Ekki talin hætta á bráðamengun - Eigendum Green Freezer veittur áframhaldandi frestur til að ná skipinu af strandstað

Fyrir skömmu síðan lauk samráðsfundi Landhelgisgæslunnar með Umhverfisstofnun og Samgöngustofu vegna strands flutningaskipsins Green Freezer. Engin hætta er talin á bráðamengun á svæðinu og var tekin ákvörðun um að veita eigendum skipsins áframhaldandi frest til kl. 18:00 að ná skipinu af strandstað. 

Varðskipið Þór er á leiðinni á staðinn og er gert ráð fyrir að það verði komið um kvöldmatarleitið. Vettvangsstjórn Landhelgisgæslunnar á staðnum fylgist náið með framvindu mála og er í nánu samstarfi við við Umhverfisstofnun, Samgöngustofu, útgerð skipsins, Slysavarnarfélagið Landsbjörgu, lögreglu og aðra viðbragðsaðila.

Landhelgisgæslunni barst um klukkan átta í gærkvöldi beiðni um aðstoð frá flutningaskipinu Green Freezer sem var þá strandað á skeri í Fáskrúðsfirði. Kallaðar voru út björgunarsveitir Slysavarnarfélagsins Landsbjargar á Austurlandi, þ.m.t. björgunarskip og bátar allt frá Vopnafirði til Hornafjarðar. Fjölveiðiskip Samherja, Vilhelm Þorsteinsson hélt auk þess samstundis á strandstað og lóðsbáturinn Vöttur kom á staðinn í morgun.

Varðskipið Þór var beðið um að halda á staðinn og var þyrla Landhelgisgæslunnar var kölluð út. Kom hún á staðinn rétt eftir miðnætti með fulltrúa Landhelgisgæslunnar og Umhverfisstofnunar. Kafarar Landhelgisgæslunnar komu á staðinn í nótt og könnuðu þeir botn skipsins í morgun. Sjómælingasvið Landhelgisgæslunnar gerði sjókort fyrir svæðið sem unnið verður með í framhaldinu.

Útgerð fragtskipsins hóf strax vinnu við björgunaráætlun og bíða á meðan björgunaraðilar átekta.

Skipið er stöðugt á strandstað og er ekki talin hætta á ferð. Veður er gott á svæðinu.

Fragtskipið Green Freezer er skráð á Bahama eyjum og með 17 manna áhöfn.

Mynd frá áhöfn þyrlu Landhelgisgæslunnar.