirra útskrifaðist sem stúdent um leið.   Þetta telst til tíðinda því að nú eru liðin 12 ár frá síðustu útskrift þessarar deildar en 4. stigið hefur ekki verið haldið síðan þá.Auk skipstjórnarmanna Landhelgisgæslunnar sem útskrifuðust sem lávarðar (Lordar), eins og það er kallað, tóku þrír utangæslumenn þetta próf og tveir þeirra útskrifuðust sem stúdentar um leið.  Landhelgisgæslan fagnar þessum áfanga enda var orðin brýn þörf á fleiri foringjaefnum í flota Gæslunnar.  Mikilvægt er fyrir Landhelgisgæsluna að skipherrar séu vel menntaðir og vel að sér varðandi nýjustu tækni í þeirri öru þróun sem á sér stað og tengist starfsemi Landhelgisgæslu Íslands í dag.Sjá frásögn af námi Lávarðanna í Fjöltækniskólanum á heimasíðu Landhelgisgæslunnar á slóðinni:/displayer.asp?cat_id=4&module_id=220&element_id=2839Meðfylgjandi myndir tók Jón Kr. Friðgeirsson bryti á varðskipinu Tý (nú Óðni) er boð fyrir lávarðana var haldið um borð í Óðni í framhaldi af útskriftinni á laugardaginn.Dagmar Sigurðardóttirlögfræðingur/upplýsingaftr.   Lávarðarnir ásamt skipherranum á Óðni, þar sem útskriftarveislan var haldin, og forstjóranum.  Frá vinstri: Einar H. Valsson skipherra, Pálmi Jónsson (einnig stúdent), Jón Páll Ásgeirsson, Guðmundur Rúnar Jónsson, Gunnar Örn Arnarson, Friðrik Höskuldsson og Georg Kr. Lárusson forstjóri.   Lávarðarnir fimm og þar með skipherraefni Landhelgisgæslunnar: Pálmi Jónsson, Jón Páll Ásgeirsson, Guðmundur Rúnar Jónsson, Gunnar Örn Arnarson og Friðrik Höskuldsson  Á þessa mynd hafa bæst við þrír lávarðar, sem reyndar starfa ekki hjá Landhelgisgæslunni (a.m.k. ekki enn), en þeir eru í hvítu skyrtunum og frá vinstri eru það Sigurður Steinar Jónsson, Andri Leifsson og Pétur Pétursson. Lesa meira

Miðvikudagur 17. maí 2006. Leit að Pétri Þorvarðarsyni, 17 ára gömlum Egilsstaðabúa, hefur enn engan árangur borið.  Landhelgisgæslan hefur tekið þátt í leitarstörfum með því að senda stýrimann með þyrlu af danska eftirlitsskipinu Triton og einnig hefur þyrla Varnarliðsins komið að leitinni samkvæmt samningi við Landhelgisgæsluna.  Syn, flugvél Landhelgisgæslunnar, hefur flutt björgunarsveitarmenn frá Reykjavíkursvæðinu austur og til baka aftur auk leitarhunda.  Meðfylgjandi myndir tók Thorben J. Lund yfirstýrimaður hjá LHG úr þyrlu danska eftirlitsskipsins Tritons meðan á leitinni stóð.Fyrirhugað er að Landhelgisgæslan taki virkan þátt í leitinni sem skipulögð hefur verið um helgina.Dagmar Sigurðardóttirlögfræðingur/upplýsingaftr.Stór hluti leitarsvæðisins sést á þessari mynd sem tekin var úr þyrlu Tritons, eftirlitsskips danska sjóhersins.Danski sjóherinn hefur ávallt brugðist mjög vel við beiðnum Landhelgisgæslunnar um aðstoð og útvegaði að þessu sinni björgunarþyrlu með áhöfn í 50 klukkustundir til leitarinnar. Leitað milli hamraveggja í gljúfrinu fyrir ofan Dettifoss. Lesa meira

