Samæfing Landhelgisgæslunnar fór fram í dag
Föstudagur 1. mars 2013
Í dag var haldin samæfing stjórnstöðvar, varðskips og loftfara Landhelgisgæslunnar en í henni tóku þátt varðskipið Þór, flugvélin Sif og þyrlurnar Líf og Gná ásamt stjórnstöð. Markmið æfingarinnar var að æfa framkvæmd leitar og björgunar á sjó í samræmi við leiðbeiningar Alþjóðasiglingamálastofnunarinnar og Alþjóðaflugmálastofnunarinnar um leit og björgun - IAMSAR, þ.e. samskipti björgunareininga og björgunaraðferðir.
Í æfingunni voru æfð viðbrögð við þeim aðstæðum þegar fiskibátur sem staðsettur var um 3 sml VNV af Öndverðarnesi hafði samband við stjórnstöð vegna bilunar í AIS ferilvöktunarbúnaði. Var ákveðið að hann hefði aftur samband við stjórnstöð 6 klst síðar til að láta vita af staðsetningu en þá hefði hann átt að vera farinn að nálgast sjö bauju Reykjavíkurhafnar. Þegar ekki hafði heyrst frá bátnum og ekki náðist í hann voru einingar Landhelgisgæslunnar kallaðar út. Varðskipið Þór var staðsett á Stakksfirði og sigldi það samstundis að stysta punkti áætlaðrar siglingaleiðar bátsins, flugvélin Sif flaug hraðferð eftir siglingaleið bátsins en þyrlurnar Líf og Gná flugu leitarferla og hófu leit á sitt hvorum leitarpunkti en u.þ.b. 70 sjómílur voru á milli vélanna þegar leit hófst.
Þyrlurnar klárar fyrir flugtak.
Vilhjálmur Óli Valsson og Friðrik Höskuldsson yfirstýrimenn TF-SIF fara yfir áætlanir.
Slæmt skyggni var á svæðinu og sinntu varðstjórar í stjórnstöð Landhelgisgæslunnar einnig hlutverki flugleiðsögumanna og leiðbeindu þeir þyrlunum á flugleiðinni þegar þörf var á og sinntu einnig skipulagi og samskiptum við aðra viðbragsaðila sem í raunverulegum aðstæðum væru einnig nærstaddir bátar og Slysavarnarfélagið Landsbjörg.
Þegar leið á æfinguna barst tilkynning frá flugvél í aðflugi sem tók eftir björgunarbát á Faxaflóa. Var þá þyrlum Landhelgisgæslunnar beint að staðnum og fann fljótlega björgunarbát með tveimur dúkkum sem varðskipið Þór lagði út snemma í morgun.
Þjálfun sem þessi er mjög mikilvæg fyrir leitar- björgunareiningar Landhelgisgæslunnar og voru allir sáttir að æfingu lokinni.
Myndin til hægri sýnir þegar TF-LIF tók eldsneyti frá varðskipinu Þór í æfingunni.
Úr stjórnstöð Landhelgisgæslunnar.
Guðmundur Ragnar stýrimaður/sigmaður fer um borð
Kristján Þ. Jónsson sérfræðingur í leitar- og björgunarskipulagi IAMSAR fer yfir helstu áhersluatriði