Fjölbreytt verkefni Þórs

Varðskipið kom til hafnar í Reykjavík í vikunni eftir vel heppnaða ferð.

30.8.2019 Kl: 16:06

Varðskipið Þór lagðist að bryggju í Reykjavík í vikunni eftir vel heppnaða og fjölbreytta ferð umhverfis Ísland. Auk áhafnar varðskipsins voru tveir eftirlitsmenn frá Fiskistofu með í för.
Í ferðinni sinnti áhöfnin og starfsmenn Fiskistofu eftirliti í 31 skipi á miðunum. Sömuleiðis var unnið að viðhaldi á duflum í samvinnu við Vegagerðina í Breiðafirði, við Kjallakssker, Bjarnareyjar og við Ólafsboða. Einnig var skipt um vindhraðamæli við Hornbjargsvita undir leiðsögn rafvirkjameistara frá Vegagerðinni.
Þá tók varðskipið línubát með bilaða stýrisdælu í tog norður af Skallarifi þann 22. ágúst og seinna sama dag kom áhöfn varðskipsins slösuðum skipverja í land sem varð fyrir því óláni að fá línuöngul í þumalfingur.
Eins og svo oft áður var haldin æfing með TF-LIF, þyrlu Landhelgisgæslunnar, en við sama tilefni var beltagrafa sótt á Hornbjarg fyrir Ferðafélag Íslands og komið fyrir í varðskipinu. Ferð beltagröfunnar fljúgandi var tignarleg og gekk afar vel.

Viðhaldsvinna við Hornbjargsvita.
Halldór Nellet, skipherra, auk þeirra Eyþórs Þórðarsonar og Sigurðar Pálmasonar frá Fiskistofu.
Varðskipið fyrir brottför.Beltagrafan fljúgandi.