Eftirlits- og sjómælingaskipið Baldur hélt af stað í árlegt mælingaúthald síðastliðinn laugardag.
26.5.2020 Kl: 13:30
Eftirlits- og sjómælingaskipið Baldur hélt af stað í
árlegt mælingaúthald síðastliðinn laugardag. Fyrst um sinn verður Baldur við
dýptarmælingar á Breiðafirði þar sem mæld verður siglingaleiðin um Norðurflóa
inn til Reykhóla. Að því loknu fer Baldur til mælinga við norðanverða Vestfirði
þar sem fyrir liggja mælingar í Ísafjarðardjúpi, Jökulfjörðum og með
Hornströndum.
Við dýptarmælingar Baldurs eru að öllu jöfnu settir upp
flóðmælar í nærliggjandi höfnum til að leiðrétta mælt dýpi fyrir sjávarstöðu en
í sjókortum miðast dýpistölur, þ.e.a.s. svokallað kortadýpi, við sjávarhæð á
meðalstórstraumsfjöru. Flóðmælarnir eru stilltir af miðað við skilgreinda
hæðarpunkta í hæðarkerfum hafnanna.
Vegna fjarlægðar flestra fyrirhugaðra mælingasvæða á
norðanverðum Vestfjörðum frá höfnum með skilgreinda hæðarpunkta verður ekki
unnt að nota flóðmæla til leiðréttinga á mældu dýpi á þeim svæðum og þurfti að
bregðast við því. Settur var upp IRIDIUM gervihnattabúnaður um borð í Baldri
til að tryggja netsamband svo hægt sé að streyma gögnum úr GPS leiðréttingakerfi
ÍSMAR til skipsins þó hefðbundinn GSM símabúnaður detti út. Með því móti verður
unnt að ákvarða staðsetningu með svokallaðri GPS RTK nákvæmni, en þá er skekkja
staðsetningar einungis örfáir sentimetrar.
Dýptarmælingar með GPS RTK nákvæmni eru vel þekktar en þá
eru skilgreind hæðarkerfi hafnanna notuð til að reikna út rétt dýpi. Í tilviki
Baldurs, þar sem vegna fjarlægðar er ekki hægt að nota þessa hæðarkerfi til
útreikninga, voru fengin gögn frá Landmælingum Íslands og Vegagerðinni og út
frá þeim voru útbúin hæðarlíkön fyrir meðalsjávarhæð og meðalstórstraumsfjöru.
Hæðarlíkönin, sem ná yfir stórt svæði og taka því breytingum eftir
staðsetningum, eru keyrð inn í mælingaforrit um borð í Baldri og með nákvæmum
hæðarupplýsingum úr GPS staðsetningatæki skipsins getur mælingaforritið þannig
reiknað rétt kortadýpi samtímis því sem dýpi er mælt hverju sinni.
Þrátt fyrir þessa breyttu aðferð við mælingarnar og
útreikninga á kortadýpi verða þó áfram settir upp flóðmælar þar sem því verður
við komið, bæði þar sem það þykir henta betur og eins til að bera saman
mælingagögn.
Áætlað er að Baldur verði við mælingar við Vestfirði fram
undir miðjan september.
Á meðfylgjandi mynd sem tekin var fyrir fyrir brottför Baldurs
eru frá vinstri: Marteinn E. Þórdísarson bátsmaður, Guðm. Birkir Agnarsson
skipstjóri, Ágúst Ó. Valtýsson vélstjóri, Hjörtur F. Jónsson stýrimaður og
Andri Leifsson yfirstýrimaður.
Unnið að uppsetningu flóðmælis á Reykhólum.
