Áhöfn v/s ÞÓR þjálfar notkun olíuhreinsibúnaðar
Þriðjudagur 5. júní 2012
Að undanförnu hefur áhöfn varðskipsins ÞÓRS m.a. þjálfað notkun olíuhreinsibúnaðar og olíuvarnargirðingar varðskipsins sem ekki hefur áður verið í notkun hér á landi en sænska strandgæslan og norska strandgæslan að hluta, hefur notað hliðstæðan búnað með góðum árangri. Norska- og sænska strangæslan tóku þátt í hreinsun eftir óhappið þegar GOÐAFOSS strandaði í Oslóarfirði í febrúar 2011 og gekk það ágætlega.
Við æfingarnar hefur áhöfnin hreinsað upp ímyndaða olíumengun í hafinu og hefur eftirlits- og sjómælingabáturinn Baldur aðstoðað við að leggja út olíuvarnargirðinguna (oil boom) sem lokar af flæði olíunnar. Aðstoðarbátur/skip, í þessu tilfelli Baldur, tók við línu girðingarinnar og sigldi með hana í boga til að loka af hið mengaða svæði. Var þvínæst lögð út olíuskilja (oil skimmer). sem dældi 100 tonnum af olíu á klst. í tanka skipsins sem eru upphitaðir og geta tekið 675 rúmmetra af olíu. Æfingarnar hafa gengið ágætlega og verður þeim haldið áfram í samstarfi við Umhverfisstofnun og hafnaryfirvöld.