Ásatrúarfélagið afhenti Landhelgisgæslunni veglega gjöf um borð í v/s ÞÓR

Fimmtudagur 10. maí 2012

Í blíðviðrinu í dag fór fram athöfn um borð í varðskipinu Þór þar sem Ásatrúarfélagið afhenti Öldungaráði Landhelgisgæslunnar gjöf upp á tvær milljónir króna sem er framlag félagsins til kaupa á þyrlu fyrir Landhelgisgæsluna. Ögmundur Jónasson, innanríkisráðherra var viðstaddur athöfnina ásamt Georg Kr. Lárussyni, forstjóra Landhelgisgæslunnar og  Guðjóni Petersen, formanni öldungaráðsins og  veittu þeir gjöfinni viðtöku. Stofnaður hefur verið reikningur fyrir sjóðinn og er númer hans 0301-22-002507 og kennitala 710169-5869.

Ásatrúarfélagið fagnaði 40 ára afmæli á sumardaginn fyrsta og fannst félaginu við hæfi í tilefni afmælisins að leggja 1000 krónur frá hverjum félagsmanni í sjóðinn sem er ætlað að vera vettvangur allra landsmanna til að efla öryggi lands og þjóðar. Með gjöfinni vinni félagsmenn þjóðþrifaverk og sýni samfélagslega ábyrgð.  Hefur Landhelgisgæslan í gegnum tíðina haldið nöfnum norrænna goða og gyðja á lofti með nafngjöfum varðskipa og loftfara sinna.

Hilmar Örn Hilmarsson allsherjargoði ásamt Ögmundi Jónassyni, innanríkisráðherra og Georg Kr. Lárussyni, forstjóra Landhelgisgæslunnar.

Gæslan setur reglur sjóðsins en verndari hans er Öldungaráðið, sem er félag um 30 starfsmanna LHG sem hættir eru störfum.

Að lokinni athöfn var haldið í borðsal varðskipsins þar sem boðið var upp á flatkökur og rjómapönnukökur. Sigurður Steinar Ketilsson, skipherra leiddi síðan gestina um varðskipið Þór og kynnti fyrir þeim skipið og getu þess.

Eftir að Georg Kr. Lárusson, forstjóri LHG hafði veitt gjöfinni viðtöku ávarpaði Ögmundur Jónasson, innanríkisráðherra gesti.Sagðist sjá fyrir sér að þetta framtak ásatrúarmanna yrði fordæmi fyrir sem flesta Íslendinga að leggja fram þúsund krónur í sjóðinn.

Ögmundur Jónasson innanríkisráðherra, Georg Kr. Lárussyni, forstjóra Landhelgisgæslunnar ásamt Sigurði Steinari Ketilssyni, skipherra

Jóhanna Harðardóttir Kjalnesingagoði ræddi m.a. um sterk tengsl þjóðarinnar við Landhelgisgæsluna og hve gleðilegt það sé að varðskip og loftförin hafi verið nefnd eftir goðum og gyðjum norrænu goðafræðinnar.

Pönnukökur Jóhanns bryta vöktu mikla lukku.

Sólmundur Már Jónsson, framkvæmdastjóri rekstrarsviðs LHG, Jón Magnússon, fyrrv. lögfræðingur LHG og Guðjón Petersen, formaður öldungaráðsins

Sindri Steingrímsson, flugrekstrarstjóri LHG, Hólmar Logi Sigmundsson, aðst. flugrekstrarstjóri og Svanhildur Sverrisdóttir, starfsmannastjóri LHG

Myndir Ásgeir Ásgeirsson-Press Photos og Landhelgisgæslan.