Flugslysaæfing á Þórshöfn - hvernig ber að umgangast þyrlur í björgunaraðgerðum?

Laugardagur 18. apríl 2009

Áhöfn TF-LÍF, þyrlu Landhelgisgæslunnar var á Þórshöfn og Vopnafirði í vikunni með kynningar fyrir viðbragðsaðila um hvernig umgangast ber þyrlur í björgunaraðgerðum. Voru kynningarnar vegna flugslysaæfingar sem haldin var á Þórshöfn.

Farið var í eftirlitsflug frá Raufarhöfn fyrir Langanes að Bakkafirði og þaðan á Vopnafjörð. Bátar sem sáust voru á grásleppuveiðum og voru með öll sín mál í lagi, einnig sáust tveir steypireyðir á sundi á Bakkafirði. Var þetta ótrúleg sjón sem áhöfninni langar til að deila með öðrum.

Á fréttavefnum www.vopnafjordur.is segir um TF-LÍF; “Þegar hún flaug inn yfir þorpið og var búin að taka einn hring þá stoppaði hún yfir leikskólanum og "hékk" þar yfir í smá stund en það vakti mikla kátínu hjá smáfólkinu eins og gefur að skilja en síðan lenti hún á fótboltavellinum þar sem fólk kom skoðaði gripinn”.

180409/HBS