Miðvikudagur 17. maí 2006.Nýverið auglýsti Landhelgisgæslan laus störf til umsóknar vegna aukinna umsvifa í rekstri í kjölfar ákvörðunar ríkisstjórnarinnar um að fjölga þyrlum og þannig efla þyrlusveit Landhelgisgæslunnar samkvæmt tillögu Björns Bjarnasonar dóms- og kirkjumálaráðherra. Auglýst var eftir flugrekstrarstjóra, þyrluflugmönnum, flugvirkjum, stýrimönnum og starfsmanni á lager og rann umsóknarfrestur út þann 8. maí sl.  Alls bárust Landhelgisgæslunni um 120 umsóknir um þessi störf.  Áður hafði verið auglýst starf skrifstofumanns á flugvelli og bárust 30 umsóknir um það starf.   Tæplega 20 manns sóttu um stöðu flugrekstrarstjóra en það starf felur í sér daglega stjórnun og ábyrgð á flugrekstri Landhelgisgæslunnar.   Rúmlega 30 umsóknir bárust um störf þyrluflugmanna en þar er um að ræða full störf á vöktum.  Ríflega 60 umsóknir bárust vegna starfa í flugtæknideild, en auglýst voru laus til umsóknar störf flugvirkja/flugvirkjanema, flugvirkja í viðhaldsskipulagningu og starfsmanns á varahlutalager.  Af þessum umsóknum voru rúmlega 50 vegna flugvirkja/flugvirkjanema en gert var ráð fyrir að viðkomandi umsækjendur væru jafnframt reiðubúnir að gegna starfi spilmanns á þyrlum og stæðust þannig kröfur Landhelgisgæslunnar um þjálfun, líkamlegt og andlegt atgervi.   Þá bárust 10 umsóknir um stöðu stýrimanna.  Var gert ráð fyrir að þeir umsækjendur gætu jafnt sinnt störfum um borð í varðskipum, í flugdeild eða öðrum deildum Landhelgisgæslunnar og sem stýrimenn/sigmenn í þyrluáhöfn.  Þurfa þeir þannig að standast kröfur Landhelgisgæslunnar um þjálfun, líkamlegt og andlegt atgervi.   Þessa dagana á sér stað vinna í því að yfirfara umsóknir og boða til viðtala sem og önnur úrvinnsluvinna.  Um er að ræða nokkuð langt og strangt ferli en gert er ráð fyrir að því ljúki fyrir mánaðamót og að gengið verði frá ráðningum í kjölfar þess.  Sólmundur Már Jónsson framkvæmdastjóri rekstrarsviðs Úr myndasafni. Lesa meira

Þriðjudagur 16. maí 2006.Fundur Norrænu sjómælingastofnanna (Nordic Hydrographic Commission) var nýlega haldinn í Longyearbyen á Svalbarða. Fulltrúar allra norrænu stofnananna mættu auk tveggja fulltrúa  frá skrifstofu Alþjóðasjómælingastofnunarinnar í Monaco. Þessi fundur NHC var sá fimmtugasti og þótti við hæfi að hafa hann á Svalbarða en NHC eru elstu svæðasamtök Alþjóðasjómælingastofnunarinnar. Af  Íslands hálfu mættu Georg Kr. Lárusson forstjóri og Hilmar Helgason framkvæmdastjóri sjómælingasviðs. Á fundinum voru rædd ýmis mál og verkefni sem snúa að sjómælingum og sjókortagerð.   Helstu verkefni  Svíþjóðar, Danmerkur og Finnlands eru dýptarmælingar og sjókortagerð í Eystrasalti samkvæmt áætlun er nefnist HELCOM (The Helsinki Commission). HELCOM er samstarfsverkefni allra landa sem liggja að Eystrasalti og lýtur að öllum þáttum öruggra siglinga og umhverfisverndar.   Norðmenn eru að endurmæla og kortleggja allar helstu siglingaleiðir með ströndum Noregs en verkefnið hófst árið 2000 og er áætlað að því ljúki árið 2008. Norðmenn hafa einnig ákveðið að ráðast í viðamikið verkefni sem þeir kalla MAREANO og lýtur að fjölgeislamælingum með mikilli upplausn (high-resolution) við Lofoten og syðri hluta Barentshafs á svæði sem þekur 142 000 km2.   