Þyrla danska varðskipsins Triton flutti sjúkling til Reykjavíkur
Sunnudagur 13. júlí 2014
Þyrla danska varðskipsins Triton lenti í Reykjavík um kvöldmatarleitið með skipverja sem veiktist alvarlega í gær um borð í rannsóknaskipi sem var statt 187 sjómílur austsuðaustur af Hvarfi eða um 500 sjómílur SV af Reykjavík, inni í leitar- og björgunarsvæði Íslands en þó utan drægis þyrlu Landhelgisgæslunnar.
Björgunarmiðstöðin í Nuuk á Grænlandi hafði samband við Landhelgisgæsluna vegna málsins og var í framhaldinu óskað eftir eftir aðstoð Triton sem var um 250 sjómílur norður af rannsóknaskipinu. Triton kom að rannsóknaskipinu um miðnætti í gær og var maðurinn fluttur um borð í varðskipið og síðan siglt áleiðis til Reykjavíkur. Þegar komið var um 200 sjómílur frá Reykjavík var þyrla varðskipsins send af stað með manninn um borð og var sem fyrr segir lent í Reykjavík um kvöldmatarleitið.
Triton.
Mynd af Triton
http://en.wikipedia.org/wiki/HDMS_Triton_(F358)#mediaviewer/File:HDMS_Triton.jpg