Vel heppnað verkefni og æfing á Bessastöðum.
11.10.2023 Kl: 16:48
Guðni Th. Jóhannesson, forseti Íslands, tók þátt í björgunaræfingu með áhöfninni á TF-GRO, þyrlu Landhelgisgæslunnar, við Bessastaði í dag. Sigmaður þyrlunnar seig niður til forsetans sem var staddur í fjörunni yst á nesinu, klæddi forsetann í björgunarlykkju og hífði hann að því búnu um borð í þyrluna.
Þegar björgunaræfingunni var lokið fór fram fjöruhreinsun þar sem áhöfn þyrlunnar hífði tvö níðþung bíldekk úr fjörunni yst á nesinu en þau vógu samtals 400 kíló. Dekkjunum var krækt í þyrluna og flogið með þau að bílageymslu við Bessastaði. Þaðan verða þau flutt til förgunar.
Eftir að verkefnum þyrlusveitarinnar var lokið bauð forsetinn áhöfn þyrlunnar í kaffisamsæti á Bessastöðum.
Ljósmyndir: Árni Sæberg, ljósmyndari Morgunblaðsins.
Guðni Th. Jóhannesson, forseti Íslands, og TF-GRO.
Dekkin hífð.
Kristján Björn Arnar, Jens Þór Sigurðarson, Jóhannes Jóhannesson og Ásgeir Erlendsson.
Á Bessastöðum.
Giftugsamleg ,,björgun“.
Dekkin flutt með þyrlunni.
Guðni hífður um borð í þyrluna.
