Flutningaskipið Fernanda dregið vestur af Faxaflóa
- mikill hiti í skrokk skipsins.
Föstudagur 1. nóvember 2013 kl. 23:15
Varðskipið Þór hefur nú dregið flutningaskipið Fernanda vestur af Faxaflóa, á svæði þar sem skipið telst fjarri hrygningarstofnum og veiðisvæðum samkvæmt upplýsingum Hafrannsóknarstofnunar. Þá er allnokkuð dýpi á þessum slóðum. Staðsetningin er í samræmi við ákvörðun sem tekin var á samráðsfundi Landhelgisgæslu, Hafrannsóknarstofnunar, Samgöngustofu og Umhverfisstofnunar nú fyrr í dag með það fyrir augum að forðast sem verða má umhverfisslys og um leið tryggja sem best öryggi viðbragðsaðila á vettvangi. Nokkur vindur er á svæðinu.
Við skoðun áhafnar Þórs og slökkviliðsmanna SHS á ástandi Fernanda nú í kvöld mátti sjá að mikill hiti er í skrokk skipsins og því verður skipinu haldið á rólegri ferð í þeirri von að síður skipsins kólni og það haldist á floti. Er ætlunin að halda þeirri aðgerð áfram í nótt og endurmeta stöðuna í birtingu í fyrramálið.
Hér eru myndir sem Jón Kr. Friðgeirsson, bryti tók við brottför úr Hafnarfjarðarhöfn.