MAREANO er samstarfsverkefni nokkurra norskra stofnana og varðar margskonar rannsóknir á sjávarbotninum. MAREANO verkefnið svipar til SeaMap tilraunaverkefnis sem Kanadamenn gerðu á árunum 1998 og 1999 á German Bank, Nova Scotia. Eftir að fjölgeislamælingarnar höfðu verið gerðar kom í ljós að fiskibáturinn Anne S. Pierce sparaði umtalsverða fjármuni og tíma við veiðar á sínum kvóta. Við veiðarnar 1999 var notast við mynd (imagery) sem gerð var eftir fjölgeislamælingum en myndin var sett sem bakgrunnur í sjókortið. Niðurstöður tilraunarinnar sjást í töflunni hér að neðan:  Nágrannaþjóðir okkar eru einnig að vinna að rannsóknum og áhættumati vegna áætlunar um aukna skipaumferð um Norður-Íshafið og Grænlandssund. Norðmenn óttast mjög aukna skipaumferð við norður Noreg og Danir undirbúa aukna umferð um Grænlandssund.  Hilmar Helgasonframkvæmdastjóri sjómælingasviðs Lesa meira

Þriðjudagur 16. maí 2006.Viðbúnaður hér á landi miðast við það að alltaf sé til staðar þyrla til leitar- og björgunarstarfa. Að stærstum hluta er þessu verkefni í dag sinnt af Landhelgisgæslunni en einnig af þyrlubjörgunarsveit varnarliðsins á Keflavíkurflugvelli samkvæmt sérstökum samningi milli Landhelgisgæslunnar og varnarliðsins. Þá er einnig í gildi samstarfssamningur við Dani, sem tryggir nýtingu þeirra tækjabúnaðar þegar hann er til reiðu í nágrenni við landið. Þessi viðbúnaður hefur tryggt undanfarin ár að alltaf hefur verið til reiðu þyrla til björgunarstarfa hér á landi.Sem betur fer hefur að jafnaði gengið ágætlega að reka þyrlurnar Landhelgisgæslunnar undanfarin ár eins og sjá má af öllum þeim tilfellum þar sem þær hafa komið til bjargar. Viðhald á þyrlum er fyrirfram ákveðið að jafnaði út frá flugtímum og kröfum framleiðanda sem setur vissar öryggiskröfur.  Þessar öryggiskröfur eiga að draga úr hættu á slysum. Hugmyndin er að reglulegt viðhald samkvæmt fyrirfram ákveðnum stöðlum dragi úr líkum á að hlutirnir bili en þó er aldrei hægt að koma alveg í veg fyrir bilanir.  Þyrlur Landhelgisgæslunnar hafa ekki verið óeðlilega mikið frá vegna viðhalds og bilana ef miðað er við þyrlubjörgunarsveitir í nágrannalöndunum. Björn Bjarnason dómsmálaráðherra og ríkisstjórnin eru nú af fullum krafti að vinna í eflingu flugdeildar Landhelgisgæslunnar í framhaldi af því að ljóst er orðið að við Íslendingar getum innan skamms ekki lengur reitt okkur á Varnarliðið í þessum efnum.  Viðbúnaður Landhelgisgæslunnar hefur hingað til tekið mið af þeirri staðreynd að Varnarliðið er hér til aðstoðar ef á þarf að halda en nú er augljóslega stefnt að því að Landhelgisgæslan geti alfarið séð um þessi mál í framtíðinni.  Dagmar Sigurðardóttirlögfræðingur/upplýsingaftr. Úr myndasafni.  Sif og Lif á flugi. Mynd: áhöfn danska eftirlitsskipsins Tritons. Lesa meira

