Grunnskólabörn í Neskaupstað heimsóttu varðskipið Tý

Þriðjudagur 3. apríl 2007.

Áhöfn varðskipsins Týs fékk skemmtilega heimsókn í Neskaupstað, en þar komu tveir hópar grunnskólabarna um borð og fræddust um varðskipið og starfsemi Landhelgisgæslunnar.

Tveir hópar nemenda Grunnskólans í Neskaupstað óskuðu nýlega eftir að koma í heimsókn og skoða skipið er það hafði viðkomu í Neskaupstað. Það var auðsótt mál hjá Sigurði Steinari Ketilssyni skipherra. Nemendurnir fengu leiðsögn um skipið og um leið fræðslu um hlutverk og starfsemi Landhelgisgæslunnar.

Landhelgisgæslan, í samstarfi við Samband íslenskra sveitarfélaga, býður 10. bekkingum að koma sem varðskipsnemar um borð í Ægi og Tý á sumrin og komast venjulega færri að en vilja.  Nemendurnir sem komu um borð í Neskaupstað höfðu sumir í hyggju að sækja um slíka námsdvöl í varðskipunum eftir prófin í vor.

Það var ánægjulegt fyrir áhöfn varðskipsins að taka á móti hópunum sem sýndu prúðmennsku mikla og kurteisi.  Þeir báru Grunnskólanum í  Neskaupsstað og bæjarfélaginu gott vitni.

Áhöfn varðskipsins tók meðfylgjandi myndir.


Einar Örn Einarsson 2. stýrimaður fræðir nemendur og kennara um starfsemi varðskipsins.

Á byssupalli Týs. Einar Örn sýnir 2. bekkingum Bofors fallbyssuna. Dekkliðar sýruvaska framþiljur í baksýn.