Fréttir

Þyrlan flutti veikan sjómann á spítala

Flogið var með manninn á Sjúkrahúsið á Akureyri af skipi sem var norðvestur af landinu.

12.1.2018

Stjórnstöð Landhelgisgæslunnar barst á snemma þriðja tímanum í nótt beiðni frá íslensku fiskiskip um að þyrla sækti veikan skipverja. Skipið var þá statt um sextíu sjómílur norðnorðvestur af Siglufirði. TF-LIF fór í loftið laust fyrir klukkan hálffjögur og rúmum klukkutíma síðar var þyrlan komin að skipinu. Stíf suðaustanátt var á leiðinni, vindhraðinn á bilinu 23-28 metrar á sekúndu, en sæmilegasta skyggni. 

Sigmaður þyrlurnar fór svo niður í skipið og undirbjó sjúklinginn og að því búnu voru þeir hífðir upp í þyrluna. Hún lenti á flugvellinum á Akureyri rétt upp úr hálfsex og flutti sjúkrabíll svo veika skipverjann á Sjúkrahúsið á Akureyri.

Þetta er í annað sinn í þessari viku sem TF-LIF sækir veikan sjómann og kemur honum á sjúkrahús því í fyrradag var hún kölluð út vegna veikinda um borð í fiskiskipi á Deildargrunni. 









Þetta vefsvæði byggir á Eplica