Fræðsla um Senegal fyrir starfsmenn Landhelgisgæslunnar
Sunnudagur 22. ágúst 2010
TF-SIF flugvél Landhelgisgæslunnar flaug í gær áleiðis til Dakar í Senegal þar sem flugvélin mun næstu vikur sinna landamæraeftirliti fyrir Frontex, landamærastofnun Evrópusambandsins. Átta starfsmenn Landhelgisgæslunnar, flugmenn, stýrimenn og flugvirkjar fylgja vélinni en einnig er einn starfsmaður staðsettur í stjórnstöð Frontex í Madrid. TF-SIF er væntanleg aftur til Íslands í október. Varðskipið Ægir hefur sinnt sama verkefni frá byrjun maí. Fyrst var skipið við strendur Senegal en í júlí sigldi Ægir til Almería á Spáni en þaðan sinnir varðskipið eftirliti á Miðjarðarhafi fram til loka septembermánaðar.
Áhöfn TF-SIF. F.v. Benóný Ásgrímsson, flugstjóri, Hreggviður Símonarson,
stýrimaður, Ragnar Ingólfsson flugvirki, Tómas Vilhjálmsson, flugvirki og Garðar Árnason, flugmaður. Á myndina vantar Auðunn F. Kristinsson, stýrimann og
Hólmar Loga Sigmundsson, aðstoðarflugrekstrarstjóra.
Eru starfsmenn Landhelgisgæslunnar með verkefninu að fara í gegnum heilmikla og verðmæta þjálfun sem mun án efa koma sér vel í framtíðinni. Fyrir brottför var þeim boðið uppá fræðslu um Senegal; menningu landsins, trúarbrögð, siði og fleira enda er nauðsynlegt að vera sem best undir það búin að dvelja í landinu og tileinka sér þá siði og venjur sem þar tíðkast.
Fyrir brottför, Svanhildur Sverrisdóttir starfsmannastjóri og Georg Kr. Lárusson
forstjóri ásamt Benóný Ásgrímssyni, flugstjóra og Garðari Árnasyni, flugmanni.
TF-SIF rétt fyrir flugtak
Voru starfsmenn mjög ánægðir með kynninguna sem gerðu þá enn betur undirbúna fyrir veruna í Senegal. Fræðslan var í umsjón Lilju D. Kolbeinsdóttur, kennara og MA í þróunarfræði sem hefur starfað í um tíu ár í Afríku. Áhöfn varðskipsins fór í gegnum fræðslu hennar í vor en áhöfn flugvélarinnar nú fyrir skömmu. Sagði Marvin Ingólfsson stýrimaður og sprengjusérfræðingur starfsmönnum flugdeildar einnig frá reynslu sinni og annarra varðskipsmanna en Marvin var meðal þeirra sem var í áhöfn varðskipsins í Senegal.
Lilja D. Kolbeinsdóttir segir frá.
Frá fræðslu í flugdeildarinnar
Sem fyrr segir er Lilja kennari að mennt með MA í þróunarfræði og hefur starfað í um tíu ár í Afríku. Hún starfaði í Angóla á árunum 1996-2001 fyrir frjáls félagasamtök og Angólanska menntamálaráðuneytið við uppbyggingu á kennaranámi í Huambo og Benguela héruðum. Á árunum 2004-2009 starfaði Lilja sem verkefnastjóri félagslegra verkefna á vegum Þróunarsamvinnustofnunar Íslands í Úganda. Þar bjó hún í höfuðborginni Kampala en ferðaðist títt á verkefnasvæðin, þó aðallega í fiskimannasamfélög á eyjum Viktóríuvatns. Þar fyrir utan hefur Lilja starfað til skemmri tíma í Mósambík og ferðast til fjölda landa sunnan Sahara (Namibíu, Sambíu, Simbabve, Suður Afríku, Kenía, Gambíu og Malí).