Varðskipið Ægir bjargar flóttamönnum
Sunnudagur 31. júlí 2011
Varðskipið Ægir bjargaði á laugardag 58 flóttamönnum sem skildir höfðu verið eftir í gilskorningi á Radopos skaga á Krít. Í hópnum voru 30 karlmenn, 16 konur, þar af 2 ófrískar og 12 börn allt niður í ársgömul.
Að sögn áhafnar varðskipsins var ástand fólksins gott miðað við aðstæður. Mjög erfitt hefði verið að bjarga fólkinu með öðrum hætti og voru aðstæður orðnar erfiðar í lok aðgerðarinnar vegna versnandi sjólags. Tókst björgunin mjög vel og var fólkið flutt til Souda á Krít. Fréttir af björguninni má m.a. sjá hér; http://soudaport.pblogs.gr/
Áætlað er að varðskipið Ægir sinni landamæragæslu fyrir Frontex, landamærastofnun Evrópusambandsins út október mánuð.
Nánari upplýsingar af björguninni eru veittar af Frontex – landamærastofnun Evrópusambandsins.