Björgunaræfingin Faxi heppnaðist vel

Rúmlega hundrað þátttakendur tóku þátt í sjóbjörgunaræfingunni Faxa 23 um helgina þar sem fjöldabjörgun farþega frá hvalaskoðunarskipi var æfð úti fyrir Reykjavík.

9.5.2023 Kl:13:22

Rúmlega hundrað þátttakendur tóku þátt í sjóbjörgunaræfingunni Faxa 23 um helgina þar sem fjöldabjörgun farþega frá hvalaskoðunarskipi var æfð úti fyrir Reykjavík. Viðbragðsaðilar og hvalaskoðunarfyrirtækið Elding stóðu að æfingunni.

Á æfingunni var líkt eftir eldsvoða um borð í hvalaskoðunarskipinu Eldey. Eftir að skipstjóri Eldeyjar lýsti yfir neyðarástandi um borð flutti þyrla Landhelgisgæslunnar slökkviliðsmenn frá slökkviliði höfuðborgarsvæðisins um borð í skipið, áhöfnin á varðskipinu Þór var kölluð út sem og sjóbjörgunarsveitir í nágrenni höfuðborgarsvæðisins.

Þeir mest slösuðu voru fluttir með þyrlunni til Reykjavíkur en björgunarsveitir fluttu aðra farþega hvalaskoðunarskipsins um borð í varðskipið Þór.

Á æfingunni gafst einstakt tækifæri til að samhæfa aðgerðir og samskipti viðbragðsaðila og útgerðar vegna neyðartilviks á borð við það sem æfingin tók til.

Landhelgisgæsla Íslands annaðist skipulagningu æfingarinnar í samvinnu við Slysavarnafélagið Landsbjörg, hvalaskoðunarfyrirtækið Eldingu, Slökkvilið höfuðborgarsvæðisins, 112, almannavarnadeild ríkislögreglustóra og lögregluna á höfuðborgarsvæðinu.

Æfingin var fjölmenn en að henni komu rúmlega 100 manns, þ.m.t. leikarar, áhöfnin hvalaskoðunarskipsins og viðbragðsaðilar.

Sjóbjörgunarsveit á vegum Slysavarnafélagsins Landsbjargar og varðskipið Þór í bakgrunni. 
Sigmaður og læknir í áhöfn þyrlu Landhelgisgæslunnar. 
Hugað að slösuðum um borð í Eldey.
Þyrl aLandhelgisgæslunnar flutti sex slökkviliðsmenn um borð í hvalaskoðunarskipið. 
Frá hvalaskoðunarskipinu Eldey.