Ægir siglir með þyrlur að ísröndinni við Grænland
Mánudagur 16. maí 2011
Varðskipið Ægir flutti fyrir skömmu tvær þyrlur fyrir Vesturflug (Blue West Helicopters) frá Ísafjarðardjúpi að ísröndinni við Grænland. Flugu þyrlurnar frá varðskipinu inn á land en lentu þar í mjög slæmu veðri og neyddust til að lenda. Liðu 28 klst þar til þeim tókst að fara að nýju í loftið og neyddust flugmenn til að halda kyrru fyrir í þyrlunum enda staddir í óbyggðum þar sem hætta er á að mæta hvítabjörnum. Reynslumikill norskur flugmaður sem var í leiðangrinum sagðist aldrei hafa lent í öðru eins.
Þegar birti til og þyrlunum tókst loks að fara í loftið að nýju flaug önnur þeirra til Sítrónufjarðar (Citronen Fjord), nyrst á Grænlandi en hin til Constable Point á austurströndinni. Þar munu þyrlurnar verða í þjónustu næstu mánuði m.a. vegna rannsókna við fyrirhugaða námuvinnslu.
Aðeins er fært fyrir skip að ströndinni á þessum slóðum í um tvo mánuði á ári frá miðjum júli fram í miðjan september.