Flugdeild
Flugdeild LHG hefur það meginhlutverk að sinna þeim verkefnum sem getið er um í lögum um Landhelgisgæslu Íslands. Í þeim felst meðal annars að sinna öllu almennu eftirliti á hafinu umhverfis Ísland, fiskveiðieftirliti, mengunareftirliti, ískönnun og rannsóknarvinnu. Leit og björgun, sjúkraflugi af ýmsum toga, flugi með hjálparsveitir og sérsveit ríkislögreglustjóra o.fl. Einnig sinnir flugdeildin ýmsum sérverkefnum. Til þessara starfa hefur Landhelgisgæslan fjögur loftför en það eru: Flugvélin TF-SYN sem er af gerðinni Fokker Friendship F-27, þyrlurnar TF-LÍF og TF-GNÁ sem eru af gerðinni Super Puma AS-332L1 og TF-EIR sem er af gerðinni Dauphin II SA-365 N.
Flugvél LHG, TF-SYN (F-27) flýgur reglulega til landhelgisgæslu og á veturna einnig til hafískönnunar. Þá eru 4-5 menn í áhöfn vélarinnar; flugstjóri, flugmaður og 2-3 siglingafræðingar. TF–SYN sinnir einnig leitar og björgunarstörfum sem og fylgd með þyrlum í lengri sjúkra- og björgunarflugum á haf út. Hægt er að varpa björgunarbátum úr henni og öðru því sem gæti orðið til aðstoðar, áður en eiginlegri björgun yrði við komið. Vélin hefur einnig verið nýtt í ýmis sérverkefni svo sem flóttamannahjálp á vegum Rauða krossins, flug með hjálparsveitir á hamfarasvæði og önnur álíka verkefni.
Þyrlur Landhelgisgæslunnar sinna hinum ýmsu verkefnum auk landhelgisgæslu. Þær eru mikilvæg tæki til sjúkraflutninga til sjós og lands og hafa á undanförnum árum margsannað notagildi sitt við björgun mannslífa. Meðal annarra verkefna þyrlanna er t.d. krókvinna fyrir ýmsa aðila, farþegaflug á vegum hins opinbera o.fl. Í áhöfn á þyrlum LHG eru að jafnaði 5 menn, þ.e. flugstjóri, flugmaður, sigmaður, spilmaður og læknir. Sjúkrahús Reykjavíkur, Fossvogi, hefur með höndum umsjón og stjórn þyrluvaktar lækna og tryggir sólarhringsvakt sérþjálfaðra lækna fyrir sjúkra- og björgunarflug með þyrlum LHG
Útköll hafa í seinni tíð verið á bilinu 110 – 160 á ári. Fyrstu sjö mánuði ársins 2007 voru útköllin 106. Flest eru útköllin í tengslum við leitar björgunar og sjúkraflutninga bæði á hafi úti og inni á landi en þó má segja að verkefnin geti verið mjög fjölbreytt. Miklum tíma varið í æfingar með það að leiðarljósi að vera ávallt sem best í stakk búnir til þeirra starfa sem vænta má. Leitast er við að hafa æfingarnar og umgjörð þeirra sem raunverulegastar. Varðskip LHG og áhafnir þeirra eru ómissandi og mjög mikilvægur þáttur í æfingaferlinu. Æfingar með skipunum á hafi úti koma áhöfn þyrlunnar í góða snertingu við þær aðstæður sem síðar geta komið upp við björgunarstörf. Æfingarnar fara fram bæði yfir sjó, þar sem æfðar eru hífingar úr sjó, úr gúmmíbátum og af skipum, og yfir landi, þar sem æfðar eru hífingar í fjalllendi og af sléttlendi. Talsvert er um æfingar tengdar notkun nætursjónauka sem teknir voru í notkun árið 2002, en þeir hafa gjörbreytt starfsumhverfi og möguleikum þyrluáhafna til að sinna starfi sínu að nóttu til.
Starfsmenn
Hjá flugdeild LHG starfa flugrekstrarstjóri, tæknistjóri, 13 flugmenn, 8 stýrimenn, 14 flugvirkjar, 3 aðstoðarmenn og að auki 6 starfsmenn sem sinna skipulagningu og öðrum störfum. Unnið er frá kl. 0800-1600 virka daga og allan sólarhringinn eru 6 menn tilbúnir á þyrluvakt. Vinnutími þeirra fer eftir fjölda útkalla og æfinga. Þyrla getur verið tilbúin til flugtaks frá flugvelli 10-60 mínútum eftir útkall, og ræðst viðbragðstími helst af veðri og aðstæðum til flugs. Unnið hefur verið að stækkun flugdeildar Landhelgisgæslunnar og má því búast við enn fleiri starfsmönnum á næstu misserum.
Umfjöllun um loftför LHG má sjá hér.