Hundrað ára sjókort

Fyrir ríflega hundrað og tveimur árum, 4. júní 1913, birtist stutt frétt í blaðinu Vísi um að til stæði að rannsaka innsiglinguna til Salthólmavíkur og Króksfjarðarness. Fréttin bar yfirskriftina „Hafnarmælingar vestra“ og var svohljóðandi: „Í Kaupmannahafnarblaðinu National Tidende er sagt frá því 17. f. m., að ráðnir sjeu af landstjórn Íslands Premierlöjtnan Bistrup, 2 undirforingjar og 2 dátar til þess að rannsaka innsiglinguna til Salthólmavíkur í Dalasýslu og Króksfjarðarnes í Barðastrandarsýslu. Ætluðu þeir að leggja af stað 24. s. m. (með Botníu). Við rannsóknir þessar hafa þeir félagar mótorbát og róðrarbát og fá hjer mótorista og annan mann kunnugan á þeim stöðum, sem mæla á. Þeir búast við að hafa lokið þessu verki í Septemberlok. Landsjóður kostar verkið“.

Auglýsing í Vísi 26. júní 1918.

Tveimur árum seinna, árið 1915,  var sjókort nr. 275 gefið út af „ det kongelige Sökort-Arkiv“. Heiti kortsins var Indsejling til Skardstöd, Salthólmavík og Króksfjardarnes og það kostaði 3 kr.

Kort nr. 275 þegar það kom út 1915. Seinna fékk kortið íslenskt heiti og númer.

Á kortinu kemur fram að það sé gert eftir mælingum sem gerðar voru af H. Bistrup 1913 og 1914 samkvæmt ákvörðun Alþingis („Kortet er udarbejdet efter Opmaaling foretaget í Henhold til Althingets Beslutning, af Premierlöjtnant í Flaaden samt efter Generalstabens Kort.“)

Kortið var endurprentað hjá Íslenzku sjómælingunum 1961. Þá hafði númeri og heiti kortsins verið breytt.  Breiðafjörður – Norðurflói, nr. 44  hét það þá og gerir enn. Þetta er elsta sjókortið af þeim ríflega 80 sjókortum sem Landhelgisgæslan gefur út nú um stundir.

Kortið er það eina sem eftir er sem á eru teiknaðar myndir af landmiðum og það er annað tveggja sjókorta sem enn eru í notkun frá dögum danskrar sjókortagerðar við Ísland. Bæði eru af Breiðafirði.

Dæmi um teikningar af landmiðum sem prentaðar eru til hliðar við kortið.

Sjókortið er barn síns tíma. Strandferðaskipin sem höfðu viðkomu í Salthólmavík og Króksfjarðarnesi eru löngu horfin af sjónarsviðinu. Verslunarstaðirnir sömuleiðis. En dýptarmælingarnar sem gerðar voru fyrir meira en 100 árum og kortið byggir á standa fyrir sínu sem slíkar þótt þær uppfylli ekki nútímakröfur um þéttleika dýptarmælinga.