Landhelgisgæslan og danski sjóherinn í sameiginlegum æfingum

Fimmtudagur 17. janúar 2008

Undanfarna daga hafa starfsmenn Landhelgisgæslunnar og áhöfn danska varðskipsins Vædderen verið við sameiginlegar æfingar hér við land. Þessar æfingar eru nú haldnar á grundvelli samkomulags sem dómsmálaráðherra, Björn Bjarnason og Sören Gade, varnarmálaráðherra Dana gerðu á liðnu ári.

Tveir yfirmenn voru við æfingar um borð í Vædderen í síðastliðinni viku, þar sem þeir kynntu sér einnig tæki og búnað um borð. Þar tóku þeir þátt fjölda æfinga, meðal annars í því að fylgjast með og stjórna ferðum þyrlu með hjálp radars, neyðarviðbrögð þegar þyrla á í hlut, aðstoð við önnur skip, viðbrögð við eldi um borð í skipi, reykköfun og fleira.

Þriðjudaginn 15. jan. s.l. var svo haldin samæfing milli eininga Landhelgisgæslunnar og danska varðskipsins Vædderen.

Varðskipið Týr tók þátt í æfingunni í neyðarframkvæmd, þ.e. settur var á svið eldsvoði á afturskipi Týs þar sem tveggja manna var saknað.
Æfingin hófst á því að stjórnstöð Landhelgisgæslunnar óskaði eftir aðstoð Vædderen þar sem eldur hefði komið upp í Tý. Vædderen hélt þá þegar á (æfinga) slysstað og á leiðinni sendu þeir þyrlu frá skipinu með fimm manna neyðarteymi ásamt búnaði sem var slakað niður á stefni Týs.
Neyðarteymi skipanna skutu á samráðsfundi og fóru yfir teikningar og aðstæður á vettvangi. Neyðarteymi beggja skipa reykköfuðu um afturskipið og fundu báða mennina, þá kom þyrla á ný með lækni sem hlúði að mönnunum og var annar þeirra fluttur ásamt lækninum með þyrlunni yfir í Vædderen til frekari aðhlynningar. Það vakti athygli Týs-manna hvað danska neyðarteyminu gekk vel að finna hina nauðstöddu. En þeir höfðu meðferðis svokallaða „infra-rauða“ hitamyndavél sem greinir hitamismun og gerði þeim kleift að sjá hina nauðstöddu í myrkri og reykjarkófi.

Meðfylgjandi myndir voru teknar við æfingarnar.

Marvin Ingólfsson, Ulf M. Berthelsen skipherra Vaedderen
og Martin Sövang Ditlevsen við skipið (mynd: Marvin Ingólfsson)


Gert klárt fyrir aðstoð í annað skip frá Vaedderen  (mynd: Marvin Ingólfsson)


Marvin Ingólfsson fylgist með ferðum þyrlu í radar (mynd: Marvin Ingólfsson)


Neyðarteymi Vaedderen fer yfir teikningar af Vs Tý (mynd: áhöfn Vs Tý)


Taug komið frá Vs Tý yfir í Vædderen (mynd: ahöfn Vs Tý)

Jón Árni Árnason bátsmaður og Pálmi Jónsson 2. stýrimaður ánægðir
með árangurin (mynd: áhöfn Vs. Tý)


TF-GNA og Lynx þyrla danska sjóhersins á æfingu yfir Vædderen
(mynd: Flugdeild LHG)

Æfingar, með dönsku eftirlitsskipunum, sem þessar hafa af og til verið haldnar með góðum árangri og styrkja þær samvinnu viðkomandi á Norður-Atlantshafi.

17.01.2008 SRS