Áhöfn Freyju siglir um miðin á varðskipinu Þór

Síðustu dagar hafa verið annasamir um borð í Þór en áhöfnin var meðal annars til taks á Austfjörðum vegna snjóflóðahættu um liðna helgi.

8.4.2024 Kl: 15:53

Hjá Landhelgisgæslunni eru starfandi tvær varðskipsáhafnir sem starfa um borð á varðskipunum Þór og Freyju. Að undanförnu hefur varðskipið Freyja verið í smávægilegu viðhaldi og því hefur áhöfnin á Freyju verið við störf um borð í varðskipinu Þór.

Síðustu dagar hafa verið annasamir um borð í Þór en áhöfnin var meðal annars til taks á Austfjörðum vegna snjóflóðahættu um liðna helgi.

Eins og gengur hefur töluvert verið um æfingar. Í síðustu viku fóru meðal annars fram æfingar í reykköfun og notkun á línubyssu. Þá hefur áhöfn varðskipsins farið til eftirlits í þrettán skip og báta að undanförnu. Í flestum tilfellum hefur allt verið eftir bókinni en smávægilegar athugasemdir um lagfæringar þurfti að gera hjá einhverjum.

Á páskadag hélt áhöfnin hið árlega páskabingó þar sem spilaðar voru níu umferðir og glæsilegir vinningar voru í boði. Áhöfnin vill þakka velunnurum sérstaklega fyrir að leggja þessari árlegu uppákomu lið.

Áhöfnin á varðskipinu hefur farið til eftirlits í þrettán skip og báta upp á síðkastið. 

Hið árlega páskabingó.

Reykköfunaræfing um borð í Þór. 

Reykköfun æfð.