Lætur af störfum hjá Gæslunni eftir 43 ára starf
Mánudagur 30. apríl 2007.
Leif K. Bryde, varðstjóri í Vaktstöð siglinga/stjórnstöð Landhelgisgæslunnar, tekur vaktina í síðasta skipti í dag en hann hefur starfað hjá Landhelgisgæslunni í 43 ár. Leif er einmitt 67 ára í dag.
Leif hóf störf sem loftskeytamaður á varðskipunum, loftförum og stjórnstöð í febrúar 1964. Hann eins og aðrir loftskeytamenn Landhelgisgæslunnar kom í land 1987 þegar byrjað var að hafa 24 tíma vakt í stjórnstöðinni. Hann starfaði jafnframt áfram sem loftskeytamaður á eftirlitsflugvél Landhelgisgæslunnar, Syn, í u.þ.b. 10 ár til viðbótar. Leif flutti með stjórnstöð Landhelgisgæslunnar í Skógarhlíðina fyrir 2 árum þegar hún sameinaðist Vaktstöð siglinga og hefur gegnt stöðu vaktstjóra í stöðinni í þessi 2 ár.
Í tilefni dagsins var starfsmönnum Landhelgisgæslunnar boðið í kaffi í Skógarhlíðinni um þrjúleytið og fékk Leif áletraðan skjöld með merki Landhelgisgæslunnar í kveðjugjöf auk blómvönds og fl.
Georg Kr. Lárusson forstjóri Landhelgisgæslunnar þakkaði Leif fyrir trúmennsku og frábær störf í gegnum tíðina og aðra góða kosti Leifs sem Landhelgisgæslan hefur notið góðs af á langri starfsævi hans. Ekki er vitað til þess að nokkur starfsmaður sem starfar nú hjá Landhelgisgæslunni hafi átt svo langan starfsferil þar.
Dagmar Sigurðardóttir
lögfræðingur/upplýsingaftr.
Leif ásamt Georgi Kr. Lárussyni forstjóra og Ásgrími Ásgrímssyni yfirmanni vaktstöðvar siglinga.
Svanhildur Sverrisdóttir starfsmannastjóri, Georg Kr. Lárusson forstjóri, Ásgrímur Ásgrímsson yfirmaður Vaktstöðvar siglinga og Leif K. Bryde.
Leif að störfum í stjórnstöðinni ásamt Ásgrími Ásgrímssyni. Ljósmynd: Jóhann Baldursson.