Mánudagur 15. maí 2006.Drifbúnaður stærri björgunarþyrlu Landhelgisgæslunnar, Lífar, bilaði síðastliðinn föstudag.  Áætlað er að vélin geti orðið flughæf næstkomandi miðvikudag. Björgunarþyrlan Sif er í Stavanger í Noregi og hefur verið frá því fyrir páska í nauðsynlegum endurbótum. Því varð ekki frestað lengur. Vélin er væntanleg til landsins 21. eða 22. maí. Viðhald á þyrlum er fyrirfram ákveðið að jafnaði út frá flugtímum og kröfum framleiðanda sem setur vissar öryggiskröfur.  Þessar öryggiskröfur eiga að draga úr hættu á slysum. Hugmyndin er að reglulegt viðhald samkvæmt fyrirfram ákveðnum stöðlum dragi úr líkum á að hlutirnir bili en þó er aldrei hægt að koma alveg í veg fyrir bilanir.Vegna þessa hefur Landhelgisgæslan notið aðstoðar þyrlu danska sjóhersins við leit um helgina en Landhelgisgæslan er með gagnkvæman samning við danska sjóherinn um aðstoð við leit og björgun. Dagmar Sigurðardóttirlögfræðingur/upplýsingaftr.   Lesa meira

Mánudagur 15. maí 2006.Vaktstöð siglinga var með opið hús fyrir starfsmenn Landhelgisgæslunnar síðastliðinn föstudag en þá var liðið ár frá því að stjórnstöð Landhelgisgæslunnar flutti frá Seljavegi 32 yfir í Skógarhlíð 14 og sameinaðist Tilkynningarskyldunni og fl. í Vaktstöð siglinga í Björgunarmiðstöðinni Skógarhlíð.  Önnur starfsemi Landhelgisgæslunnar, þ.á.m. skrifstofur og sjómælingasvið, fluttu ekki fyrr en í janúar á þessu ári í Björgunarmiðstöðina.Starfsmenn Landhelgisgæslunnar mættu vel á opna húsið og kynntu sér starfsemi Vaktstöðvarinnar eins og sjá má á meðfylgjandi myndum sem Jón Páll Ásgeirsson stýrimaður hjá Landhelgisgæslunni tók af þessu tilefni.Landhelgisgæslan fer með faglega stjórnun í Vaktstöð siglinga og rekur stjórnstöð sína úr húsakynnum Vaktstöðvarinnar. Allir starfsmenn Vaktstöðvar siglinga eru starfsmenn Landhelgisgæslunnar. Neyðarlínan sér hins vegar að hluta til um tæknilegan rekstur stöðvarinnar, húsnæðismál og fjármál. Þetta fyrirkomulag er samkvæmt þjónustusamningi við Siglingastofnun um rekstur Vaktstöðvar siglinga.  Sjálfvirka tilkynningarskyldan, sem áður var hjá Slysavarnarfélaginu Landsbjörgu, er nú starfrækt innan Vaktstöðvar siglinga samhliða fjareftirliti Landhelgisgæslunnar með fiskiskipium og öðrum fjölbreytilegum verkefnum sem Landhelgisgæslan hefur. Dagmar Sigurðardóttirlögfræðingur/upplýsingaftr. Ásgrímur L. Ásgrímsson yfirmaður Vaktstöðvar siglinga, Þórður Gíslason sjókortagerðarmaður og Pálmi Jónsson stýrimaður á varðskipinu Ægi fylgjast með kynningu á sjálfvirku tilkynningarskyldunni.Bergþór Atlason varðstjóri í Vaktstöð siglinga sýnir Árna Vésteinssyni deildarstjóra sjókortadeildar, Níelsi Finsen verkefnisstjóra rafrænna sjókorta og Sigríði Rögnu Sverrisdóttur sjókortagerðarmanni fjarskiptahluta stöðvarinnar.  Í bakgrunni glittir í Benóný Ásgrímsson yfirflugstjóra og Sigurð Ásgrímsson fagstjóra sprengjudeildar með meiru.   Lesa meira

Mánudagur 15. maí 2006.Þyrla danska sjóhersins frá eftirlitsskipinu Triton hélt af stað norður í land kl. 20:50 í gærkvöldi vegna leitar að ungum manni sem hafði verið týndur á Möðrudalsöræfum frá því kl. 1 nóttina áður. Yfirstýrimaður frá flugdeild Landhelgisgæslunnar fór með þyrlunni norður til að aðstoða við leitina.  