Varnarmálaráðherra Danmerkur ræðir öryggismál við forstjóra Landhelgisgæslunnar

Föstudagur 20. mars 2009

Sören Gade, varnarmálaráðherra Danmerkur, er staddur í opinberri heimsókn á Íslandi í tengslum við veru danska hersins sem sinnir loftrýmiseftirliti við Ísland. Gade notaði tækifærið og hitti Georg Lárusson, forstjóra Landhelgisgæslunnar, þar sem þeir ræddu samstarf ríkjanna á sviði öryggis- og björgunarmála.

Georg Kr. Lárusson kynnir Ásgrím L. Ásgrímsson yfirm. stjórnstöðvar Landhelgisgæslunnar fyrir Sören Gade.

Landhelgisgæslan og danski flotinn hafa um árabil átt í góðu samstarfi, einkum á sviði eftirlits- og öryggismála. Björn Bjarnason, þáverandi dómsmálaráðherra og Sören Gade, undirrituðu samkomulag í janúar 2007 um nánara samstarf milli Landhelgisgæslunnar og danska flotans er varðar leit, eftirlit og björgun á Norður- Atlantshafi. Það samkomulag hefur styrkt sambandið milli þessara tveggja aðila og telur Gade það  grundvöll fyrir enn frekari samvinnu í náinni framtíð.

Danski varnarmálaráðherrann lýsti jafnframt ánægju sinni með samstarfið við Landhelgisgæsluna. „Við þurfum á hvorum öðrum að halda vegna þess hve hafsvæðið á þessum slóðum er erfitt yfirferðar.  Ísland fær bráðum nýtt varðskip og nýja flugvél í sínar hendur og það mun án efa stuðla að enn frekari samvinnu.” Gade sér fyrir sér í því samhengi  að Landhelgisgæslan komi að eftirlitsverkefnum í kringum Færeyjar og Grænland þegar ný Dash-8 flugvél Landhelgisgæslunnar verður tilbúin í upphafi næsta árs.

Búist er við því að siglingaleiðir fyrir stór flutningaskip opnist þegar íshellan á Norður-Íshafi hopar enn frekar. Það skapar tækifæri fyrir enn frekari samvinnu Íslands og Danmerkur að mati Gade. „Þetta hefur í för með sér mikla aukningu skipaumferðar á þessu hafsvæði og það verður ærið verkefni fyrir Danmörku og Ísland. Þess vegna ættum við að huga að enn nánari samvinnu á komandi árum. Vegna þess að það er grunur um að olía og aðrar auðlindir kunni að finnast á þessu svæði má búast við aukinni spennu milli ríkja. Það viðfangsefni krefst samvinnu Íslands og Danmerkur og verður að leysa í samráði við önnur  ríki.”

Georg Lárusson, forstjóri Landhelgisgæslunnar er sömuleiðis ánægður með samstarfið við Dani sem hann telur mikilvægt fyrir öryggi við Íslandsstrendur. „Íslendingar og Danir eiga í einstöku samstarfi á sviði öryggismála á Norður-Atlantshafi. Oft á tíðum má vart greina hvort aðgerðir hér við land séu undir stjórn Íslendinga eða Dana. Við reiðum okkur mjög á þetta samstarf. Við erum hins vegar að byggja okkur upp til að verða öruggari og öflugari þátttakendur í þessu samstarfi. Nýtt skip og ný flugvél er nauðsynlegur þáttur í því."

Ísland tók nýlega við formennsku af Danmörku í North Atlantic Coast Guard Forum og fer Georg með formennsku í ráðinu. Þrátt fyrir ungan aldur er ráðið mikilvægt í öryggislegu tilliti, ekki síst þegar siglingaleiðin í Norður-Íshafi opnast. Helstu verkefni ráðsins er að tryggja öryggi á svæðinu, halda utan um eftirlit með fiskveiðum og sporna gegn skipulagðri glæpastarfsemi.

 

Myndirnar tók Árni Sæberg.

Heiðursvörður við komu Sören Gade til höfuðstöðva Landhelgisgæslu Íslands.

Við líkan af varðskipinu Tý.

Sören Gade afhendir Georg Kr. Lárussyni gjöf. 

Ekki er annað að sjá en að samstarf Georgs Kr. Lárussonar og Ellisifjar Tinnu Víðisdóttur, forstjóra Varnarmálastofnunar sé gott.

Georg og Sören virða fyrir sér útsýni til sjávar