Fjögur útköll á fimmtán mínútum

Laugardagur 1. nóvember 2008

Fjögur útköll bárust Stjórnstöð Landhelgisgæslunnar í dag á aðeins fimmtán mínútum. Beðið var um aðstoð þyrlu við að flytja mann sem fallið hafði í klettum, í Hnappadal á Snæfellsnesi. Talið var að maðurinn væri ökla og viðbeinsbrotinn. Þyrla LHG, TF-EIR send á vettvang enda erfið aðkoma að slysstað og ekki unnt að flytja þann slasaða með öðrum leiðum.

Skömmu síðar barst útkall vegna 10 ára drengs sem slasaðist þegar hann féll í fram af klettabrún í nágrenni Reyðarfjarðar. Var TF-LÍF send af stað og var hún komin langleiðina austur þegar beiðnin var afturkölluð því ákveðið var að flytja drenginn með sjúkrabifreið til Egilsstaða og þaðan með sjúkraflugi til Reykjavíkur.

Einnig barst beiðni um aðstoð vegna rjúpnaskyttu sem slasast hafði í Norðurárdal sem síðan fékk aðstoð ferðalanga við að komast undir læknishendur og vegna vélarvana báts á Faxaflóa. Var hann síðan dreginn til hafnar . Annasamur eftirmiðdagur hjá starfsmönnum  Landhelgisgæslunnar.

Myndina tók Guðmundur St. Valdimarsson starfsmaður LHG.

01.11.2008/HBS