Er þyrlan kom norður var strax hafist handa við að skipuleggja leitina en þegar til kom var ekki hægt að fljúga þyrlu á svæðinu vegna snjókomu og lélegs skyggnis.Flugvél Landhelgisgæslunnar, Syn, flaug einnig norður kl. 6:20 í morgun með 20 björgunarsveitarmenn frá Reykjavík og leitarhund. Tritonþyrlan fór í loftið frá Akureyri milli kl. 8 og 9 í morgun og hóf leit.  Þyrla Varnarliðsins var síðan ræst út eftir hádegið og fór í loftið um kl. 14:50.  Hún var komin á leitarsvæðið um fjögurleytið og er þar enn.  Um klukkan 14 kom í ljós að eldsneytisbíll sem koma átti með eldsneyti fyrir dönsku þyrluna bilaði á leiðinni til Grímsstaða og sá því Varnarliðsþyrlan ein um leitina eftir það. Landhelgisgæslan og Olíufélagið Skeljungur hafa gert ráðstafanir til að flytja eldsneyti fyrir þyrluna á svæðið.Syn, eftirlitsflugvél Landhelgisgæslunnar, er væntanleg til Húsavíkurflugvallar um kl. 17:30 með fleiri björgunarsveitarmenn til leitar og munu björgunarsveitarmenn, sem fóru með vélinni í morgun, geta flogið með henni til baka.Dagmar Sigurðardóttirlögfræðingur/upplýsingaftr. Lesa meira

Föstudagur 12. maí 2006.Eins og flestir vita eru varðskip Landhelgisgæslunnar búin fallbyssum enda fátt annað sem getur fengið erlenda skipstjóra sem stunda ólöglega starfsemi á hafinu til að hlýða nema ógnin sem stafar frá þeim. Vegna þessa þurfa varðskipsmenn að halda sér í þjálfun og æfa sig reglulega í að nota fallbyssurnar. Landhelgisgæslan mun að öllum líkindum hætta rekstri Óðins í núverandi mynd á þessu ári og því má búast við að fallbyssuæfing nú í byrjun mánaðar hafi verið sú síðasta á varðskipinu Óðni. Með æfingunni þjálfaði vopnasveit varðskipsins sig í notkun fallbyssunnar og um leið lagði fagstjóri sprengjusveitar Landhelgisgæslunnar, sem hélt æfinguna, mat á hæfni starfsmanna til að beita henni. Einnig gafst nemendum á 4. stigi skipstjórnarsviðs Fjöltækniskólans, svokölluðum lávörðum, tækifæri til að fylgjast með æfingunni. Skipherrann á varðskipinu Óðni, Einar H. Valsson, var ánægður með hvernig æfinginn heppnaðist en m.a. var farið yfir hvaða varúðarráðstafanir þarf að gera þegar hleypt er af svo öflugu vopni.<Myndirnar tók Jón Páll Ásgeirsson stýrimaður.Adrian King                  fagstjóri sprengjusveitar Lesa meira

Föstudagur 12. maí 2006.Syn, eftirlitsflugvél Landhelgisgæslunnar, fór í gæsluflug í morgun m.a. til að kanna ástandið á úthafskarfaslóð á Reykjaneshrygg.  Á meðfylgjandi myndum má sjá sjóræningjaskipið Evu, sem skráð er í Georgíu, með veiðarfærin úti.   Í eftirlitsfluginu sáust auk sjóræningjaskipsins Evu fleiri sjóræningjaskip frá Georgíu en það eru Carmen, Rosita, Juanita, Pavlovsk, Dolphin, Ulla og Isabella.  Aflabrögð á svæðinu eru sæmileg að sögn skipstjóra sem eru þar að karfaveiðum.Eins og áður hefur komið fram getur Landhelgisgæslan ekki fært erlenda togara, sem stunda ólöglegar veiðar á úthafinu, til hafnar en tilkynnt verður um athafnir þeirra til Norðaustur-Atlantshafsfiskveiðiráðsins sem gerir viðeigandi ráðstafanir.  Skipin fara á svartan lista og það verður til þess að þau eiga ekki að fá neina þjónustu í höfnum aðildarríkja ráðsins. Þar er um að ræða Evrópusambandslöndin öll, Rússland, Eistland, Færeyjar, Grænland og Noreg auk Íslands. Sjá heimasíðu Norðaustur-Atlantshafsfiskveiðiráðsins - NEAFC á slóðinni:http://neafc.org/ Dagmar Sigurðardóttirlögfræðingur/upplýsingaftr.Sjóræningjaskipið Eva. Mynd LHG/áhöfn Synjar, eftirlitsflugvélar Landhelgisgæslunnar.Sjóræningjaskipið Eva. Mynd LHG/áhöfn Synjar, eftirlitsflugvélar Landhelgisgæslunnar.   Lesa meira

