Varðskipið Týr 30 ára
Föstudagur 18. mars 2005.
Flaggskip Landhelgisgæslunnar, varðskipið Týr, er 30 ára um þessar mundir og halda starfsmenn Landhelgisgæslunnar upp á afmæli skipsins í dag.
Sigurður Steinar Ketilsson skipherra segir skipið vera happaskip og það hafi reynst vel allan þennan tíma. Hann segir það hafa fylgt skipinu frá því það var tekið í notkun að þar er valinn maður í hverju rúmi og mannskapurinn alveg til fyrirmyndar. Margir í áhöfn skipsins hafa verið lengi við störf hjá Landhelgisgæslunni.
Pétur Sigurðsson forstjóri skrifaði undir smíðasamning skipsins í desember 1973 og var því hleypt af stokkunum í október 1974. Dóra Guðbjartsdóttir eiginkona Ólafs Jóhannessonar dómsmálaráðherra gaf skipinu nafnið Týr við það tækifæri.
Skipið fór í reynslusiglingu 8. mars 1975 undir dönskum fána en var formlega afhent Landhelgisgæslunni 14. mars 1975. Pétur Sigurðsson forstjóri Landhelgisgæslunnar tók á móti skipinu og var þá íslenski fáninn dreginn að húni. Skipið kom síðan til Reykjavíkur í fyrsta sinn 24. mars 1975 og lagðist þar að bryggju við Ingólfsgarð kl. 16:37 eins og fram kemur í bókum skipsins.
Týr fór í sína fyrstu ferð til björgunar- og landhelgisgæslustarfa frá Reykjavík 29. mars 1975 undir stjórn Guðmundar Kærnested skipherra.
Dagmar Sigurðardóttir
fjölmiðlaftr.
Mynd: Jón Kr. Friðgeirsson bryti.