Útkall þyrlu og sjóbjörgunarsveita vegna neyðarljóss
Landhelgisgæslunni barst kl 16:40 tilkynning í gegnum Neyðarlínuna um neyðarljós á lofti yfir Sundunum norðan við Reykjavík. Björgunarskip og björgunarbátar Slysavarnafélagsins Landsbjargar á höfuðborgarsvæðinu voru kallaðir út til leitar auk þyrlu Landhelgisgæslunnar.
Þrátt fyrir ítarlega leit umhverfis eyjar og með strandlengju Kollafjarðar fannst ekki neitt sem skýrt gæti neyðarljósið. Í samráði við lögreglu og björgunarsveitir var aðgerðum hætt kl 18:30.