Landhelgisgæslunni barst fyrir helgi beiðni um aðstoð frá Rannsóknarnefnd samgönguslysa við að flytja þyrlu sem varð fyrir óhappi á Eyjafjallajökli þann 1. maí sl. TF-LÍF flutti í gær þyrluna niður á láglendi þar sem rannsóknarnefndin tók við henni til rannsóknar.

Leitar og björgunaræfingin Arctic Zephyr hófst í morgun en hún er haldin á vegum yfirherstjórnar Bandaríkjanna USEUCOM og taka þátt í henni þjóðir innan Norðurskautsráðsins. Æfingin fer fram á Öryggissvæðinu á Keflavíkurflugvelli sem rekið er af Landhelgisgæslu Íslands. Æfingin stendur yfir í tvo daga en um er að ræða skrifborðsæfingu þar sem íslenskar stofnanir, fyrirtæki og björgunaraðilar vinna að viðamiklu leitar- og björgunarverkefni ásamt samstarfsþjóðunum sem eru Bandaríkin,  Kanada, Danmörk, Finnland, Noregur og Svíþjóð.

Loftrýmisgæsla Atlantshafsbandalagsins við Ísland hefst að nýju mánudaginn 12. maí nk. með komu flugsveitar bandaríska flughersins. Alls munu um 220 liðsmenn taka þátt í verkefninu, þar af um fimmtán manns á Akureyri þar sem staðsettar verða þotugildrur  og flugviti. Flugsveitin kemur til landsins með F-15 orrustuþotur, C-130 björgunarflugvélar, ásamt eldsneytisbirgðavél.

Eldur kviknaði í morgun í stýrishúsi strandveiðibáts sem var staðsettur á miðjum Breiðafirði. Landhelgisgæslunni barst neyðarkallið á rás 16 kl. 08:05 og áframsendi það með því að upplýsa skip og báta á svæðinu um stöðu mála.  Fljótlega komu nokkrir bátar til aðstoðar og náðist að slökkva eldinn á skömmum tíma.