Leki kom að bát í mynni Reyðarfjarðar
Þriðjudagur 8. apríl 2014
Landhelgisgæslunni barst kl. 15:06 aðstoðarbeiðni á rás 16, frá 7 tonna fiskibát sem mikill leki hafði komið að í mynni Reyðarfjarðar. Einn maður var um borð og ágætt veður á svæðinu.
Samstundis voru kallaðar út sjóbjörgunarsveitir Slysavarnarfélagsins Landsbjargar á Austurlandi, þ.a.m. björgunarskipið Hafbjörg á Neskaupsstað. Einnig var kallaður út dráttarbáturinn Vöttur á Reyðarfirði og þyrla Landhelgisgæslunnar. Kallað var til nálægra skipa og báta og þau beðin um að halda til aðstoðar.
Um kl. 15:35 komu upplýsingar frá bátnum um að hann virtist geta siglt fyrir eigin vélarafli til hafnar og kl. 15:45 kom harðbotna björgunarbáturinn Alfreð Guðnason frá Eskifirði að bátnum og virðast aðstæður vera orðnar betri. Fylgdi hann bátnum til hafnar.