Tundurdufl í veiðarfæri
Laugardagur 17. nóvember 2007
Um kl 09:00 hafði togskipið Þorvarður Lárusson frá Grundarfirði (áður Smáey) samband við Vaktstöð siglinga og sagðist vera á togveiðum undan Látrabjargi og hafa fengið stóra álkúlu í veiðarfærin sem væri um 1.20 m í þvermál. Vaktstöð siglinga kom skipstjóra skipsins í samband við sprengjusérfræðing Landhelgisgæslunnar og eftir lýsingum hans á duflinu var enginn vafi talinn á að um væri að ræða þýskt tundurdufl en þeim var meðal annars lagt út við Látrabjarg til að trufla ferðir skipalesta á leið til Murmansk, í seinni heimsstyrjöld. Var óskað eftir að skipið kæmi strax að landi og var ákveðið að það kæmi til hafnar á Rifi. Haft var samband við lögreglu og hafnastjóra. Björgunarbátur á staðnum var fenginn til að flytja sprengjusérfræðinga um borð í skipið en það reyndist ógerlegt vegna veðurs. NV vindur um 20m/sek var þá á svæðinu. Ekki reyndist mögulegt að gera duflið óvirkt um borð og var það því flutt á afvikinn stað og sprengt. Sprengiefnið úr duflinu reyndist vel virkt.
Tundurduflið á dekki skipsins
Duflið tilbúið til flutnings, Jónas K. Þorvaldsson sprengjusérfræðingur
Sprengiefninu komið fyrir
Gígur eftir sprengingu duflsins, Marvin Ingólfsson og
Jónas K. Þorvaldsson sprengjusérfræðingar
Kortið sýnir útbreiðslu þýskra tundurdufla við vesturströnd Íslands
Kort: Sjómælingar Íslands
Myndir: Sigurður Ásgrímsson
SRS 17.11.2007