Íslenskur tækjabúnaður í þróun sem mun nýtast við leit og björgun

Þriðjudagur 16. apríl 2013

Landhelgisgæslan hefur að undanförnu komið að þróun og prófunum nýs tækjabúnaðar sem verður notaður við leit að týndu fólki í óbyggðum. Skilyrði fyrir notkun tækisins er að sá týndi sé með kveikt á GSM síma. Um er að ræða færanlega GSM móðurstöð með fylgibúnaði sem staðsett er í þyrlu. Með búnaðnum verður hægt að staðsetja þann týnda með töluverðri nákvæmni á skömmum tíma. Flogið er með stöðina um leitarsvæðið og búin til GSM-þjónusta til þess að vekja símann, ef kveikt er á honum. Hefur hann sjálfkrafa samband við GSM-kerfið um borð í þyrlunni. Er síminn miðaður út og eru þá leitaraðilar komnir með staðsetningu. Hugmyndina fékk Óskar Valtýsson fjarskiptastjóri hjá Landsvirkjun þegar hann fylgdist með umfangsmikilli leit fyrir tveimur árum.

Verkefnið hefur verið í þróun og vinnslu í eitt og hálft ár og eru Landhelgisgæslan og Landsvirkjun bakhjarlar þess en hugbúnaðarfyrirtækið Rögg ehf hefur borið hita og þunga af þróun kerfisins.

GSM móðurstöðin er fest niður undir þyrluna meðan á leit stendur.