Mánudagur 8. maí 2006.Gumbi Reuben Tendai Gumbi eða GG, sem hann segir vini sína kalla sig, hefur verið við nám og störf hjá Landhelgisgæslunni í tvær vikur en fór heim á leið í gær sunnudag. Gumbi, sem er 27 ára tæknifræðingur frá Malaví, ferðaðist hingað norður eftir til að njóta leiðsagnar á sjómælingasviði Landhelgisgæslunnar í sjókortagerð og notkun tölvubúnaðar sviðsins við það verk. Ferðalag Gumba til Íslands tengist samstarfsverkefni Þróunarsamvinnustofnunar Íslands og Mælinga- og kortagerðarstofnunar Malaví sem hófst árið 2001 og lauk formlega í árbyrjun 2005. Samkvæmt samningnum annaðist Landhelgisgæslan faglega ráðgjöf og tækniaðstoð í kortlagningu á Malavívatni en framkvæmdin var í höndun Mælingastofnunar Malaví með fjárstuðningi og undir eftirliti frá Þróunarsamvinnustofnunar Íslands. Samningurinn við Landhelgisgæsluna um tækniaðstoð og faglega ráðgjöf var framlengdur til tveggja ára. Gumbi hafði ekki áður ferðast utan síns heimalands.  Hann hafði á orði að sér þætti bílamergðin í Reykjavík ótrúleg, í ekki fjölmennari borg.  Hann hafði heldur aldrei ferðast með flugvél og að sjálfsögðu aldrei fyrr séð snjó og var ánægður með dvölina á Íslandi.Árni Vésteinsson deildarstjóri sjókortadeildar LHG. Á myndinni er Gumbi ásamt Árna Þór Vésteinssyni deildarstjóra sjókortadeildar en þeir notuðu vikurnar tvær til að spá í framsetningu dýptarupplýsinga og kortagerð af Malavívatni. Mynd DS.       Lesa meira

  Mynd: Hluti æfingastjórnar Nordred að störfum í húsnæði Almannavarnadeildar Ríkislögreglustjórans í Skógarhlíð 14, Reykjavík.  Frá vinstri: Tor Eivind Moss yfirmaður í björgunarmiðstöðinni í Stavangri í Noregi en hann hafði yfirumsjón með æfingunni fyrir hönd samnorrænu samtakanna Nordred, Auðunn F. Kristinsson yfirstýrimaður hjá Landhelgisgæslunni. Hann lék ýmis hlutverk í æfingunni, þ.á.m. sem skipherra varðskips á vettvangi. Leikur hans var sannfærandi að sögn félaga hans sem tóku þátt í æfingunni, Einar Sigurgeirsson varðstjóri í stjórnstöð Landhelgisgæslunnar/vaktstöð siglinga en hann bar hitann og þungann af skipulagi æfingarinnar af hálfu Landhelgisgæslunnar og að síðustu Bára Benediktsdóttir hjúkrunarfræðingur sem kom að skipulagi æfingarinnar af hálfu Landlæknisembættisins. Kristján Þ. Jónsson framkvæmdastjóri aðgerðasviðs Landhelgisgæslunnar í samhæfingarstöðinni í Skógarhlíð. Hlutverk hans var að stjórna að gerðum Landhelgisgæslunnar. Harald Holsvik varðstjóri í stjórnstöð LHG/vaktstöð siglinga og Hjalti Sæmundsson aðalvarðstjóri í stjórnstöð LHG/vaktstöð siglinga en þeir voru báðir á fullu að samhæfa aðgerðir Landhelgisgæslunnar á starfsstöðvum LHG/vaktstöðvar siglinga í samhæfingarstöðinni. Lesa meira

