Þyrla Landhelgisgæslunnar leitar að neyðarsendi
Þriðjudagur 25. júní 2002.
Um ellefuleytið fóru Landhelgisgæslunni að berast tilkynningar frá skipum, flugvélum og gervihnetti um sendingar frá neyðarsendi skips. Gervihnattastaðsetning var í nágrenni Reykjavíkur. TF-SIF, þyrla Landhelgisgæslunnar, var send til leitar og nam sendingarnar yfir skemmtiferðaskipinu Delphin sem var í Reykjavíkurhöfn. Áhöfn skipsins gat ekki fundið hvaðan neyðarsendingarnar bárust og óskaði stjórnstöð Landhelgisgæslunnar því eftir aðstoð Póst- og fjarskiptastofnunar. Starfsmaður stofnunarinnar fór um borð, fann sendinn og slökkti á honum. Þar með var málinu lokið.
Dagmar Sigurðardóttir upplýsingafulltrúi
Landhelgisgæslu Íslands