Sameiginleg æfing með áhöfn Baldurs

Áhöfnin á TF-LIF og Breiðafjarðarferjunnar Baldurs æfðu saman norður af Flatey í júlí.

20.8.2019 Kl: 15:08

Þyrluáhafnir Landhelgisgæslunnar æfa reglulega með farþegaskipum hér við land og fyrr í sumar var slík æfing haldin með áhöfn Breiðafjarðarferjunnar Baldurs norður af Flatey. Þegar nýir læknar verða hluti af þyrlusveit Landhelgisgæslunnar þurfa þeir að ljúka svokallaðri grunnþjálfun og æfingin um borð í Baldri fyrr í sumar var hluti af slíkri þjálfun.

Fyrir flug var haft samband við áhöfn Baldurs sem tók afar vel í beiðni Landhelgisgæslunnar um að halda sameiginlega æfingu. Hífingarnar fóru fram á síðu og stefni Baldurs í blíðskaparveðri í júlí. Landhelgisgæslan þakkar áhöfninni á Baldri kærlega fyrir gestrisnina enda er afar mikilvægt að þyrlusveit LHG og áhafnir farþegaskipa haldi æfingar sem þessar.

Gísli Valur Arnarsson, stýrimaður og sigmaður, kemur um borð í Baldur úr TF-LIF. 

Áhöfn Baldurs kunni réttu handtökin og var afar hjálpsöm.

Þegar læknar verða hluti af þyrlusveit Landhelgisgæslunnar þurfa þeir að ljúka grunnþjálfun.

Þyrluáhafnir Landhelgisgæslunnar æfa reglulega með áhöfnum farþegaskipa.Farþegar Baldurs fylgdust spenntir með æfingunni.Auðbergur Daníel Hálfdánarson tók myndirnar og gaf Landhelgisgæslunni góðfúslegt leyfi fyrir birtingu þeirra.