Takk fyrir daginn!

Það var mikið fjör í flugskýli Landhelgisgæslunnar í dag er hátt á þriðja þúsund manns lagði leið sína á opið hús Landhelgisgæslunnar. Til sýnis voru þyrlur, flugvél, sprengjubíll, köfunarbúnaður, bátar, sjókort, myndir og fjölmargt fleira úr starfseminni. Samstarfsfélagar okkar hjá Isavia, slökkviliði höfuðborgarsvæðisins, lögreglunni á höfuðborgarsvæðinu og Flugbjörgunarsveitinni tóku einnig þátt í deginum með okkur. Isavia sýndi glænýjan slökkvibíl sem notaður er til slökkvistarfa á flugvellinum, slökkvilið höfuðborgarsvæðisins sýndi sjúkrabíl og búnað hans, lögreglan kíkti við á mótorhjólum og Flugbjörgunarsveitin sýndi búnað sinn og aðstoðaði okkur við gæslu á svæðinu. Takk þið öll fyrir hjálpina og þann svip sem þið settuð á frábærlega vel heppnaðan dag.

Veðrið lék við okkur og gestirnir voru allir afar áhugasamir. Krakkarnir voru leystir út með blöðrum og ýmsu góðgæti og lögðu fjölbreyttar og flóknar spurningar fyrir okkar fólk. Alveg örugglega einhverjir framtíðarstarfsmenn okkar þar á ferð.

Við starfsfólkið erum alsæl með daginn og þökkum ykkur öllum kærlega fyrir komuna.

Hér eru nokkrar myndir frá frábærum degi. 

Gestir biðu spenntir eftir að kíkja um borð í þyrluna TF-LIF

Og sama gilti með flugvélina TF-SIF   Þyrlan TF-SYN var einnig til sýnis og fjölmargir kíktu um borð   Sprengjubíllinn vakti mikla athygli sem og búnaður þeirra sprengjukappa   Samstarfsfélagar okkar hjá Isavia sýndu þennan glæsilega slökkvibíl sem notaður er á Reykjavíkurflugvelli   Slökkvilið höfuðborgarsvæðisins var á staðnum og sýndi gestum sjúkrabifreið og búnað hennar   Lögreglan kíkti við á mótorhjólum og vakti verulega lukku meðal yngstu kynslóðarinnar   Þessir Gæslukappar voru ánægðir með daginn   Félagar úr Flugbjörgunarsveitinni voru okkur til aðstoðar í dag og hér eru nokkrir þeirra   Mikið fjör var í flugskýlinu í dag   Mikill áhugi var á að skoða hina öflugu eftirlits- og björgunarflugvél Landhelgisgæslunnar, TF-SIF