Brýr fluttar með þyrlu Landhelgisgæslunnar
Skemmtilegt samfélagsverkefni á Austurlandi
10.8.2022 Kl: 14:55
Áhöfnin á TF-EIR, þyrlu Landhelgisgæslunnar, tók í gær þátt
í afar skemmtilegu samfélagsverkefni á Austurlandi þegar brúarbitar, göngubrú og vatnstankar
voru flutt með þyrlunni.
Í upphafi hélt áhöfnin beint frá Reykjavík að Hengifossi og lenti á túni skammt frá fossinum þar sem búið var að koma brúarbitum og handriðum fyrir. Smiðir voru teknir um borð í þyrluna og fluttir upp að brúarstæðinu. Að því búnu var brúarbitunum og handriðunum komið fyrir á sínum stað með aðstoð þyrlunnar.
Á vef Austurfrétta kemur fram að á næstu dögum verði brúin sjálf smíðuð ofan á bitana. Hún er staðsett á útsýnisstað neðan við Hengifoss. Með brúnni verður til gönguleið hringinn í kringum gilið sem Hengifossá fellur í.
Þegar þessu var lokið hélt áhöfnin frá Hengifossi yfir á Seyðisfjörð að bænum Selsstaðarbæ. Þar var búið að smíða göngubrú sem hífð var í um 540 metra hæð og sett á sinn stað. Allt gekk eins og í sögu. Megin byggingarefni beggja brúa er lerki úr Fljótsdal.
Því næst var haldið inn á Egilsstaðaflugvöll þar sem eldsneyti var tekið á þyrluna áður en farið var í síðasta verkefni dagsins við Herðubreiðarlindir. Þar voru þrír vatnstankar sem flytja þurfti á bílaplan við skálann svo unnt væri að flytja þá landleiðina með bíl.
Landhelgisgæslunni er ljúft og skylt að taka þátt í samfélagsverkefni sem þessu. Það var Gönguklúbbur Seyðisfjarðar sem óskaði eftir aðkomu þyrlusveitarinnar að verkefninu sem hefur mikið æfingarlegt gildi fyrir þyrluáhöfnina.
Gunnar Gunnarsson, ritstjóri Austurfrétta, gaf Landhelgisgæslunni góðfúslegt leyfi til þess að nota meðfylgjandi myndir sem teknar voru við Hengifoss í gær.
TF-EIR á flugi. Ljósmynd: Gunnar Gunnarsson
Brúarbita komið fyrir við Hengifoss. Ljósmynd: Gunnar Gunnarsson / Austurfrétt.
TF-EIR á flugi. Ljósmynd: Gunnar Gunnarsson / Austurfrétt.
TF-EIR, þyrla Landhelgisgæslunnar, tekur á loft.
Brúarbita komið fyrir. Ljósmynd: Gunnar Gunnarsson / Austurfrétt.
Brúarbitinn hífður með TF-EIR. Ljósmynd: Gunnar Gunnarsson / Austurfrétt.
TF-EIR kemur brúarbitanum á sinn stað. Ljósmynd: Gunnar Gunnarsson / Austurfrétt.
Vandasamt verk. Ljósmynd: Gunnar Gunnarsson / Austurfrétt.