Landhelgigsæslan prófar lausn sem byggir á gervigreind
Prófanir fóru fram hér á landi í síðustu viku.
26.10.2023 Kl: 15:15
Landhelgisgæslan hefur undanfarin tvö ár tekið þátt í nýsköpunarverkefninu AI-ARC. Markmiðið með verkefninu er að auka stöðuvitund og árvekni á sjó en verkefnið er fjármagnað af nýsköpunarsjóði Evrópusambandsins, Horizon 2020. Að því starfa 20 samstarfsaðilar frá 12 Evrópulöndum.
AI-ARC lausnin samanstendur af ýmsum stafrænum möguleikum og er frekar talað um umhverfi heldur en kerfi, en lausnin miðar að því að auka sjálfvirkni við eftirlit, löggæslu, leit og björgun á norðurslóðum þar sem gervigreind er nýtt.
Tilgangur verkefnisins er að útbúa nýstárlegt, öflugt, skilvirkt og notendavænt upplýsingaumhverfi þangað sem unnt er að deila gögnum og upplýsingum um skipaumferð og annað sem sjónum tengist. Þeir stafrænu möguleikar sem mynda þetta upplýsingaumhverfi sjá svo um að greina gögnin. Sem dæmi, þá geta þeir greint ísjaka út frá gervitunglamyndum og ef skip nálgast þá er hlutaðeigandi aðilum, sem jafnframt eru notendur umhverfisins gert viðvart.
Í ár hefur það gerst tvívegis að skip hafi siglt á ísjaka, en það gerðist suður af Grænlandi og í Grænlandssundi. Þjónustunni er ætlað að draga úr líkum á óhöppum sem þessum og auka öryggi sjófarenda.
Þetta stafræna umhverfi mun líka auðvelda samskipti milli björgunarmiðstöðvar og sjófarenda. Sem dæmi væri unnt að deila leitarsvæðum og leitarferlum myndrænt milli björgunarmiðstöðvar og eininga t.d. fiskiskip eða flutningaskip, sem kæmu til aðstoðar við leit og björgun.
Í sl. viku voru fulltrúar þeirra samstarfsaðila sem að verkefninu koma við prófanir á þessum þjónustum sem fóru fram um borð í skipum og stjórnstöð Landhelgisgæslunnar. Prófanirnar gengu vonum framar og lausnin lofar svo sannarlega góðu.
Landhelgisgæslan þakkar öllum samstarfsaðilum sem að verkefninu komu fyrir gott og innihaldsríkt samstarf.
Hluti hópsins um borð í varðskipinu Þór þar sem prófanir fóru m.a fram.
Um borð í varðskipinu Þór.
Hópmynd að loknum vel heppnuðum prófunum.
Snorre Greil, verkefnastjóri á aðgerðasviði Landhelgisgæslunnar, um borð í varðskipinu Þór.
Um borð í Þór.