Sunnudagur 7. maí 2006. Fyrir helgina lauk viðamikilli norrænni björgunaræfingu sem Landhelgisgæslan tók virkan þátt í en æfingin er haldin á vegum Nordred - norræns samstarfs um björgunarmálefni:Þema æfingarinnar var slys um borð í 86 þúsund tonna norsku skemmtiferðaskipi með um 1000 farþega og 700 manna áhöfn um borð.  Farþegarnir eru frá Norðurlöndunum en einnig frá öðrum ríkjum Evrópu, Norður-Ameríku og Asíu.  Þegar skipið er statt skammt norður af Vestfjörðum verður sprenging í aðaleldhúsi þegar farþegar og áhöfn snæða morgunverð. Fólk deyr og slasast og margir björgunaraðilar frá Íslandi koma til hjálpar. Á heimasíðu Almannavarnadeildar Ríkislögreglustjóra er fjallað um þetta norræna samstarf en þar segir m.a.: Almannavarnadeild ríkislögreglustjórans fer með samstarf í leitar- og björgunarmálum er leiðir af aðild Íslands að Norræna björgunarsamningnum (NORDRED ramavtalen) sem í daglegu máli gengur undir nafninu NORDRED.  Samnorræn framkvæmdanefnd (NORDRED kontaktgruppen) er vettvangur reglulegra funda fulltrúa Norðurlandanna og stýrir samstarfinu.  Þjóðirnar skiptast á um formennsku til þriggja ára í senn og lýkur hverju tímabili með því að haldin er norræn björgunarráðstefna og gjarnan æfing tengd henni.  Ísland hefur farið með formennsku í NORDRED frá því í maí 2003 og (skilaði henni til Finna á ráðstefnunni og æfingunni nú í byrjun maí.)  Meginmarkmið ráðstefnunnar er að styrkja samstarf og samskipti milli norrænna björgunaryfirvalda á grundvelli NORDRED samningsins.  Dagmar Sigurðardóttirlögfræðingur/upplýsingaftr. Hluti æfingastjórnar Nordred að störfum í húsnæði Almannavarnadeildar Ríkislögreglustjórans í Skógarhlíð 14, Reykjavík.  Frá vinstri: Tor Eivind Moss yfirmaður í björgunarmiðstöðinni í Stavangri í Noregi en hann hafði yfirumsjón með æfingunni fyrir hönd samnorrænu samtakanna Nordred, Auðunn F. Kristinsson yfirstýrimaður hjá Landhelgisgæslunni. Hann lék ýmis hlutverk í æfingunni, þ.á.m. sem skipherra varðskips á vettvangi. Leikur hans var afar sannfærandi að sögn félaga hans sem tóku þátt í æfingunni, Einar Sigurgeirsson varðstjóri í stjórnstöð Landhelgisgæslunnar/vaktstöð siglinga en hann bar hitann og þungann af skipulagi æfingarinnar af hálfu Landhelgisgæslunnar og að síðustu Bára Benediktsdóttir hjúkrunarfræðingur sem kom að skipulagi æfingarinnar af hálfu Landlæknisembættisins. Á myndina vantar Thorben Jósef Lund yfirstýrimann hjá Landhelgisgæslunni en hann tók þátt í æfingastjórnun af hálfu Landhelgisgæslunnar og brá sér í ýmis hlutverk m.a. sem skipstjóri á skemmtiferðaskipinu. Mynd: DS. Kristján Þ. Jónsson framkvæmdastjóri aðgerðasviðs Landhelgisgæslunnar í samhæfingarstöðinni í Skógarhlíð. Hlutverk hans var að stjórna að gerðum Landhelgisgæslunnar. Mynd:DS. Harald Holsvik varðstjóri í stjórnstöð LHG/vaktstöð siglinga og Hjalti Sæmundsson aðalvarðstjóri í stjórnstöð LHG/vaktstöð siglinga en þeir voru báðir á fullu að samhæfa aðgerðir Landhelgisgæslunnar á starfsstöðvum LHG/vaktstöðvar siglinga í samhæfingarstöðinni. Mynd:DS. Lesa meira