Viðbúnaður vegna vélarvana flutningaskips

Flutningaskipið er við akkeri

16.4.2024 Kl: 6:50

Þyrlusveit Landhelgisgæslunnar og sjóbjörgunarsveitir á vegum Slysavarnafélagsins Landsbjargar voru kallaðar út ásamt áhöfninni á varðskipinu Freyju, laust fyrir klukkan þrjú í nótt, vegna erlends flutningaskips sem varð vélarvana um fjórar sjómílur út af Rifstanga. Þá var íslenskt togskip sem var í nágrenninu einnig beðið um að halda á staðinn. 

Flutningaskipið rak í átt að landi en áhöfn þess lét akkeri skipsins falla og tókst að stöðva rekið. Skipið er nú um þrjár sjómílur frá landi og akkeri þess halda. Vindur er hægur á staðnum og ölduhæð um tveir metrar. Þegar mesta hættan var liðin hjá voru sjóbjörgunarsveitir Landsbjargar afturkallaðar ásamt togskipinu sem var til taks á staðnum.

Gert er ráð fyrir að varðskipið Freyja verði komið á staðinn eftir hádegi. Þá verður tekin ákvörðun með útgerð skipsins með hvaða hætti það verði dregið af staðnum. 

Þá er þyrlusveit Landhelgisgæslunnar í viðbragðsstöðu á Akureyri ef á þarf að halda.