Baldur fylgdi frönsku skonnortunni Etoile til Reykjavíkur

Fimmtudagur 30. maí 2013

Eftirlits- og sjómælingaskipið Baldur fylgdi í dag skonnortunni Etoile frá Akranesi til Reykjavíkur en Etoile heiðrar Hátíð hafsins með heimsókn sinni þetta árið. Etoile kom til Vestmannaeyja í vikunni og sigldi síðan til Akraness. Skútan verður til sýnis við Sjómannasafnið í Vesturhöfn Gömlu Hafnarinnar um helgina. Áhöfn Etoile mun einnig taka þátt í hátíðarhöldum sjómannadagsins með starfsmönnum Landhelgisgæslunnar.

Etoile er önnur tveggja skonnorta í eigu Frakka, en hún ásamt Belle Poulle voru byggðar í Fécamp í Norður Frakklandi og sjósettar árið 1932. Í seinni heimstyrjöldinni þjónuðu þær andspyrnuhreyfingu Frakka. Meðal annars voru skonnorturnar notaðar til fiskveiða undan Íslandsströndum til 1938. Skúturnar eru nú notaðar til þjálfunar hjá franska sjóhernum.

Skv. upplýsingum á heimasíðu Faxaflóahafna eru skonnortur hraðskreiðar og rennilegar skútur með ákveðinni seglagerð, sem m.a. Hollendingar þróuðu á 16. og 17. öld. Etoile og Belle Poulle komu báðar til Reykjavíkur sumarið 2006 í tengslum við kappsiglingu milli Paimpol og Reykjavíkur.

Mynd Guðmundur St. Valdimarsson