Ferðalangar brugðust rétt við er þeir fundu tundurdufl
Þriðjudagur 27. mars 2007.
Ferðalangar sem fundu tundurdufl á Starmýrarrifi við Álftafjörð eystri brugðust hárrétt við en þeir tóku stað á duflinu og létu varðstjóra Landhelgisgæslunnar í Vaktstöð siglinga strax vita.
Á sunnudaginn fékk Vaktstöð siglinga tilkynningu um að ferðalangar hefðu keyrt fram á tundurdufl á Starmýrarrifi við Álftafjörð eystri. Sprengjusérfræðingur Landhelgisgæslunnar fékk upplýsingar hjá ferðalöngunum og myndir sem staðfestu að um breskt tundurdufl úr seinni heimstyrjöldinni var að ræða.
Við athugun á duflinu sem fannst á sunnudaginn kom í ljós að reynt hafði verið að brenna sprengiefnið úr því en það ekki tekist fullkomlega. Sprengjusérfræðingur sá um að eyða leyfum af sprengiefni úr því.
Er sprengjusérfræðingjar voru á leiðinni að duflinu keyrðu þeir fram á annað dufl og grófu það upp. Það reyndist vera tómt.
Að sögn Sigurðar Ásgrímssonar sprengjusérfræðings Landhelgisgæslunnar hafa mörg tundurdufl fundist þarna á sandinum í gegnum tíðina. Flest hafa verið grafin í sandinn og í mjög góðu ástandi. Sigurður tók meðfylgjandi myndir af duflinu.
Dagmar Sigurðardóttir
lögfræðingur/upplýsingaftr.
Sprengjusérfræðingur Landhelgisgæslunnar ásamt ferðalöngunum sem fundu duflið.
Duflið í sandinum.
Byrjað að grafa duflið upp.