Landhelgisgæslan varar við siglingahættum í Eyjafirði.

Föstudagur 17. október 2014

Stjórnstöð Landhelgisgæslu Íslands hefur síðastliðna 14 - 15 mánuði varað sæfarendur við siglingahættum vegna kræklingalína í Eyjafirði en kræklingalínur sem eru eftirlitslausar og ómerktar geta mögulega valdið sjófarendum tjóni.

Landhelgisgæslan hefur gefið út Tilkynningar til sjófarenda þar sem svæðin eru skilgreind í breidd og lengd og eru sjófarendur beðnir um að sigla í góðri fjarlægð frá þessum svæðum.

Landhelgisgæslan fylgist með mögulegum siglingahættum á sjó og gefur í því skyni út Tilkynningar til sjófarenda.  Eitt af hlutverkum Landhelgisgæslunnar er að móttaka ábendingar um siglingahættur á sjó og koma þeim á framfæri, bæði með þar til gerðum tilkynningum og í gegnum fjarskiptakerfi þess á milli.